މިރޭ ވޯޓު ގުނިޔަސް އަޅުގަނޑުމެން މޮޅުވާނެ، މާދަމާ ގުނައިފިއްޔާ އެއަށްވުރެ ބޮޑުތަނުން މޮޅުވާނެ: ރައީސް ޞާލިހު

ރިޔާސީ އިންތިހާބުގެ ވޯޓު މިރޭ ގުނައިފި ނަމަވެސް، އެ އިންތިހާބު ކާމިޔާބު ކުރައްވާނީ އެމަނިކުފާނު ކަަމަށް އެމްޑީޕީީ ގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ގިނަ އަދަދެއްގެ ރައްޔިތުން ބައިވެރިވެގެން މިރޭ ކުރިއަށްދާ އެމްޑީޕީގެ "އުފާވެރި މާލެ" ޖަލްސާގައި ވާހަކަ ދައްކަވަން ފަށްޓަވަމުންވެސް ރައީސް ޞާލިހް ވިދާޅުވީ، ރިޔާސީ އިންތިހާބު މިހާރު ނިމިއްޖެ ކަމަށެވެ. އަދި އިންތިހާބުގެ ނަތީޖާ މިރޭ އިއުލާން ކުރި ނަމަވެސް ކާމިޔާބު ވާނީ އެމަނިކުފާނަށް ކަމަށް ވިދާޅުވި އެވެ.

އިންތިޚާބު މިހާރު މިއޮތީ ނިމިފައި. ނިމިފައި. ނިމިފައި. މިރޭ ވޯޓު ގުނިޔަސް އިރާދަކުރެއްވިޔާ އަޅުގަނޑުމެން މޮޅުވާނެ. މާދަމާ ވޯޓު ގުނައިފިއްޔާ އެއަށްވުރެ ބޮޑު ތަނުން މޮޅުވާނެ. 9 ސެޕްޓެމްބަރު ގައި ގުނައިފިއްޔާ، މާ ބޮޑުތަނުން އަޅުގަނޑުމެން މޮޅުވާނެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ، އެމަނިކުފާނު ރާއްޖޭގެ 16 އަތޮޅަކަށް ޒިޔާރަތް ކުރައްވާފައިވާ ކަމަށެވެ. އަދި އެތަނުން ތިން އަތޮޅު ފިޔަވައި، ހުރިހާ އަތޮޅެއްގެ ހުރިހާ ރަށަކަށް ވަޑައިގެންނެވި ކަމަށްވެސް ވިދާޅުވި އެވެ. އަދި އެ ހުރިހާ ރަށަކުންވެސް ފެންނަނީ އަނިޔާވެރިކަމަށް އެނބުރިދާން ބޭނުން ނުވާ މަންޒަރު ކަމަށް އެމަނިކުފާނު ވިދާޅުވި އެވެ.

"ފެންނަނީ ބޮޑު ހެޔޮ ބަދަލުތަކެއް ރަށްތަކަށް އައިސްފައިވާ މަންޒަރު. ސިޔާސީ ހަމަޖެހުމުގެ ފައިދާ، ހުރިހާ ދިމާއަކަށް ފޯރާފައި އޮތްތަން. ކުޑަރަށެއް ބޮޑު ރަށެއް ނުބަލައި، އަޅުގަނޑުމެން ގެނައި ތަރައްގީގެ މަޝްރޫއުތަކާ ދޭތެރޭގައި ރައްޔިތުން ހިތްހަމަޖެހިފައި ތިބޭ މަންޒަރު."

ރައްޔިތުން ތިބީ ވަކިގޮތަކަށް ނިންމައިގެން. އެއީ، މިރޭ ތިޔަބޭފުޅުންވެސް ތިއްބެވިގޮތް. އިރާދަކުރެއްވިޔާ އެމްޑީޕީއާ ގުޅިފައިވާ ޕާޓީތައް ނޫން ބައެއް، އެއްބުރުން ނޫން ބުރެއް މ މިފަހަރަކު ނެތް. މުޅި ރާއްޖޭގެ ރަސްމީ ނަތީޖާ ރަމްޒުވަނީ، ފުރަމާލޭގައި މިރޭ މި ބޭއްވޭ ޖަލްސާގެ މި މަންޒަރަށް.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

މިއާއެކު ރައީސް ޞާލިހް ވިދާޅުވީ، އެމަނިކުފާނު ވަޑައިގެންނެވި ހުރިހާ އަތޮޅަކުންވެސް ބުނަމުންދިޔައީ، މި އިންތިހާބު، އެއްބުރުން އެމްޑީޕީ އާއި ގުޅިފައިވާ ކޯލިޝަނުން ކާމިޔާބު ކުރައްވާނެ ކަަމަށެވެ.