ގައުމީ މަޖިލީހުގެ ތާއީދު އޮތް ނަމަ، އަޅުގަނޑު އެމްޑީޕީއާ ގުޅެން ތައްޔާރު: ރައީސް ނަޝީދު

އެމްޑީޕީގެ ގައުމީ މަޖިލީހުގެ 50 އިންސައްތަ މީހުންގެ ތާއީދު އޮތް ނަމަ، އެޕާޓީއާ ގުޅެން ތައްޔާރަށް ހުންނެވި ކަމަށް އެމްޑީޕީީގެ ކުރީގެ ރައީސްގެ އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު، އެމްޑީޕީގެ ޗެއާޕާސަން ފައްޔާޒު އިސްމާއިލްއަށް މިއަދު ފޮނުއްވި މެސެޖެއްގައި އެމަނިކުފާނު ވަނީ "އެމްޑީޕީގެ ގައުމީ މަޖިލީހުގެ 50 ތާއީދު އޮތް ނަމަ، އަޅުގަނޑު އެމްޑީޕީއާ ގުޅެން ތައްޔާރު" ހުންނެވި ކަމަށް ވިދާޅުވެފައެވެ.

ނަޝީދުގެ މި މެސެޖު ފައްޔާޒު ވަނީ އެމްޑީޕީގެ ގައުމީ މަޖިލީހާވެސް ހިއްސާ ކުރައްވާފައެވެ. އެ މެސެޖު ފޮނުއްވުމަށް ފަހު ފައްޔާޒު ވަނީ "މެސެޖު ލިބުނީމަ، ތިޔަ ބޭފުޅުންނާ ހިއްސާކޮށްލީ" ކަމަށް ވިދާޅުވެފަ އެވެ.

އަލުން އެމްޑީޕީއާ ގުޅުމުގެ ޝައުގުވެރިކަން ހުރިކަން ނަޝީދު ފާޅުކުރައްވާފައިވާއިރު, އެމަނިކުފާނު އެމްޑީޕީގެ ރައީސް ކަމުގެ މަގާމުގައި ހުންނެވިއިރު ޕާޓީ ވަނީ ޚިޔާލު ތަފާތުވެ ދެބަޔަކަށް ބެހިގެން ގޮސްފައެވެ. އެގޮތުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދު ކުރާ މީހުން އެއްފަޅިއަށް ދިޔައިރު އެމަނިކުފާނަށް ތާއީދު ކުރައްވާ މެންބަރުންނާއެކު ފިކުރެއްގެ ދިރުން ނަމުގައި ޕާޓީގެ ތެރެއިން ގޮތްޕެއް ވެސް ވަނީ އުފައްދަވާފައެވެ.

އެއަށްފަހު އެ މެންބަރުން ޕާޓީން ވަކިވެ، ރައީސް ނަޝީދުގެ އިރުޝާދުގެ ދަށުން ދަ ޑިމޮކްރެޓްސް ގެ ނަމުގައި އައު ޕާޓީއެއް އުފައްދަވައި، މިހާރު ނަޝީދުވެސް ވަނީ އެޕާޓީއާ ގުޅިވަޑައިގެންފައެވެ.

އެއާއެކު ނަޝީދު ދިޔައީ ފާޅުގައި އެމްޑީޕީ އަށާއި ރައީސް ޞާލިހަށް ފާޑުވިދާޅު ވަމުންނެވެ.

ނަމަވެސް، ރައްޔިތުންގެ މަޖިލީހަށް ދަ ޑިމޮކްރެޓްސް އިން، ބަރުލަމާނީ ނިޒާމާ ގުޅޭ ގަރާރު ހުށަހެޅި ފަހުން، ނަޝީދު އަންނަނީ އެމްޑީޕީއާ އެކު އެކަމާގުޅޭ މަޝްވަރާތައް ކުރަމުންނެވެ. އެގޮތުން ދާދިފަހުންވެސް ވަނީ އެކަމުގެ މަޝްވަރާއަށް ރައީސް ޞާލިހާއި ބައްދަލު ކުރައްވާފައެވެ. އަދި ރައީސް ޞާލިހު ވަނީ އެ މަސައްކަތް ކުރިއަށް ގެންދަވާނެ ކަމުގެ ޔަގީންކަން ވެސް ދެއްވާފައެވެ.

އެފަހުން، މިފަހަރު ރިޔާސީ އިންތިހާބުން އެމްޑީޕީއަށް ލިބުނު ނާކާމިޔާބީއާ އެކުވެސް ނަޝީދުވަނީ އެ ޕާޓީން ކުރި ކެންޕެއިން މަސައްކަތަށް ވަރަށް ބޮޑަށް ތައުރީފު ކުރައްވައި ވާހަކަ ދައްކަވާފައެވެ.