ފަލަސްޠީނުގެ ޒުވާނަކަށް ހަމަލާދީ ޝަހީދުކޮށްލައިފި

އިޒްރާއިލް ސިފައިން ފަލަސްޠީނުގެ 24 އަހަރުގެ ޒުވާނެއްގެ ގަޔަށް ބަޑިޖަހައި ޝަހީދުކޮށްލައިފިއެވެ.

ފަލަސްޠީނުގެ ހުޅަނގު އައްސޭރީގައި އިޒްރާއިލް ސިފައިން ބަޑިޖަހައި ޝަހީދުކޮށްލައިފައިވަނީ މުޙައްމަދް ރައީދް ބަރާދިޔާ ނަމަކަށް ކިޔާ ޒުވާނެކެވެ. އިޒްރާއިލް ސިފައިން ބުނެފައިވަނީ މުޙައްމަދު ގެ ގަޔަށް ބަޑިޖަހައި ހަމަލާދިނީ އޭނާ ދުއްވަމުން ދިޔަ ކާރުން އިޒްރާއިލްގެ ސިފައިންގެ ބަޔެއްގެ ގައިގައި ޖެއްސުމުން ކަމަށެވެ.

މަންޒަރު ދުށް މީހަކު ވަފާ ނިއުސް އެޖެންސީ އަށް ބުނެފައިވަނީ 24 އަހަރުގެ މުޙައްމަދު ގަޔަށް ބަޑިޖަހައިފައިވަނީ އޭނާ އޭނާގެ ކާރު ތެރޭގައި ހުއްޓައި ކަމަށެވެ. އަދި ބަޑި ޖަހައި ޒަހަމްކޮށްލުމަށް ފަހު ފަރުވާ ދިނުމަށް އަވަސްފަރުވާ ދޭ މީހުން އޭނާ އޮތް ހިސާބަށް ދިޔުން މަނާ ކުރި ކަމަށެވެ.

"މުޙައްމަދު ގަޔަށް ބަޑިޖަހައި ޒަހަމްވެ ލޭތައް އޮހޮރެމުންދިޔައިރުވެސް ފަރުވާ ދިނަނުދީ ހުއްޓުވި، މަރުވަންދެން އޭނާ ދޫކޮށްލީ" ވަފާ އެޖެންސީގެ ރިޕޯޓަރު ބުނެފައިވެއެވެ.

އިޒްރާއިލް ސިފައިން ބުނެފައިވަނީ މުޙައްމަދު ދުއްވި ކާރުން އިޒްރާއިލްގެ ބައެއްގެ ގައިގައި ޖެއްސުމުގެ ސަބަބުން ތިން މީހަކު އަނިޔާވެ ދެމީހެއްގެ ހާލު ވަރަށް ދެރަ ކަމަށެވެ.

މުޙައްމަދުގެ ގަޔަށް ބަޑިޖަހައި ޝަހީދު ކޮށްލައިފައިމިވަނީ ޖާރުއްސަލަމްގައި ހުންނަ އަލް އަޤްސާ މިސްކިތުގެ ކައިރީގައި ފަލަސްޠީނުގެ އެހެން ޒުވާނަކު ޝަހީދު ކޮށްލިތާ ގިނަ އިރުތަކެއް ނުވަނީހެނެވެ.

އަޤްސާ މިސްކިތުގެ ކޮމްޕައުންޑްގެ ތެރޭގައި 26 އަހަރުގެ މުޙައްމަދު ޚާލިދް އަލް އޮސައިބީ ގެ ގަޔަށް 10 ފަހަރު ބަޑިޖަހައި ފައިވަނީ އަޤްސާ މިސްކިތަށް އަޅުކަން ކުރަން ދިޔަ ފަލަސްޠީނުގެ އަންހެނަކަށް އިޒްރާއިލް ސިފައިން ފުރައްސާރަ ކުރަން އުޅުމުން އެކަމަށް އޭނާ ހުރަސް އެޅުމުންނެވެ.

ނަމަވެސް އިޒްރާއިލްގެ ޔަހޫދީ ސިފައިން ބުނެފައިވަނީ އޭނާ އަށް ހަމަލާދިނީ ސިފައިންގެ މީހެއްގެ އަތުން ބަޑި އަތުލައި އެމީހުންނަށް ހަމަލާދޭން މަސައްކަތް ކުރުމުން ކަމަށެވެ.

މުޙައްމަދު ޚާލިދް ގެ އާއިލާއިން ވަނީ އޭނާގެ މަރުގެ މައްސަލައިގެ ތަހުޤީޤަށް އެސަރަހައްދުގެ ސެކިޔުރިޓީ ކެމެރާތައް ބަލައިދިނުމަށް އެދިފައެވެ.

މުޙައްމަދު ޚާލިދް އަކީ ދާދި ފަހުން މެޑިކަލް ކޮލެޖުން ދަސްވެނިވި ޑޮކްޓަރެކެވެ.

"އޭނާ އަކީ މަޑުމައިތިރި މީހެއް، އޯގާތެރި މީހެއް، ޑޮކްޓަރުންތަކެއް ހިމެނޭ އާއިލާއަކަށް ނިސްބަތްވާ މީހެއް، އޭނާ އަޤްސާ އަށް ދަނީ އަޅުކަން ކުރަން، އިޒްރާއިލް މީހުން އޭނާ އެމީހުންނަށް ހަމަލާދިނުމަށް މަސައްކަތް ކުރިކަމަށް ބުނުމުން ޤަބޫލެއް ނުކުރެވޭނެ، ހެކި ދައްކާ" މުޙައްމަދު ޚާލިދްގެ އާއިލާ މީހަކު ބުނެފައިވެއެވެ.