އިޒްރާއިލްގެ ޖަލުގައި ފަލަސްޠީނުގެ ގައިދީއަކު ނިޔާވެއްޖެ

އިޒްރާއިލްގެ ޖަލުގައި ބަނޑުހައި ކަމުގެ ހަޅުތާލު ކުރަމުންދިޔަ ފަލަސްޠީނުގެ ގައިދީއަކު ނިޔާވެއްޖެއެވެ.

އިޒްރާއިލް ޖަލުގައި ބަންދުކޮށްފައި ހުރި ޤާދިރް އަދްނާން ފަލަސްޠީނުގެ އިސްލާމިކް ޖިހާދު ގްރޫޕާއި ގުޅުން އޮންނަ ކަމަށްބުނެ ހައްޔަރު ކޮށް ޖަލުގައި ބަންދުކޮށްފައި ހުރި މީހެކެވެ.
އިޒްރާއިލް ޖަލު އޮފިސަރުން ބުނެފައިވަނީ ޤާދިރް އަދްނާން ބަނޑުހައި ކަމުގެ ހަޅުތާލު ކުރާތާ ތިން މަހާއި ގާތްވެފައި ވާކަމަށެވެ. އަދި އޭނާ ވަނީ ސިއްޙީ ފަރުވާ ހޯދުމަށް ވެސް ދެކޮޅު ހަދައިފައި ވާކަމަށެވެ. އަދި އަންގާރަ ދުވަހު ހެނދުނު، ޖަލު ގޮޅީގެ ތެރޭގައި އޭނާ ހޭނެތިފައި އޮއްވައި ފެނިފައިވާކަމަށެވެ.
ޤާދިރް ޖަލުގައި ހުރެގެން ބަނޑުހައި ކަމުގެ ހަޅުތާލު ކުރަން ފަށައިފައިވަނީ ފެބްރުއަރީ 5 ވަނަ ދުވަހު ހައްޔަރުކޮށް، ޖަލުގައި ހައްޔަރު ކޮށްފައި ބެހެއްޓި ހިސާބުން ފެށިގެނެވެ. އަދި އޭނާގެ މައްޗަށް އެއްވެސް ޙުކުމެއް ކޮށްފައެއް ނުވެއެވެ.

2015 ވަނަ އަހަރުވެސް 5 މަސް ދުވަހުގެ ދިގު ބަނޑުހައި ކަމުގެ ހަޅުތާލެއް އިޒްރާއިލް ޖަލުގަައި ކޮށްފައެވެ. އެފަހަރުވެސް އޭނާ ޖަލުގައި ހައްޔަރުކޮށް ބަހައްޓައިފައިވަނީ އެއްވެސް ޙުކުމެއް ކުރުމަކާއި ނުލައެވެ.

އިޒްރާއިލް ޖަލުގައި މިހާރުވެސް ޙުކުމަކާއި ނުލައި ފަލަސްޠީނުގެ 1000 އަށްވުރެ ގިނަ ގައިދީން އެބަތިބި ކަމަށް އަލްޖަޒިރާގައި ބުނެފައިވެއެވެ.

ފަލަސްޠީނުގެ ނިއުސް އެޖެންސީ ވަފާ އިން ބުނެފައިވަނީ އަރައްބާ އަވަށަށް ނިސްބަތްވާ 45 އަހަރުގެ ޤާދިރް އަދްނާން ނުކައި ހުންނަތާ 87 ދުވަސް ވެދާނެ ކަމަށާއި، އޭނާ ކެއުމަށް ދެކޮޅުހަދައި ބަނޑުހައި ހޫނު ކަމުގެ ހަޅުތާލު ކުރީ އެއްވެސް ޙުކުމަކާއި ނުލައި އޭނާ ޖަލުގައި ބަންދުކުރުމުން ކަމަށެވެ.

9 ކުދިންގެ ބައްޕަ އެއް ކަމަށްވާ ޤާދިރް އަދްނާން 12 ފަހަރަށް އިޒްރާއިލްގެ ޖަލަށް ލެވިފައި ވާކަމަށާއި، އޭގެ ތެރެއިން ގިނަ ފަހަރު ތަކުގައި އޭނާ ބަނޑުހައިހޫނު ކަމުގެ ހަޅުތާލު ކޮށްފައި ވާ ކަމަށް ވަފާ އިން ބުނެފައިވެއެެވެ.

ރާމައްﷲ ގައި ހުރެ ރިޕޯޓް ކުރަމުން އަލްޖަޒީރާގެ ރިޕޯޓަރު ބުނެފައިވަނީ އަދްނާންގެ ހަޅުތާލުގެ 80 ވަނަ އަށް ވީދުވަހު އޭނާގެ ހާލު ދެރަވަމުން ދާތީ އޭނާގެ އާއިލާ އަށް އެކަން އަންގައިފައި ވާކަމަށެވެ.

ފާއިތުވި ހަފްތާގައި އަދްނާންގެ އަންހެނުން ރަންދާ މޫސާ އޭއެފްޕީ އަށް ބުނެފައިވަނީ އަދްނާން ހުރީ ރަމްލާ ޖަލުގައި ހުރި ކްލިނިކެއް ގައި ކަމަށާއި އަދްނާން ސިވިލް ހޮސްޕިޓަލަކަށް ބަދަލު ކުރުމަށް އިޒްރާއިލުން ދެކޮޅު ހަދައިފައިވާކަމަށެވެ. އަދި އޭނާގެ ލޯޔަރުން އޭނާ އާއި ބައްދަލު ކުރުމަށްވެސް އިޒްރާއިލުން ހުރަސް އަޅައިފައިވާކަމަށެވެ.

އަދްނާންގެ މަރާއި ގުޅިގެން ފަލަސްޠީނުގެ ރައްޔިތުން ދަނީ
ހިތާމަ ފާޅު ކުރުމަށާއި އިޒްރާއިލުން ހިންގި އަނިޔާވެރި ޢަމަލާއި ދެކޮޅު ހެދުމަށް މަގުތަކަށް އެެއްވެ މުޒާހަރާވެސް ކޮށްފައެވެ.