އުފާވެރި މާލެ މެނިފެސްޓޯގެ ދަށުން ފުދުންތެރިކަން ކުޑަ ފަރާތްތަކަށް ކައުންސިލް ހައުސިންގ

ރޭ އެމްޑީޕީއިން މާލެ ސިޓީގައި ބޭއްވި ޖަލްސާގައި ތަޢާރަފްކުރި "އުފާވެރި މާލެ" މެނިފެސްޓޯގެ ދަށުން ފުދުންތެރިކަން ކުޑަ ފަރާތްތަކަށް ކައުންސިލް ހައުސިންގ ފޯރު ކޮށްދޭނެ ކަމަށް ބުނެފިއެވެ.

"އުފާވެރި މާލެ" މެނިފެސްޓޯއަކީ މާލެ ސަރަހައްދަށް ޚާއްސަ ކޮށް ކަނޑައަޅައިފައިވާ ކަންކަން ބަޔާން ކޮށްދީފައިވާ މެނިފެސްޓޯއެކެވެ.

އެމެނިފެސްޓޯގައި ވަނީ މާލީ ބުރައަކަށް ނުވާ ގެދޮރުވެރިކަން ތަޢާރަފްކުރުމާއި އެކަން ކަން ކުރުމަށް އެމްޑީޕީ ކޯލިޝަނުން ރާވައިފައިވާ ގޮތްތައް ބުނެދީފައެވެ.

އެގޮތުން މާލޭ ރައްޔިތުންނަށް ލިބުނު ބިން ތަކުގައި ގެދޮރު ޢިމާރާތް ކުރުމަށް 6 ޕަސެންޓަށްވުރެ އިންޓްރެސްޓް، 10 ޕަސެންޓް އިކުއިޓީ އިތުރުނުވާހެން ލޯނު ދޫކުރާނެ ކަމަށް ބުނެފައިވެއެވެ.

މީގެ އިތުރުން ގޭގޭގެ ބެހެނިވެރިން ދިރިއުޅުމަށް އެކަށޭނެ ޖާގައެއް ހިމެނޭވަރަށް ގެދޮރު އިމާރާތްކޮށްދީ ދިގުމުއްދަތުން ފައިސާ ދެއްކޭނެ އިންތިޒާމެއް ހަމަޖެހިގެން ދާނެ ކަމަށް ބުނެފައިވެއެވެ.

ހަމައެއާއިއެކު  ގޭގައި ދިރިއުޅުމަށް ބޭނުންވާ ފަރުނީޗަރާއި ހިފައިގެންގުޅޭ ސާމާނު ހޯދުމަށް ކްރެޑިޓް ސްކީމެއް ތަޢާރަފްކުރުމުގެ އިތުރުން، ރިއަލްއެސްޓޭޓް މާކެޓް ރެގިޔުލޭޓް ކޮށް، ކަނޑައެޅޭ މިންގަނޑަށް ގެދޮރު ޢިމާރާތްކުރާ ފަރާތްތައް ސަރުކާރުން ސެޓިފައިކޮށް ބޯހިޔާވަހިކަން  ގަންނަ ފަރާތްތަކުގެ ރައްކާތެރިކަން ކަށަވަރުކުރުން ހިމެނެއެވެ.

"އުފާވެރި މާލެ" މެނިފެސްޓޯގެ މާލީ ބުރައަކަށްނުވާ ގެދޮރުވެރިކަމުގެ ސިޔާސަތުގެ ދަށުން ދެން އައިސްފައިވަނީ ސަރުކާރުން ފޯރުކޮށްދީފައިވާ ބޯހިޔާވަހިކަމެއްގެ ބަދަލުގައި އެހެން ބޯހިޔަވަހިކަމަކަށް ބަދަލުވާން ބޭނުންނަމަ އެތަނެއްގެ މިލްކުވެރިކަން ބަދަލުކޮށް، ދައްކަން އޮންނަ މިންވަރެއް ޓްރާންސަފަރ އުސޫލުން، ސަރުކާރުން ފޯރުކޮށްދީފައިވާ ބޯހިޔާވަހިކަން ދޫކޮށްލެވޭނެ އިންތިޒާމެއް ހަމަޖައްސައިދިނުމެވެ.

މީގެ އިތުރުން ބޮޑެތި އެޑްވާންސް ތަކާއި ބޮޑެތި ކުލިތައް ދެއްކުމުގެ ބުރަކުޑަކުރުމަށް ކުލިދެއްކޭނެ ވަރުގެ އެކަކަށްވުރެ ގިނަ މީހުންނަށް ދިރިއުޅޭވޭ ވަރުގެ ތަންތަނާއި ސްޓޫޑިއޯ އެޕާޓްމެންޓްތައް ހަދައި ކުލިދައްކައި އަމިއްލަވެސް ކުރެވޭނެ މަގުފަހިކޮށްދިނުން ހިމެނެއެވެ.

ހަމަމިއާއިއެކު ފުދުންތެރިކަން ކުޑަ ފަރާތްތަކަށް އިސްކަންދީގެން ކައުންސިލް ހައުސިންގް ތަޢާރަފްކުރުމާއި މާލެ ސަރަހައްދުގައި ކުދި ތަންތަންކޮޅުގައި އުޅޭ މީހުން ޖާގަތަނަވަސް ބޯހިޔާވަހިކަމަށް ބަދަލުކުރުމުގެ ފުރުސަތު ދެވޭނެ ކަމަށް އެމެނިފެސްޓޯގައި ވެއެވެ.

މީގެ އިތުރުންވެސް މާލެ ސަރަހައްދާއި ގުޅިފައިވާ ވަޢުދުތަކެއް އުފާވެރި މާލެ މެނިފެސްޓޯގައި ވެއެވެ.