ރައީސް ނަޝީދުގެ ވެރިކަން ނިމުނު ގޮތާމެދު އަޅުގަނޑުމެން ފުންކޮށް ވިސްނަންޖެހޭ: ރައީސް ޞާލިހު

ވެރިކަމުގެ ދައުރުގެ ފަސް އަހަރު ހަމަވުމުގެ ކުރީން، ކުރީގެ ރައީސް މުހައްމަދު ނަޝީދުގެ ވެރިކަން، ނިމިގެންދިޔަ ގޮތާއި މެދު ހުރިހާ ރައްޔިތުން ވެސް ފުންކޮށް ވިސްނަންޖެހޭ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރޭ ކުރިއަށްދިޔަ އެމްޑީޕީގެ "އުފާވެރި މާލެ" ޖަލްސާގައި ވާހަކަ ދައްކަވަން ރައީސް ޞާލިހު ވިދާޅުވީ 2008 ވަނަ އަހަރުގައި އެމްޑީޕީގެ ވެރިކަމެއް ގެނެވުނީ އެތައް ބަޔަކު މަގުމައްޗަށް ނުކުމެ، އެތައް ބަޔަކު ޖަލުގެ ކުޑަ ގޮޅިތަކަށް ލެވިގެން ކަމަށެވެ. އެހެން ނަމަވެސް، ވެރިކަމަށް ވަޑައިގެންނެވިތާ ފަސް އަހަރު ނުވަނީސް އެ ވެރިކަން ނިމުމަކަށް އައި ކަން ފާހަގަކުރައްވައި ރައީސް ޞާލިހު ވަނީ އެ ވެރިކަން ނިމިގެން ދިޔަ ގޮތަކީ ހުރިހާ ދިވެހި ރައްޔިތުންވެސް ވިސްނާލަންޖެހޭ ކަމެއް ކަމަށް ވިދާޅުވެފަ އެވެ.

"(ނަޝީދުގެ ވެރިކަން) ބަދަލުވި ގޮތާއިމެދު ފުލުހުންނާއި ސިފައިން ވެސް ވިސްނާލަންޖެހޭ. އެބަދަލުވުމާއިއެކީގައި މުޅި ރާއްޖެއަށް ކުރިމަތިވި އަނިޔާވެރިކަން، ބިރުވެރިކަން، ހައްދު ފަހަނައަޅާދިޔައީ. އަނެއްކާވެސް އަޅުގަނޑުމެން މަގުމައްޗަށް ނުކުތީ. އެދުވަހު، އެ ފެށި މަސައްކަތް، އަޅުގަނޑުމެންނަށް ނިންމާލެވުނީ 2018 ވަނަ އަހަރު."

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހު ވިދާޅުވީ، ގައުމު ދެކޭ އަމާންކަން ލިބުނީ، އެފަދަ އެތައް މަސައްކަތަކުން ކަމަށާ، ކުއްލި ނުރައްކަލުގެ ހާލަތަށް އިރު އިރުކޮޅާ ގައުމު ގެންދަން ރައްޔިތުން ބޭނުން ނުވާ ކަމަށެވެ.

އަދި ހަމައެހެންމެ ގޭންގު އެކިއެކި މާރާމާރީތައް ހިންގައި، މަގުތައް ނާމާންވެގެންދާން މާލެއާއި ރާއްޖޭގެ އެއްވެސް ރައްޔިތަކު ބޭނުން ނުވާނެ ކަމަށް އެމަނިކުފާނު ވިދާޅުވި އެވެ. ސިޔާސީ ހަލަބޮލިކަމުގެ އަސަރު އެންމެ ބޮޑަށް ކުރި އެއް ބަޔަކީ މާލެ ރައްޔިތުން ކަން ފާހަގަކުރައްވައި ރައީސް ޞާލިހު ވިދާޅުވީ، މާލޭގެ ރައްޔިތުން ދެން އެދުވަސް އަނބުރާ އަންނަން ބޭނުން ނުވާނެ ކަމަށެވެ.