ސަރުކާރަކުން ދިން އެއްޗެއް ނޯންނާނެ، ހޯދީ ސަރުކާރަށް ނެގި އަމިއްލަ މުދާތައް: ޤާސިމް

އެއްވެސް ސަރުކާރަކުން ނުހައްގުން ދިން އެއްޗެއް ނޯންނާނެކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ވިދާޅުވެއްޖެ އެވެ.

ޤާސިމް އިބްރާހިމް މިފަދައިން ވިދާޅުވެފައި ވަނީ އެކި ސަރުކާރުތަކުން ޤާސިމަށް ބަދަލުގެ ގޮތުގަޔާއި، އެކި ނަންނަމުގައި ފަޅުތަކާއި ފަޅުރަށްތައް އަދި އެކި މަންފާތައް ފޯރުކޮށްދެމުންދާކަމަށް ގިނަ ތުހުމަތުތަކެއް ކުރެވޭއިރު، އެފަދަ އެއްވެސް މަންފާއެއް، އެއްވެސް ސަރުކާރެއްގައި ލިބިވަޑައިގެންފައި ވޭތޯ އާއި، ސަރުކާރުން މަންފާގެ ގޮތުގައި އެއްވެސް އެއްޗެއް ހޯއްދަވާފައިވާނެ ތޯ އައްސަވާ ރިޔާސީ ބަހުަސްގައި ކުރި ސުވާލަކަށް ޖަވާބުދެއްވަމުން ނެވެ.

އެ ސުވާލަށް ޖަވާބުދެއްވަމުން ޤާސިމް ވިދާޅުވީ 1984 ވަނަ އަހަރު ސިޔާސީ މަސައްކްތަށް ނިކުމެ ވަޑައިގަތުމުން، ސަރުކާރުގެ އެކިވަރުގެ ފިއްތުންތަކާއި ކުރިމަތިލާން ޖެހުނު ކަމަށެވެ. ސަރުކާރަކުން ހޯދި އެއްވެސް އެއްޗެއް ނޯންނާނެ ކަމަށާއި، ވިޔަފާރިއަށް އެއްވެސް އެއްޗެއް ހޯއްދަަވާފައި އޮތް ނަމަ އެއީ މީހުންގެ އަތުން ބައްލަވައިގެންފައިވާ އެއްޗެި ކަމަށް ޤާސިމް ވިދާޅުވި އެވެ.

އޭނާ ވިދާޅުވީ އިސްލާހީ މަސައްކަތަށް ނިކުމެ ވަޑައިގެން އުޅުއްވާތީ، އެފަދައިން ގަނެފައިވާ ބިންތަކާއި، ފަޅުތައް ވެސް ސަރުކާރަށް އަނބުރާ ނަގަމުން ގޮސްފައިވާކަމަށެވެ.

އެހެންކަމުން އެ މުދާ ހޯދުމަށް މަސައްކަތްޕުޅު ކުރައްވާ ކަމަށާއި، ލިބިވަޑައިގެންފައި އޮންނާނީ ސަރުކާރަށް ނަގާފައި ހުރި އޭނާގެ އަމިއްލަ މުދާ ކަމަށާއި، އެ ހޯއްދެވުމަށް ވެސް ރާއްޖޭގެ އެންމެ މަތީ ކޯޓާއި ހަމަޔަށް ގޮސްފައިވާކަމަށް ސައީދ ވިދާޅުވި އެވެ.

"އަޅުގަނޑަށް އެއްޗެހި ލިބިފައި ހުރީ މީސްމީހުން އަތުން ގަނެގެން. މާމިލިލީ އެއާޕޯޓާއި ސަން އައިލެންޑް ފިޔަވައި. އެއީ ޓެންޑަރުން ލިބުނު ތަނެއް. ދެން އެހެން ތަންތަނަކީ އަޅުގަނޑު ގަނެފައި ހުރި އެއްޗެހި. އަޅުގަނޑު އިސްލާހީ މަސައްކަތުހގައި އުޅުނީމާ އެތަންތަން އަޅުގަމޑު އަތުން އަތުލަނީ. ސަރުކާރުން ނަގަނީ. ނެގީމާ އެމައްސަލަ ޝަރީއަތަށް ގޮސްގެން ޝަރީއަތުގެ ތިން މަރުހަލާ ނިމިގެން މެނުވީ އަޅުގަނޑަށް އެއްވެސް ސަރުކާރަކުން އެއްވެސް އެއްޗެއް ދީފަކާ ނޯންނާނެ"

ޤާސިމް އިބްރާހިމް

ޤާސިމް ވިދާޅުވީ ދިވެހި ރައްޔިތުންގެ ހައްގުގައި އިސްލާހީ މަސައްކަތަށް ނިކުމެވަޑައިގަތީއްސުރެ މިހާ ހިސާބަށް އެންމެ ބޮޑު އަނިޔާއެއް ލިބި، ވަކި ފަރުދެއްގެ މުދަލަށް އެންމެ ބޮޑު ގެއްލުމެއް ލިބިފައިވާ ކެންޑިޑޭޓަކީ އެމަނިކުފާނު ކަމަށެވެ.

އެހެން ނަމަވެސް މިއަދު ވެސް އިސްލާހީ މަސައްކަތް ކުރެއްވުމަށް ނިކުމެވަޑައިގެން ހުންނަވީ ގައުމުގެ ހާލަތު ބަދަލުކޮށް، ގައުމުގެ މިނިވަންކަމާއި އިސްތިގުލާލު ހިމާޔަތްކޮށް ނެގެހެއްޓުމަށް ކަމަށް ޤާސިމް ވަނީ ވިދާޅުވެފަ އެވެ.