ކުރީގެ ފިނޭންސް މިނިސްޓަރ ޑރ އިނާޒްގެ ތާއީދު ރައީސް ޞާލިޙްއަށް
ސެޕްޓެމްބަރ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ރައީސް އިބްރާހިމް މުޙައްމަދު ޞާލިޙަށް ތާއީދު ކުރުމަށް ރައީސް މުޙައްމަދު ނަޝީދުގެ ސަރުކާރުގެ ފިނޭންސް މިނިސްޓަރުކަން ކުރެއްވެވި ޑރ އަހްމަދް އިނާޒް ނިންމަވައިފިއެވެ.
ޑރ އިނާޒް ކުރެއްވެވި ޓުވީޓެއްގައި ވިދާޅުވެފައިވަނީ ރައީސް ޞާލިޙަށް ތާއީދު ކުރައްވަނީ ގިނަ ސިޔާސީ ޕާޓީތަކާއި އެކު ކޯލިޝަން ސަރުކާރެއް ކެތްތެރިކަމާއި އެކު މަޝްވަރާގެ ނަމޫނާ ދައްކަވާފައިވާތީ ކަމަށެވެ.
ހަމަމިއާއިއެކު ލާމަރުކަޒު ކުރުމަކީ ތަރައްޤީގެ އެންމެ ބޮޑު ޕްރޮޖެކްޓް ކަން ބަހާއި އަމަލުން ދައްކަވަން ފައްޓަވާފައިވާތީ ކަމަށާއި، ސިޔާސީ ހަތުރުން ނާއި މިތުރުން ގާތުންނާއި ދުރުން ސުލްހަވެރި އެހަނަސް ވާދަވެރި ސިޔާސީ މާހައުލެއެއްގައި ރިޔާސީ ދައުރެއް ނިންމަވަމުން ގެންދަވާތީ ކަމަށެވެ.
މީގެ އިތުރުން އުދަނގޫ ސިޔާސީ، އިޤްތިސާދީ އަދި އިޖްތިމާއީ ކަންކަމުގެ ހައްލު ހޯދުމަށް ރައްޔިތުންގެ އަޑު އިއްވޭނެ މާހައުލެއް ގާއިމްކުރެވެމުން ދާތީ ކަމަށް ޑރ އިނާޒް ވިދާޅުވެފައިވެއެވެ.
ޑރ އިނާޒް އެންމެ ފުރަތަމަ ސިޔާސީ ދާއިރާއިން ފެނިގެން ގޮސްފައިވަނީ ރާއްޖޭގައި އެންމެ ފުރަތަމަ ބޭއްވުނު މަލްޓި ޕާޓީ ރިޔާސީ އިންތިޚާބުގައި ޖުމްހޫރީ ޕާޓީގެ ރިޔާސީ ކެންޑިޑޭޓުގެ ރަނިންގމޭޓެއްގެ ގޮތުގައި 2008ވަނަ އަހަރުއެވެ.
ދެވަނަ ބުރުގައި އިދިކޮޅުން ބޮޑު ކޯލިޝަނަކާއި އެކު އޭރުގެ ރައީސް ރައީސް މައުމޫން ޢަބްދުލް ޤައްޔޫމް އާއި ވާދަކޮށް އިންތިޚާބު ކާމިޔާބު ވުމުން ރައީސް ނަޝީދުގެ ދައުރުގައި ޑރ އިނާޒް ވަނީ ފިނޭންސް މިނިސްޓަރުކަން ކުރައްވައިފައެވެ.
މިހާރު އިނާޒް ހުންނެވީ ޕެންޝަން އެޑްމިނިސްޓްރޭޓިވް ބޯޑުގެ ޗެއަރމަންއަކަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
