އުރީދޫ މަސްރޭސް 2023 ގައި ބައިވެރި ވުމުގެ ފަހު ފުރުސަތު!

ކޮންމެ އަހަރަކު އުރީދޫ މޯލްޑިވްސް އިން ބާއްވަމުން އަންނަ މަސްވެރިކަމުގެ މުބާރާތް "އުރީދޫ މަސްރޭސް 2023" ގައި ބައިވެރިވުމުގެ ފަހުގެ ފުރުސަތެއްގެ ގޮތުން 8 ޖުލައިގެ ނިޔަލަށް މުއްދަތު އިތުރުކޮށްފިއެވެ.

މިކަމާއި ގުޅިގެން އުރީދޫއިން ނެރެފައިވާ ބަޔާނުގައި ބުނެފައިވަނީ އުރީދޫގެ 18 ވަނަ އަހަރީ ދުވަސް ފާހަގަކުރުމުގެ ގޮތުން އޯގަސްޓް މަހު ބޭއްވުމަށް ހަމަ ޖެހިފައިވާ މި މަސްރޭސް މުބާރާތް ވެގެން ދާނީ ރާއްޖޭގައި ބޭއްވޭ އެންމެ ބޮޑު އަދި އެންމެ ކުލަ ގަދަ މަސްވެރިކަމުގެ މުބާރާތަށް ކަމަށެވެ.

އެހެން އަހަރުތަކާ ހިލާފަށް މި އަހަރުގެ މަސްރޭސް މާލެ ސިޓީ، ކުޅުދުއްފުށި ސިޓީ، ފުވައްމުލައް ސިޓީ އަދި އައްޑޫ ސިޓީ ހިމެނޭގޮތަށް ރާއްޖޭގެ ހަތަރު ސިޓީއެއްގައި ކުރިއަށް ގެންދިއުމަށް ވަނީ ހަމަޖެހިފައެވެ.

މިސިޓީތަކުގެ އެކި ކަންކޮޅުތަކުން ޝައުގުވެރިވާ ފަރާތްތަކުން މިމަހުގެ 8 ގެ ކުރިން http://ore.do/masrace ޕޯޓަލް މެދުވެރިކޮށް ޓީމް ރަޖިސްޓްރީ ކުރެވޭނެއެވެ.

އުރީދޫއިން ވަނީ ރަޖިސްޓްރޭޝަން ފޯމް ހުށަހަޅާއިރު ޓީމުގެ ކޮންމެ ބައިވެރިއަކަށް 150 ރުފިޔާއަށް މަސްރޭސް ކިޓް މޫލީ މެދުވެރިކޮށް ގަނެވޭނެ ކަމަށް ބުނެފައެވެ. މި މަސްރޭސް ކިޓުގައި ހިމެނޭނީ މަސްރޭސް ކޯރީ އާއި ޓީޝާޓެވެ.

މިއާއިއެކު ކޮންމެ ޓީމެއްގައި ކެޕްޓަނާއި އޮފިޝަލުން ހިމެނޭ ގޮތަށް 12 މެމްބަރުން ތިބެންވާނެ ކަމަށް އުރީދޫއިން ވަނީ ފާހަގަކޮށްފައެވެ.

މި މުބާރާތުގައި ޖުމްލަ 160،000 ރުފިޔާގެ އިނާމު ދިނުމަށް ހަމަޖެހިފައިވާއިރު، އޭގެ ތެރޭއިން ކޮންމެ ސިޓީއަކުން ތިރީގައިވާހެން ފައިސާގެ އިނާމު ލިބިގެންދާނެއެވެ.

● އެއްވަނަ ޓީމް: 25،000 ރުފިޔާ

● ދެ ވަނަ ޓީމް: 10،000 ރުފިޔާ

● 3 ވަނަ ޓީމް: 5000 ރުފިޔާ

● އެންމެ މޮޅު މަސްވެރިޔާ: 1000 ރުފިޔާ

● އެންމެ މޮޅު ފިޝަރވުމަން: 1000 ރުފިޔާ

މި މުބާރާތް ފެށުމަށް ހަމަޖެހިފައިވަނީ އެކި ސިޓީތަކުގައި ތިރީގައި މިވާ ތާރީޚުތަކުގައެވެ.

● މާލެ ސިޓީ: 4 އޮގަސްޓް

● ކުޅުދުއްފުށި ސިޓީ: 11 އޮގަސްޓް

● އައްޑޫ ސިޓީ: 18 އޮގަސްޓް

● ފުވައްމުލައް ސިޓީ: 25 އޮގަސްޓް

އުރީދޫއިން އިތުރަށް ބުނެފައިވަނީ މަސްރޭސް 2023 ގައި ކޮންމެ ސިޓީއަކުން ވެސް އެންމެ މަދުވެގެން 12 ޓީމު ބައިވެރިވާއިރު ގިނަވެގެން 30 ޓީމު ވާދަކުރާނެ ކަމަށެވެ.

އަދި 30 ޓީމަށް ވުރެ ގިނައިން ރެޖިސްޓަރ ވެފައިވާ ނަމަ ބައިވެރިވާ ޓީމުތައް ހޮވުމަށް ޑްރޯއެއް ކުރިއަށް ގެންދިއުމަށް ހަމަޖެހިފައިވާ ކަމަށް އުރީދޫއިން ވަނީ ބުނެފައެވެ. އަދި ނުހޮވޭ ޓީމުތަކަށް ފުލް ރިފަންޑް ލިބޭނެ ކަމަށްވެސް ވަނީ ބުނެފައެވެ.

އުރީދޫ މަސްރޭސް 2023 ގައި ސަރުކާރުގެ މުއައްސަސާތަކާއި ކޯޕަރޭޓްތަކާއި އާންމުން ބައިވެރިވުމަށް އުރީދޫ މޯލްޑިވްސް އިން ވަނީ މަރުހަބާ ކިިޔާފައެވެ.