ލެންސް އަތުން ބަލިވެ، ގްރޫޕް ބީގެ އެއްވަނަ މަގާމު އާސެނަލްއަށް ގެއްލިއްޖެ

ޔުއެފާ ޗެމްޕިއަންސްލީގުގެ ގްރޫޕް ބީގައި ރޭ ރަށުން ބޭރުގައި ފްރާންސްގެ ލެންސް އަތުން 2-1 ގެ ނަތީޖާއަކުން ބަލިވެ އާސެނަލް އަށް ގްރޫޕްގެ އެއްވަނަ މަގާމު ގެއްލިއްޖެ އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އާސެނަލް އިންނެވެ. މިލަނޑު ފުރަތަމަ ހާފުގެ 14 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ ފޯވާޑް ގެބްރިއަލް ޖީސަސް އެވެ. މިއީ އެޓީމުގެ އިގިރޭސި ފޯވާޑް ބަކަޔޯ ސަކާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ލެންސް އިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 25 ވަނަ މިނެޓުގައި ކާމިޔާބުކޮށްދިނީ ފްރާންސްގެ މިޑްފީލްޑަރު އެޑްރިއަން ތޮމަސަން އެވެ. މިއީ އެޓީމުގެ ޒުވާން ފޯވާޑް އެލީ ވަހީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިމެޗުގައި ލެންސް އިން ފުރަތަަމަ ފަހަރަށް ލީޑު ހޯދި ލަނޑު ދެވަނަ ހާފުގެ 69 ވަނަ މިނެޓުގައި ކާމިޔާބުކޮށްދިނީ ޒުވާން ފޯވާޑް އެލީ ވަހީ އެވެ.

ލެންސްގެ ލަނޑަށްފަހު އާސެނަލް އިން ކުރިއަށްޖެހި ލަނޑެއްޖެހޭތޯ ވަރަށް މަސައްކަތް ކުރި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން ލެންސް ކުރީގައި އޮވެގެންނެވެ.

މިއީ ޗެންޕިްއަންސް ލީގުގެ ގްރޫޕް ސްޓޭޖުގައި އާސެނަލް އެންމެ ފަހުން ކުޅުނު 10 މެޗުގެ ތެރެއިިން ބަލިވި ފުރަތަމަ މެޗެވެ. އަދި މިމެޗުން ބަލިވެ އާސެނަލް އަށް ގްރޫޕްގެ އެއްވަނަ މަގާމު ގެއްލުނުއިރު، މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ހަތަރު ޕޮއިންޓް ހަމަކޮށް ގުރޫޕްގެ އެއްވަނައިގައި މިވަގުތު އޮތީ ލެންސް އެވެ.