ފަހަތުން އަރައި ކޯޕަންހޭގަން ބަލިކޮށް ބަޔާން އިން ގުރޫޕްގެ އެއްވަނައިގައި ހަމަޖެހިލައިފި

ޔުއެފާ ޗެމްޕިއަންސްލީގުގެ ގްރޫޕް އޭގައި 2-1 ގެ ނަތީޖާއަކުން ކޯޕަންހޭގަން ބަލިކޮށް ގުރޫޕްގެ އެއްވަނައިގައި ބަޔާން މިއުނިކުން ހަމަޖެހިލައިފި އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ ކޯޕަންހޭގަން އިންނެވެ. އެގޮތުން ދެވަނަ ހާފުގެ 56 ވަނަ މިނެޓުގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މިލަނޑު އެޓީމަށް ކާމިޔާބުކޮށްދިނީ ޑެންމާކްގެ މިޑްފީލްޑަރު ލޫކަސް ލެރާގާ އެވެ.

ބަޔާން މިއުނިކް މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 67 ވަނަ މިނެޓުގައި ކާމިޔާބުކޮށްދިނީ ޒުވާން މިޑްފިލްޑަރު ޖަމާލު މުސިއާލާ އެވެ. އަދި އެޓީމު މިމެޗުން މޮޅުވި ލަނޑު ދެވަނަ ހާފުގެ 83 ވަނަ މިނެޓުގައި ކާމިޔާބުކޮށްދިނީ ޒުވާން ފޯވާޑް މެތީސް ޓެލް އެވެ. މިއީ އެޓީމުގެ ތަޖުރިބާކާރު މިޑްފިލްޑަރު ތޯމަސް މުލާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން ބަޔާން މިއުނިކް ކުރީގައި އޮވެގެންނެވެ. އަދި މިއީ ޗެންޕިްއަންސް ކަޕްގެ ގްރޫޕް ސްޓޭޖުގައި އެޓީމުން ބަލިނުވެ ފުރިހަމަކުރި 33 ވަނަ މެޗެވެ. އޭގެތެރެއިން 30 މެޗުން މޮޅުވެފައިވާ އިރު ތިން މެޗު ނިމުނީ އެއްވަރުވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު ދެ މެޗުން ވެސް މޮޅުވެ ގްރޫޕްގެ އެއްވަނައިގައި މިވަގުތު އޮތީ ބަޔާން މިއުނިކް އެވެ. އަދި މިމެޗުން ބަލިވި ކޯޕަންހޭގަން ކުޅުނު ދެ މެޗުން ލިބުނު އެއް ޕޮއިންޓާއެކު އެޓީމު މިވަގުތު އޮތީ ގްރޫޕްގެ ތިންވަނައިގައެވެ.