ބުޅަލަށް އަނިޔާކުރުން ފޮއްދޫގައި އާންމުވެ، އެކަން ހުއްޓައިލުމަށް ކައުންސިލުން އަންގައިފި

ބުޅަލަށް އަނިޔާކުރުން ށ. ފޮއްދޫގައި އާންމުވެ، އެކަން ހުއްޓައިލުމަށް އެ ރަށު ކައުންސިލުން މިއަދު އަންގައިފިއެވެ.

ފޮއްދޫ ކައުންސިލުން ނެރުނު އިއުލާނެއްގައި، އެ އިދާރާއިން ވަނީ ރަށުގައި އުޅޭ ބުޅާތަކަށް ބައެއް ފަރާތްތަކުން އަނިޔާކޮށް ފުރާނައަށް ގެއްލުންދެމުންދާ ކަމުގެ ޝަކުވާތައް މިފަހަކަށް އައިސް ލިބެމުން އަންނަ ކަމަށް ބުނެފައެވެ. އެގޮތުން ކައުްނސިލުން ވަނީ އެކަން ވަނީ އެ ރަށު ކައުންސިލުން ހަރުކަށި އިބާރާތުން ކުށްވެރިކޮށްފައެވެ.

މީގެ އިތުރުން، ބުޅަލަށް އަނިޔާކުރުމާއި އޭގެ ފުރާނައަށް ގެއްލުންދިނުމަކީ ގާނޫނީ ގޮތުން ކުށެއް ކަމަށް ކައުންސިލުން ފާހަގަކޮށް، މިފަދަ އަމަލުތައް ހިންގާ ފަރާތްތަކާމެދު ގާނޫނީ ފިޔަވަޅު އަޅާނެ ކަމުގެ އިންޒާރު އެ އިދާރާއިން ވަނީ ދީފައެވެ.

ކައުންސިލުން ބުނެފައިވާ ގޮތުގައި، މިފަދަ އަމަލުތަކަކީ އެއްވެސް ވަރަކަށް ބަލައިގަނެވޭނެ ކަންކަމެއް ނޫނެވެ. އެހެންކަމުން، މިފަދަ އަމަލުތައް ނުހިންގުމަށް ރަށުގެ އެންމެހާ ފަރާތްތަކަށް ކައުންސިލުން ވަނީ ނަސޭހަތްތެރިވެފައެވެ.

މީގެ އިތުރުން، ޖަނަވާރު އޮޅުކޮށްގެން ގެންގުޅޭ ފަރާތްތަކުން އާންމު ރައްޔިތުންނަށް އުނދަގޫ ނުވާގޮތަށް ގެންގުޅުމަށް ކައުންސިލުން ވަނީ އިރުޝާދުދީފައެވެ. އަދި ޖަނަވާރަށް ކާންދޭން ބޭނުންވާ ފަރާތްތަކުން އެކަން ކުރަންޖެހޭނީ ހަމައެކަނި ގްރީން ހައުސް ސަރަހައްދުގައި، ލޯކަލް ބީޗާ ކައިރިނުވާ ސަރަހައްދެއްގައި ކަމަށް ވެސް ކަނޑައަޅާފައިވެއެވެ.

ހަމައެއާއެކު، އާންމު އިޖުތިމާއީ ސަރަހައްދުތަކާއި، މީހުންގެ ގެވަޅުތަކާއި، އަދި ފަޅުގޯތި ގޯއްޗަށް ކާން އެޅުމަކީ މަނާކަމެއް ކަމަށް ކައުންސިލުން ވަނީ އަންގާފައެވެ. މި އުސޫލާ ހިލާފުވާ ފަރާތްތަކާމެދު ވެސް ފިޔަވަޅު އެޅޭނެ ކަމަށާއި، މިފަދަ ކަންކަމުގައި ރައްޔިތުންގެ ފަރާތުން ލިބެމުންދާ އެއްބާރުލުމަށް ކައުންސިލުން ވަނީ ޝުކުރު އަދާކޮށްފައެވެ.