"ލާދީނީ ކަމާމެދު އިންޒާރު ދިން މީހުންގެ ދިފާއުގައި، މަރުދޭން ޖެހޭނެ ކަމަށް ގަބޫލު ކުރަނީ ކާކުހެއްޔެވެ؟"
އެބައެއްގެ ލާދީނީ ކަމާމެދު އެހެން މީހުންނަށް އިންޒާރު ދިނުމަށްފަހު، އެ މީހުންގެ ދިފާއުގައި، އެމީހުންނަށްޓަކައި މަރުދޭން ޖެހޭނެ ކަމަށް ގަބޫލު ކުރާނީ ކާކުތޯ ދާރިސް ޓީވީ ގެ ސްޓޭޝަން މެނޭޖަރު ޢަލީ ރަމީޒު ސުވާލު ކުރައްވައިފިއެވެ.
ޢަދާލަތު ޕާޓީން ރައީސް ޞާލިހަށް ކެންޕެއިން ކުރުމުގައި ފޯރީގައި މަސައްކަތް ކުރަމުންދާ މި ދަނޑިވަޅުގައި، ޢަލީ ރަމީޒު ކުރެއްވި ޓްވީޓެއްގައި ވިދާޅުވީ، އެ ޕާޓީގެ މެންބަރުންނަކީ، އެމްޑީޕީގެ ނުރައްކާތެރި ކަމާއި، ނުބައި، ކަމާއި، އަދި ލާދީނީ ކަމުގެ މައްޗަށް ރައްޔިތުންނަށް އިންޒާރުދިން ބައެއް ކަމަށެވެ.
އަދި އެމްޑީޕީގެ ކިބައިން ބަރީޢަވެ ތިބުމަށް ރައްޔިތުންގެ ކިބައިން އެދި ރޮއި އާދޭސް ކުރި ބައެއް ކަމަށްވެސް އަލީ ފާހަގަކުރެއްވިއެވެ.
އެހެންނަމަވެސް، މިއަދު ފެންނަމުންދާ މަންޒަރު ތަފާތު ކަމަށާ، މިއަދު އަމިއްލަ ޕާޓީއަށްވުރެވެސް އަދާލަތުން ދިފާއު ކުރަމުންދަނީ އެމްޑީޕީ ކަމަށާ، އެމްޑީޕީގެ ދިފާއުގައި އަދާލަތުން މަރުދެމުންދާއިރު، އެފަދައިން ކަން ކުރަން ޖެހޭނެ ކަމަށް ގަބޫލު ކުރާނީ ކާކުތޯ ޢަލީ ވަނީ ސުވާލު ކުރައްވާފައެވެ.
ރާއްޖޭގެ ވެރިކަން ކުރާ މައި ޕާޓީ، އެމްޑީޕީ އަކީ ލާދީނީ ޕާޓީ އެއް ކަމަށް ބުނެ، އެންމެ އަޑު ހަރުކޮށް ކުރީން ވާހަކަ ދެއްކި ޕާޓީ އަކީ އަދާލަތު ޕާޓީއެވެ. އެގޮތުން އެއީ އިސްލާމް ދީނާއި ބީރަށްޓެހި ސިޔާސަތު ތަކެއް ގެންގުޅޭ ލާދީނީ ޕާޓީއެއް ކަމަށް ބުނެ، އެ ޕާޓީއާ ދުރުވުމަށް ވެސް އެންމެ ވަކާލާތު ކުރީ އެ ޕާޓީން ނެވެ.
އެހެންނަމަވެސް މިހާރު ފެނިގެން ދަނީ އެމްޑީޕީީ އާއި އެކު އަދާލަތުން ކޯލިޝަން ހަދައި، އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދު ކުރަން ނިންމައި، އެމަނިކުފާނަށް ފޯރީގައި އަންނަނީ ކެންޕެއިން ކޭންދެމުންދާ މަންޒަރެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
