ޕީޕީއެމާއި، އެމްޑީޕީއަށް މިއަދު ސޮއި ކުރިޔަސް އެދެޕާޓީގެ ރައީސް ކަމަށް އަންނަން ނަގާނީ 1 އަހަރު: ގާސިމް

އިދިކޮޅު އެންމެ ބޮޑު ޕާޓީ، ޕީޕީއެމާއި ވެރިކަންކުރާ މައި ޕާޓީ، އެމްޑީޕީއަށް މިއަދު ސޮއި ކުރެއްވި ނަމަވެސް އެ ދެޕާޓީގެ އެންމެ އުހާއި ހަމައަށް ދާން ނަގާނީ 1 އަހަރު ކަމަށް ޖުމްހޫރީޕާޓީގެ ލީޑަރ އަދި ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.

ގދ ތިނަދޫގައި ރޭ ބޭއްވި ކެންޕެއިން ޖަލްސާގައި ވާހަކަ ދައްކަވަމުން ގާސިމް ވިދާޅުވީ އެމަނިކުފާނު ޑީއާރުޕީގެ ނާއިބު ކަމުގައި ހުންނެވި އިރު، އަދު ވެރިކަންކުރާ މައި ޕާޓީ، އެމްޑީޕީ އެންމެ ހާލުގައި ޖެހުނު ދުވަހު އެހީވެވަޑައިގެންފައިވާ ކަމަށެވެ.

އެގޮތުން އެޕާޓީގެ ކޮންފަރެންސް އެއް ބޭއްްވުމަށް 3 ލައްކަ ރުފިޔާ ދެއްވާފައިވާ ކަމަށް އޭނާ ވިދާޅުވި އެވެ. އޭގެ ފަހުންވެސް، މަހަކު 50,000 ރުފިޔާ ގިނަ ދުވަސްތަކެއް ވަންދެން އެ ޕާޓީއަށް ދީފައިވާ ކަމަށް ގާސިމް ވިދާޅުވި އެވެ. އަދި އެކަންކަން ކުރެއްވީ ޑިމޮކްރަސީ "މަރާލަން" ބޭނުން ނުވާތީ ކަމަށްވެސް އޭނާ ވިދާޅުވި އެވެ.

މީގެ އިތުރުން، ޕީޕީއެމް އުފެއްދެވުމުގައި ވެސް އެމަނިކުފާނުގެ ދައުރު އޮންނާނެ ކަމަށް ގާސިމް ވިދާޅުވި އެވެ. އެގޮތުން، އެ ޕާޓީ އުފެއްދެވުމަށް ކުރީގެ ރައީސް މައުމޫން އަބްދުލްގައްޔޫމް އާއި އެމަނިކުފާނުގެ އެއްބަފާ ކޮއްކޮ އަދި ކުރީގެ ރައީސް ޔާމީން އަބްދުލްގައްޔޫމް އަށް ލަފާ އެރުއްވި ކަމަށާ، އެ ލަފާގެ މަތިން އެ ޕާޓީވެސް އުފެދިގެން ދިޔަ ކަމަށް ގާސިމް ވިދާޅުވި އެވެ.

‏"އޭރުވެސް، މިއަދުވެސް، އެމްޑީޕީއަށް ވިޔަސް، އަޅުގަނޑު ވެރިކަމަށް އަންނަން ބޮޑު ޕާޓީއަކަށް ވަންނަން ބޭނުންނަމަ އަޅުގަނޑު އެތަނަށް ވަދެފަ ކިތައް މަސްދުވަސްތޯ އަޅުގަނޑު ވާނީ އެތާންގެ އެންމެ ޓޮޕް މަގާމަށް އަންނަން. އެެންމެ ގިނަވެގެން އެއް އަހަރު. އެޕާޓީގެ ރައީސަކަށް އަޅުގަނޑު ހުންނާނީ. ކަށަވަރުކޮށްފަ މި ދެންނެވީ. އެކަން ބޭނުންނުވީ ޑޮމްކްރެޓިކް ޕްރޮސެސް ހަލާކުކޮށްކަން ބޭނުން ނުވާތީ. ފުނޑާލަން ބޭނުން ނުވާތީ."

ގާސިމް އިބްރާހިމް

"....ޕީޕީއެމްއަށް މިއަދު ސޮއިކުރިޔަސް އަޅުގަނޑު އެއް އަހަރު ދުވަހުގެ ތެރޭގައި ހުންނާނީ ޕީޕީއެމްގެ ރައީސަކަށް. ޔާމީން އަަބްދުލް ގައްޔޫމް އޮންނަން ޖެހޭނީ ފަތަފަތާ. ހަމައެގޮތަށް އެމްޑީޕީއަށް މިއަދު ސޮއިިކުރިޔަސް އެއް އަހަރުވުމުގެ ކުރިން މާތް الله ގެ ވާގިފުޅާއެކު ހުންނާނީ އެކެއްގަ." ގާސިމް އިބްރާހިމް ވިދާޅުވި އެވެ.

ގާސިމް ވިދާޅުވީ، އެމަނިކުފާނުގެ އަމިއްލަ ޕާޓީގައި ހުންނެވީ، އެފަދައިން ކަންކަން ވާން ބޭނުން ނުވާތީ ކަމަށެވެ. އަދި އެޕާޓީގައި ހުންނަވަނީ، ކޮންމެ ކަމެއްގައިވެސް ހަމަހަމަ އުސޫލެއް ބެހެއްޓުމަށް ކަމަށް އެމަނިކުފާނު ވިދާޅުވި އެވެ.