"ރައީސެއްގެ ހުންނަންޖެހޭ ހުރިހާ ސިފައެއް ގާސިމްގެ އެބަހުރި؛ އެއީ މިހާރުވެސް ކުޑަކުޑަ ސަރުކާރެއް ހިންގަވާ ބޭފުޅެއް"
ޖުމްހޫރީ ޕާޓީގެ ލީޑަރު ގާސިމް އިބްރާހިމް އަކީ މީހާރުވެސް ކުޑަ ކުޑަ ސަރުކާރެއް ހިންގަވަމުން އަންނަ ބޭފުޅެއް ކަމަށް އެމަނިކުފާނުގެ ސްޕެޝަލް އެޑްވައިޒަރ ޑރ އަބްދުالله ޖިހާދު ވިދާޅުވެއްޖެއެވެ.
ތިނަދޫގައި ރޭ ބޭއްވި ކެންޕެއިން ޖަލްސާގައި ވާހަކަ ދައްކަވަމުން ޖިހާދު ވިދާޅުވީ، ގާސިމް ފިނޭންސް މިނިސްޓަރ ކަމުގައި ހުންނެވިއިރު، އެމަނިކުފާނުގެ އަރިއަހުގައި ގިނަ ދުވަސްތަކެއް ވަންދެން މަސައްކަތް ކުރެއްވުމުގެ ފުރުސަތު ލިބިލެއްވި ކަމަށެވެ.
އަދި މިހާތަނަށް ވެސް އޭނާ މަސައްކަތް ކުރެއްވި ލީޑަރުންގެ ތެރެއިން، އެންމެ ވިސްނުންތޫނު، އެންމެ ހީވާގި އަދި އެންމެ ހުރިހާ ގޮތަކުންވެސް އެންމެ ރަނގަޅު ލީޑަރަކީ ގާސިމް ކަމަށެވެ.
"އެމަނިކުފާނަކީ ހީވާގި މުރާލި، އަދި ކެތްތެރި، އޯގާތެރި ހިތްތިރި އަދި ރައީސެއްގައި ހުންނަންޖެހޭ ހުރިހާ ސިފަތަކެއް ފުރިހަމަ ބޭފުޅެއް. ކުރިމަތިލާފައި ހުރި އެއްވެސް ބޭފުޅެއްގެ އެ ސިފަތަކެއް ނެތް އަޅުގަނޑު ބެލިއިރު. އަދި ޓްރެކް ރެކޯޑަށް ބެލިކަމުގައި ވިޔަސް، އެމަނިކުފާނަކީ މި އެއްވެސް ކެންޑިޑޭޓަކު އަރާ ހަމަކުރެވޭނެ ބޭފުޅެއް ނޫން."
އަބްދުالله ޖިހާދު
ޖިހާދު އިތުރަށް ވިދާޅުވީ، ގާސިމް އިބްރާހިމް އަކީ މިހާރުވެސް ކުޑަކުޑަ ސަރުކާރެއް ހިންގަމުން ކަމަށެވެ. އެގޮތުން، ސަރުކާރަކުން ކުރަންޖެހޭ ހުރިހާ ކަމެއް އެމަނިކުފާނު ރައްޔިތުންނަށްޓަކައި ކޮށްދެއްވަމުންދާ ކަމަށް ޖިހާދު ވިދާޅުވި އެވެ. އެހެންކަމުން އެމަނިކުފާނަށް ވޯޓު ދިނުމަކީ ރައްޔިތުން އެކަމާއި ހިތާމަ ކުރަންޖެހޭނެ ކަމަކަށް ނުވާނެ ކަމަށް ޖިހާދު ވިދާޅުވި އެވެ.
"އެމަކިނުފާނަކީ މިހާރުވެސް ކުޑަކުޑަ ސަރުކާރެއް ހިންގަވާ ބޭފުޅެއް. މިހާރުވެސް ސަރުކާރުންދޭ ހުރިހާ ހިދުމަތްތަކެއް އަމިއްލަފުޅަށް، އަމިއްލަފުޅު ހަރަދުގައި ހުރިހާ ހިދުމަތްތަކެއް ދެއްވާ. އެކަހަލަ ބޭފުޅަކަށް ގައުމު ހިންގޭނީ. އެހުރިހާ ތަޖުރިބާއާއި އެކީގަ. އެެހެންވީމާ މިފަހަރު ހުރިހާ ދިވެހި ރައްޔިތުން ނަމްބަރު ފަހަކަށް ވޯޓު ދެއްވާ. އެއްވެސް ބޭފުޅަކު ހިތާމަކުރާކަށް ނުޖެހޭނެ." ޖިހާދު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
