ޒާތީ މައުލޫމާތުތައް ހުއްދަ ނެތި ބޭނުންކުރާ މައްސަލަ ތަހުގީގުކުރުމަށް އިދިކޮޅުން ގޮވާލައިފި

ރައްޔިތުންގެ ޒާތީ މައުލޫމާތުތައް ހުއްދަނެތި ސަރުކާރު ހިންގާ މައި ޕާޓީ އެމްޑީޕީއިން ބޭނުން ކުރަމުންދާތީ އެމައްސަލަ ތަހުގީކޮށްދިނުމަށް އިދިކޮޅު ޕީޕީއެމް/ޕީއެންސީއިން ގޮވާލައިފިއެވެ.

އެކޯލިޝަނުން ރޭ ނެރުނު ބަޔާނެއްގައިވަނީ ދައުލަތުގެ ވަޞީލަތްތައް ބޭނުންކޮށްގެން ދިވެހީންގެ ޒާތީ މަޢުލޫމާތުތައް އެއްކޮށް 2023 ވަނަ އަހަރުގެ ރިޔާސީ އިންތިޚާބުގެ ކެމްޕެއިން ބޭނުމަށްޓަކައި މޯލްޑިވިއަން ޑިމޮކްރެޓިކް ޕާޓީ (އެމް.ޑީ.ޕީ) އިން ޑޭޓާބޭސްއެއް އެކުލަވާލާފައިވާކަމަށް ދެކެވޭ ވާހަކަތަކާ ގުޅިގެން އެކަން ކުށްވެރިކޮށް އެކަމާ ކަންބޮޑުވުން ފާޅުކޮށްފައެވެ.

އަދި މި ވާހަކަ އަކީ ތެދުކަމަށްވާނަމަ، މިކަމަކީ ދިވެހިރާއްޖޭގެ ޤާނޫނު އަސާސީގެ 24 ވަނަ މާއްދާއިން ކަށަވަރުކޮށްދީފައިވާ ޒާތީ ޙިމާޔަތާއި ރައްކާތެރިކަން ނިގުޅައިގަތުމުގެ ޢަމަލެއްކަމަށް އިދިކޮޅުން ތުހުމަތު ކޮށްފައިވެއެވެ.

މީގެ އިތުރުން ޑިމޮކްރެޓިކް ވެއްޓެއްގައިނަމަ، ޒާތީ ރައްކާތެރިކަމަކީ އަސާސީ ޙައްޤެއްކަމަށާއި، ކޮންމެ މީހަކަށްމެ އެމީހަކު ބޭނުންވާގޮތަކަށް ސިޔާސީ ނިންމުންތައް ނިންމުމުގެ އިޚްތިޔާރު ލިބިދޭންޖެހޭނެކަމަށާއި، ދިވެހިންގެ ޒާތީ ޙައްޤުތަކަށް ވެރިކަން ކުރާ ޕާޓީން އަރައިގެންފައިވުމަކީ ހަމައެކަނި އަސާސީ ޙައްޤަކަށް އަރައިގަތުން ނޫންކަމަށެވެ. މިކަމުން ދޭހަކޮށްދެނީ ޑިމޮކްރެޓިކް އުޞޫލުތަކާއި އަސާސްތަކަށްވެސް އެއްވެސް މިންވަރަކަށް ޙުރުމްތަތްރިކޮށް ހިތާފައިނުވުންކަމުގައިވެސް އެ ކޯލިޝަނުގެ ބަޔާނުގައި ވެއެވެ.

އެހެންކަމުން މިކަމާ ގުޅޭ ތަޙްޤީޤެއް ކުރެވި މިތުހުމަތުތަކުގެ އަޞްލާ ހަމައަށް ވާޞިލްވެވެންދެންވެސް، އެންމެ މަތިވެރި ސުލޫކީ މިންގަނޑުތަކުގައި ހިފެހެއްޓުމަށާއި ޤާނޫނުތަކަށް ޙުރުމަތްތެރިކޮށް ހިތުމަށް ދިވެހިރާއްޖޭގައި ޙަރަކާތްތެރިވާ ހުރިހާ ސިޔާސީ ޕާޓީތަކާއި، މިކަމުގައި ޝާމިލްވާ އެންމެންގެ ކިބައިން އެދޭކަމަށް ވެސް އިދިކޮޅުގެ މިބަޔާނުގައިވެއެވެ.

އަދި މިފަދަ ކަމެއްގެ ތުހުމަތު ކުރެވިއްޖެނަމަ އެކަން ތަޙްޤީޤުކުރެވޭނެކަމުގެ ޔަޤީންކަމާއި އެންމެހާ ދިވެހިންނަށް ޙިމާޔަތާއި ރައްކާތެރިކަން ކަށަވަރުވެފައިވާކަން އަންގައިދިނުމަށްޓަކައިވެސް މިކަން ތަޙްޤީޤިކުރުމަކީ ކޮންމެހެން ކުރަންޖެހޭ ކަމެއްކަމަށް އިދިކޮޅުން ވަނީ ގޮވާލައިފައެވެ.