ވެރިކަމަށް އިންތިޚާބުވެ ވަޑައިގެންނެވުމުގެ ކުރިން ގާސިމްގެ ރިޔާސީ ވައުދެއް ފުއްދަވައިފި!

ކީރިތި ގުރުއާނުގެ ތަފްސީރުގެ ދިވެހި ތަރުޖަމާއެއް، ނެރުއްވުމަށް ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ވެވަޑައިގެންނެވި ވަޢުދު، ވެރިކަމަށް އިންތިޚާބުވެ ވަޑައިގެންނެވުމުގެ ކުރިން ފުއްްދަވައި ދެއްވައިފިއެވެ.

ޤާސިމްގެ މެނިފެސްޓޯގައި، އިސްލާމީ ޝަހުސިއްޔަތާއި ގައުމިއްޔަރު ވަރުގަދަކުރުމަށް 16 ވައުދެއް ހިމަނާފައިވާއިރު،  އޭގެތެރެއިން އެއް ވައުދަކީ، ދެ އަހަރުގެ ތެރޭގައި ގުރުއާން ތަފްސީރު، ދިވެހި ބަހުން ޝާއިއުކުރުމުގެ ވައުދެވެ.

އެ ވައުދު ވެރިކަމަށް ވަޑައިގެންނެވުމުގެ ކުރިން ފުއްދަވައި ދެއްވައި "ބަޔާންވެގެންވާ ފަސޭހަ ތަފްޞީރު" ގެ ނަމުގައި، ކީރިތި ޤުރުޢާނުގެ ތަރުޖަމާއާއި، ތަފްޞީރުގެ މައްޗަށް އެކުލެވޭ ވެބް ވާޝަން އެއް ރޭ ވަނީ، އިފްތިތާހުކޮށްދެއްވާފައެވެ. އަދި ކުރިއަށް އޮތް ދުވަސްތަކުގެ ތެރޭގައި 50،000 ހާޑް ކޮޕީ ޕްރިންޓު ކުރައްވައި، އާންމުންނާ ހަމައަށް ފޯރުކޮށްދެއްވާނެ ކަމަށްވެސް ގާސިމް ވަނީ ވިދާޅުވެފަ އެވެ.

ވެބް ވާޝަނެއްގެ ގޮތުގައި އެ ފޮތް ފުރަތަމަ ނެރުމަށް ނިންމެވީ ޗާޕު ކުރާއިރު، އެއްވެސް ކުށެއް އޭގައި ނުބޭއްވުމުގެ މާތް އަޒުމުގައި ކަމަށް ވެސް ގާސިމް ވިދާޅުވި އެވެ. އެއީ ވެބް ވާޝަން ލޯންޗު ކުރުމުން އޭގައި އެއްވެސް މައްސަލައެއް ހުރިކަން ނުވަތަ ނޫންކަން ފާހަގަ ކުރުމަށްފަހު އެކަން ސަމާލުކަމަށް ގެނައުމުގެ ފުރުސަތު ވީހާވެސް ގިނަ ބަޔަކަށް ދިނުމަށް ކަމަށް އެމަނިކުފާނު ވިދާޅުވި އެވެ.

ގާތްގަނޑަކަށް ދެ އަހަރު ދުވަހުގެ ތެރޭގައި އެފޮތް ދިވެހި ބަހަށް ތަރުޖަމާ ކުރުމުގެ ބުރަ މަސައްކަތް އެއްކޮށް ފުރިހަމަ ކުރެއްވީ އިސްލާމިކް ޔުނިވާސިޓީން 1987 ވަނަ އަހަރު ދަސްވެނިވި، އައްޝައިޚް މުހައްމަދު އަބްދުالله އެވެ.

ޖުމްލަ ހަ ވޮލިއުމް އަކަށް ބަހާލައިގެން ތައްޔާރުކޮށްފައިވާ މި ވާޝަންގައި، ކީރިތި ރަސޫލާގެ ހަދީޘް ބަސްފުޅުތައް ވެސް، އޭގެ އެންމެފުރިހަމަ ގޮތުގައި ހިމަނާފައިވާނެ ކަމަށް ގާސިމް ވިދާޅުވި އެވެ.

ރޭގެ ރަސްމިއްޔާތުގައި ތަފްސީރުގެ ޕްރޫފް ރީޑިންގެ މަސައްކަތްކުރެއްވި ބޭފުޅުން ކަމަށްވާ، އަބްދުالله އަބްދުލް މުޙުސިން އަދި އިޔާޒު ޖާދުالله ނަސީމް ވަނީ ވާހަކަފުޅުދައްކަވާފައެވެ. އެބޭފުޅުންގެ ވާހަކައިގައި ވަނީ، ތަފްސީރުގެ ޕްރޫފް ރީޑް ކުރުމުގައި ކުރެއްވި ބުރަ އަދި ބޮޑު މަސައްކަތައް އަލި އަޅުވާލައްވާފައެވެ.

އެގޮތުން، ކީރިތި ގުރުއާނުގެ ކޮންމެ އަކުރެއް އަދި ލަފްޒެއް ވަކި ވަކިން ބަލައި، ޗެކު ކުރެވިފައިވާ ކަމަށާ، ފެނުނު ހުރިހާ ކަމެއް ރަނގަޅު ކުރެވުނު ކަމަށް އެ ބޭފުޅުން ވަނީ ވިދާޅުވެފަ އެވެ.

ތަފްޞީރުގެ ވެބް ވާޝަންގެ ކޯޑިންގެ މަސައްކަތް ކޮށްފައިވަނީ ކަނޑުނޫގޭ މުހައްމަދު އިޤްބާލް އެވެ.