ޔުއާނުން ގަންނަ މުދަލަށް ރުފިޔާއިން ފައިސާ ދެއްކޭގޮތް ހެދުމަށް އެއްބަސްވުމެއް ޤާއިމްކުރަނީ

ޗައިނާއިން ރާއްޖެއަށް އެތެރެކުރާ މުދަލުގެ ތެރެއިން ޔުއާނުން ގަންނަ މުދަލަށް ދިވެހި ރުފިޔާއިން ފައިސާ ދެއްކުމާ ގުޅޭ އެއްބަސްވުމެއް ޤާއިމްކުރުމަށް މިއަދު ރާއްޖެއާ ޗައިނާ އާ ދެޤައުމުގެ ދެމެދު އެއްބަސްވުމެއްގައި ސޮއިކޮށްފިއެވެ.

ޗައިނާއިން ރާއްޖެއަށް އެތެރެކުރާ މުދަލުގެ ތެރެއިން ޔުއާނުން ގަންނަ މުދަލަށް ދިވެހި ރުފިޔާއިން ފައިސާ ދެއްކޭނޭ އިންތިޒާމެއް ހަމަޖެއްސުމަށް މި ސަރުކާރުން މަސައްކަތް ކުރަމުން އަންނަތާ ދުވަސްކޮޅެއް ވެއްޖެއެވެ.

ދިވެހި ސަރުކާރާއި ޗައިނާގެ މަރުކަޒީ ބޭންކު ކަމަށްވާ ޕީޕަލްސް ބޭންކް، ޕީބީއޯސީއާ ދެމެދު ޤާއިމްކުރި އެއްބަސްވުމުގެ ދަށުން ދެޤައުމުން ކުރާ ވިޔަފާރީގެ މުއާމަލާތްތަކުގައި ދެ ޤައުމުގެ ފައިސާ ބޭނުންކުރުމަށް އޮނިގަނޑެއް އެކުލަވާލެވިގެންދާނެއެވެ. އިކޮނޮމިކް މިނިސްޓްރީން ބުނީ މިއީ ދެ ޤައުމުގެ ދެމެދުގައި އިންވެސްޓްމަންޓްތައް އިތުރުކުރުމަށް އެޅިގެންދާނޭ މުހިއްމު ފިޔަވަޅެއް ކަމަށެވެ.

ރާއްޖޭގެ އިގްތިސާދުގައި ބޭރުފައިސާ ހޯދުމުގައި އޮތް ދަތިކަމަށް ހައްލެއް ގެނައުމަށް ސަރުކާރުން ވަނީ މިއަހަރުގެ ތެރޭގައި ޗައިނާ ސަރުކާރުގެ ކަމާބެހޭ ފަރާތްތަކާއެކު ބައްދަލުކޮށްފައެވެ. މިގޮތުން ބޭއްވުނު ބައްދަލުވުންތަކުގައި ޗައިނާގެ ސެންޓްރަލް ބޭންކުގެ އިސްބޭފުޅުންނާއެކު ބައްދަލުކޮށް ޔުއާން ބޭނުންކުރުމާ ގުޅޭގޮތުން ވަނީ މަޝްވަރާތައްކޮށްފައެވެ.

ރާއްޖެއިން ޗައިނާ އާއެކު އަހަރަކު 720 މިލިއަން ޑޮލަރުގެ ވިޔަފާރިގެ މުއާމަލާތް ކުރަމުން އަންނަކަމަށް އިގްތިސާދީ ވުޒާރާއިން ބުނެވެ.

ކަރަންސީ ސްވޮޕް އެރޭންޖްމަންޓްގައި ޓްރޭޑް ފެސިލިޓޭޝަންގެ ގޮތުގައި އެ އަދަދުގެ ދެބައިކުޅަ އެއްބައި ލިބުނު ނަމަވެސް ޗައިނާއިން ގެންނަ މުދަލަށް ރުފިޔާއިން ފައިސާ ދެއްކުމުގެ އިންތިޒާމް ހަމަޖެހިގެންދާނޭކަމަށް މީގެ ކުރިން އިގްތިސާދީ ވަޒީރު މުހައްމަދު ސައީދު ވަނީ ވިދާޅުވެފައެވެ.

ރާއްޖޭގެ އިގްތިސާދުގައި މިވަގުތު އޮތް އެންމެ ބޮޑު ކަންބޮޑުވުމަކީ ޑޮލަރަށް އޮންނަ ޑިމާންޑު ބޮޑުވުމެވެ. މިކަން ހައްލުކުރުމަށް މިދިޔަ ދުވަސްތަކުގައި ސަރުކާރުން ވަނީ، ވަރަށް މުހިއްމު ފިޔަވަޅުތަކެއް އެޅުމަށް ނިންމާފައެވެ. މީގެ ތެރޭގައި ރާއްޖޭގެ އިޤްތިސާދުގެ ތެރޭގައި ޑޮލަރުގެ މުއާމަލާތް ކުރެވޭ ބައެއް އުސޫލްތަކަށް ވަނީ ބަދަލު ގެނެސްފައެވެ. ޑޮލަރުން އާމްދަނީ ލިބޭ ފަރާތްތަކުން ދައްކަންޖެހޭ އިންކަމް ޓެކްސް ޑޮލަރުން ބަލައިގަތުމަށް އިއްޔެ ނިންމާފައިވަނީވެސް މި ސިޔާސަތުގެ ތެރެއިންނެވެ.