ދެ ބަޔަކު ނޫނީ ތިން ބަޔަކު ކޯލިޝަން ހަދާނެ ކަމަށް އުއްމީދު ކުރަން: ރައީސް ޞާލިހު

ރިޔާސީ އިންތިހާބުގެ ދެވަނަ ބުރާއި ހަމައަށްދާއިރު، ދެ ޕާޓީ ނޫނީ ތިން ޕާޓީ އަކުން އެމްޑީޕީއާއި އެކުގައި ކޯލިޝަން ހަދާނެ ކަމަށް އުއްމީދު ކުރައްވާ ކަމަށް އެމްޑީޕީީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ އިންތިހާބުގެ ފުރަތަމަ ބުރަށްވެސް އެމްޑީޕީ ނުކުތީ އެމްޑީއޭ އާއި އަދާލާތާއި އެކު ކޯލިޝަން ހަދައިގެންނެވެ. ނަމަވެސް، އިންތިހާބުގެ ފުރަތަމަ ބުރުގައި 15,000 އަށްވުރެ ގިނަ ވޯޓުގެ ބޮޑު ފަރަގަކުން، އެ އިންތިހާބު ކާމިޔާބު ކުރައްވާފައިވަނީ ކޯލިޝަން ނުހައްދަވައި ނުކުންނެވި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުޢިއްޒު އެވެ.

މުއިއްޒަށް ލިބިވަޑައިގެންނެވީ 100,122 ވޯޓެވެ. އެއީ 46.07 ޕަސެންޓެވެ. ރައީސް ސާލިހަށް 84,997 ވޯޓު ލިބިވަޑައިގެންނެވިއެވެ. އެއީ 39.11 ޕަސެންޓް ވޯޓެވެ.

މި ނަތީޖާ އަށްފަހު ނޫސްވެރިން ކުރި ސުވާލަކަށް ޖަވާބު ދެއްވަމުން ރައީސް ޞާލިހު ވަނީ ކޮންމެ ގޮތެއް ވިޔަސް ދެވަނަ ބުރުގައި އެހެން ބަޔަކާއެކު ކޯލިޝަން ހަދަންޖެހޭނެ ކަމަށް ވިދާޅުވެފައެވެ.

އެކަމާއި ގުޅިގެން، ރާއްޖެޓީވީގެ މިއަދުވެ ފަށާއިރު ޕްރޮގްރާމަށް ދެއްވި ބަސްދީގަތުމެއްގައި ރައީސް ޞާލިހު ވިދާޅުވީ، އިންތިޚާބުގައި ވާދަކުރި ޕާޓީ ތަކުގެ ތެރޭއިން ދެވަނަ ބުރަށް ނުދިޔަ ޕާޓީތަކާއި އެކު އިއްޔެވެސް މަޝްވަރާކުރެވިފައިވާ ކަމަށެވެ. އަދި ބައެއް ޕާޓީ ތަކުން އެމަނިކުފާނާއެކު ކޯލިޝަން ހައްދަވާނެ ކަމުގެ ފެހި ސިގުނަލްވެސް ދެއްވާފައިވާ ކަމަށް ވިދާޅުވި އެވެ.

އަޅުގަނޑުމެން ދެވަނަ ނުދިޔަ ޕާޓީތަކާއި އެކުގައި އިއްޔެވެސް ބައެއް ވާހަކަތައް ދެކެވިފައި އެބަހުރި. އަޅުގަނޑުމެންނާ އެކީގައި ކުރިއަށްދާނެ ކަމުގެ ފެހި ސިގުނަލް ދެއްވާފައި ތިބި ބައެއް ބޭފުޅުން އެބަ ތިބި. އަދި ރަސްމީކޮށް އެކަން އިއުލާން ކުރެވޭ ހިސާބަކަށް ނުދޭ. އަޅުގަނޑުމެންގެ މިއަދުގެ ދެން އޮތް މަސައްކަތްތަކަށް ވާނީ އެކަންތައް. އިރާދަކުރެއްވިޔާ ދެބަޔަކު ނޫނީ ތިން ބަޔަކު، އަޅުގަނޑުމެންނާ އެކީގައި އަރާނެ ކަމަށް އަޅުގަނޑުމެން މި ގަބޫލު ކުރަނީ. އެކަން ކުރެވުނީމާ މީގެން ވެސް ލިބޭނެ ފުދޭ ވަރެއްގެ ކުރި އެރުމެއް.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހް މިފަދައިން ވިދާޅުވެފައި ވާއިރު، އިންތިހާބުގައި ތިން ވަނަ އަށް އެންމެ ގިނަ ވޯޓު ލިބުނު އެމްޑީޕީ ކުރީގެ ރައީސް މުހައްމަދު ނަޝީދު ގެ ދަ ޑިމޮކްރެޓްސް އާއި އެކު އެއްބަސް ވުމަކަށް އާދެވޭތޯ އެމްޑީޕީން މަސައްކަތް ފަށާފައިވާ ކަމުގެ މަލަމަތި އަންނަނީ ފެންނަމުންނެވެ. އެގޮތުން، އެމްޑީޕީން ރައީސް ނަޝީދާއި މަޖިލީހުގެ ނާއިބު ރައީސް އީވާ އަބްދުالله މަޖިލީހުގެ ރައީސާއި ނާއިބު ރައީސް ގެ މަގާމުން ވަކިކުރުމަށް ހުށަހެޅި މައްސަލަ އަނބުރާ ގެންދަން އެ ޕާޓީން ނިންމި ކަމަށް ޕީޖީ ލީޑަރު އަދި ރައީސް ޞާލިހު ގެ ރަނިންމޭޓް މުހައްމަދު އަސްލަމް ވަނީ ވިދާޅުވެފަ އެވެ.