ކޯލިޝަން ހެދުމުގެ މަޝްވަރާ ރައީސް ޞާލިހު އާއެކު ކުރައްވާކަމަށް ފުރަތަަމަ ފަހަރަށް ރައީސް ނަޝީދު ވިދާޅުވެއްޖެ!

ރިޔާސީ އިންތިހާބުގެ ދެވަނަ ބުރުގައި އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއިއެކު ކޯލިޝަން ހެދުމުގެ މަޝްވަރާތައް ކުރިއަށްދާ ކަމަށް އެމްޑީޕީގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިރޭ އިންޑިއާ ކޮމިޝަނަރާއި ބައްދަލު ކުރެއްވުމަށްފަހު "ވޮއިސް" އަށް ދެއްވި ބަސްދީގަތުމެއްގައި ވިދާޅުވީ، އެ ބައްދަލުވުމަކީ ސިޔާސީ ވާހަކައެއް ދެއްކުމަށް ނުވަތަ ކޯލިޝަން ހެދުމާއި ބެހޭ ގޮތުން މަޝްވަރާ ކުރެއްވުމަށް ބޭއްވުނު ބައްދަލުވުމެއް ނޫން ކަމަށެވެ.

"ދިވެހިރާއްޖޭގެ ސިޔާސީ، އެތެރޭގެ އެއްވެސް ކަމަކާއި ގުޅޭ ގޮތުން (އިންްޑިއާ ހައިކޮމިޝަނަރާ) ވާހަކައެއް ނުދައްކަން" ރައީސް ނަޝީދު ވިދާޅުވި އެވެ.

މިއާއެކު ދެވަނަ ބުރުގައި ރައީސް ޞާލިހާއިއެކު ކޯލިޝަން ހައްދަވާފާނަންތޯ ކުރި ސުވާލަށް ޖަވާބު ދެއްވަމުން ނަޝީދު ވަނީ އެމްޑީޕީ އާއި ޕީޕީއެމާއި ވެސް ކޯލިޝަން ހެދުމާއި ގުޅޭ މަޝްވަރާ ކުރައްވާނެ ކަމަށް ޑިމޮކްރެޓްސް ގެ ރިޔާސީ އިލްޔާސް ލަބީބު ވިދާޅުވެފައިވާ ކަން ފާހަގަ ކުރައްވާފައެވެ. އަދި ރައީސް ޞާލިހާއެކުވެސް އެ މަޝްވަރާތައް ކުރިއަށްދާ ކަމަށް ނަޝީދު ވިދާޅުވި އެވެ.

"އަޅުގަނޑުމެންގެ ފަރާތުން އިލްޔާސް އެބަ ވިދާޅުވޭ ދެއްތޯ ދެ ޕާޓީއާވެސް ވާހަކަ ދައްކަވާނަމޭ..."

"(ރައީސް ޞާލިހު އާއެކު މަޝްވަރާތައް) ކުރިއަށް އެބަދޭ. އިރާދަކުރެއްވިޔާ ރަނގަޅު ގޮތެއް ވާނެ. ދެން ބެފޭޅުންނާއެކު ވެސް ވާހަކަ އެބަ ދެކެވޭ. ދެން އަޅުގަނޑަށް ހީވާ ގޮތުގައި ތިބޭފުޅުންވެސް ހިތްހަމަޖެހޭ ގޮތަށް މިކަން ނިމިގެން ދާނީ. އެއްގޮތަކަށްވެސް ކަންބޮޑުވެނުލައްވާ. ކަންބޮޑުވެއްޖެއްޔާ އޮންނާނީ ގޮސްވެފައި. އަޅުގަނޑު ރަނގަޅަށް ހަދާނީ. އަޅުގަނޑު ގޯސްކޮށް ނުހަދާނަން. އަޅުގަނޑު ވަރަށް ބަލާނަން ރަނގަޅަށް ހަދަން. އަޅުގަނޑަށްވެސް އިންތިހާބުގެ ނަތީޖާ އެބަ ފެނޭ. ހުރިހާ ކަމެއްވެސް އިރާދަކުރެއްވިޔާ ރަނގަޅު ވާނެ."

ރައީސް މުހައްމަދު ނަޝީދު

ނަޝީދު މިފަދައިން ވިދާޅުވެފައި ވާއިރު، ޑިމޮކްރެޓްސް އެމްޑީޕީ އާއެކު ކޯލިޝަން ހެދުމަށް އެދި އެމްޑީޕީ މަޖިލިސް މެންބަރުން މަޖިލީހަށް ހުށަހެޅު ރައީސް ނަޝީދާއި މަޖިލީހުގެ ނާއިބު ރައީސް އީވާ އަބްދުالله ގެ އިތުބާރު ނެތް ކަމުގެ މައްސަލަ ވެސް މިއަދު ވަނީ ނަގާފައެވެ.