ނަތީޖާ އަނބުރާލައި ބޮޑު ތަފާތަކުން މި އިންތިހާބު ކާމިޔާބު ކުރެވޭނެ: ރައީސް ޞާލިހު

ރިޔާސީ އިންތިހާބުގެ ފުރަތަމަ ބުރުގެ ނަތީޖާ އަނބުރާލައި، ދެވަނަ ބުރުގައި ބޮޑު ތަނުން ކާމިޔާބު ކުރައްވާނެ ކަމަށް އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެ އެވެ.

އެމްޑީޕީގެ ކެމްޕޭނު ހަރަކާތްތެރިންނާއެކު ރޭ ބޭއްވި ހަރުގެ ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ, މަސައްކަތް ތަކެއް ކޮށް ކާމިޔާބީ ނުވުމުން މާޔޫސްވުމަކީ ވާނެ ކަމަށާ، އެހެން ނަމަވެސް، އެ މާޔޫސްކަން ފަހަތަށް ޖައްސަވާލައްވައި އެމަނިކުފާނު ނުކުންނަވައި ހުންނެވީ އަނެއްކާވެސް ރާއްޖެ ތަރައްގީ ކުރެއްވުމަށް އެކުލަވައި ލެއްވި މެނިފެސްޓޯ ތަންފީޒު ކުރެއްވުމަށް ކަމަށެވެ.

އަދި އެމްޑީޕީއާއި ގުޅިފައިވާ ކޯލިޝަނަކީ ނާކާމިޔާބީގައި ވެސް، ހިތްވަރު އެލުވާނުލައި ނުކުމެ މަސައްކަތް ކުރައްވައި ކާމިޔާބީ ހޯއްދަވާފައިވާ ބައެއް ކަމަށާ، މިހާރު ނުކުންނަވައި ހުންނެވީ މި އިންތިޚާބު ވެސް ބޮޑުތަނުން ކާމިޔާބު ކުރެއްވުމަށް ކަމަށް ރައީސް ޞާލިހު ވިދާޅުވި އެވެ. އަދި އެ ޓީމުން އެކުގައި މަސައްކަތް ކޮށްފިނަމަ އެކަން ވާނެ ކަމަށްވެސް ވިދާޅުވި އެވެ.

މިއާއެކު ރައީސް ޞާލިހް ވިދާޅުވީ އިންތިހާބުގެ ފުރަތަމަ ބުރު ނިމުމާއެކު ގިނަ ދިރާސާތަކެއް ޖައްސަވާފައިވާ ކަމަށާ، ފުރަތަަމަ ބުރުގައި ދިމާވި މައްސަލަތައް ދެނެގަނެވިފައިވާ ކަމަށެވެ.

ރައީސް ޞާލިހް ވިދާޅުވީ ދެވަނަ ބުރުގައިވެސް ނަތީޖާ ބަދަލުކުރުމަށް ބޭނުންވަނީ 50 އިންސައްތަ އާއެކު 1 ވޯޓްކަމުން ކޮންމެ ބޭފުޅެއް ވޯޓަކީވެސް މުހިއްމު ވޯޓެއްކަަމަށެވެ. ފުރަތަމަ ބުރުގެ ނަތީޖާއަށް ބަލާއިރު، އެންމެ މަދުން ވޯޓްލާފައިވަނީ މި އިންތިޚާބުގެ ފުރަތަމަ ބުރުގަކަން ފާހަގަކުރެއްވިއެވެ. 80 ޕަސެންޓް މީހުން ވެސް ވޯޓުލާފައި ނުވާ ކަމަށާއި މިއީ މީގެކުރިން ރިޔާސީ އިންތިޚާބުތަކުގައި ވެފައި ހުރި ގޮތެއް ނޫން ކަމަށްވާއިރު މަސައްކަތް ކުރެވިއްޖެ ނަމަ ވޯޓުލާން މިއަށް ވުރެ ގިނަ މީހުން ނެރެވޭނެ ކަމަށް ވިދާޅުވިއެވެ.

އަދި އެމަނިކުފާނުގެ ޓީމުން ބެލި ހިސާބު ތަކުން، ވޯޓު ނުލާ މީހުންގެ ތެރޭގައި އެމްޑީޕީއަށް ތާއީދުކުރާ އެތައް ބަޔަކުވެސް ތިބި ކަމަށާއި އެ ސަބަބުތައް ދެނެގަންނަޖެހޭ ކަމަށް ރައީސް ވިދާޅުވި އެވެ.

"އެ ސަބަބުތައް ދެނެގަނަންވީ އަޅުގަނޑުމެން. އެބޭފުޅުންނަށް ވޯޓުލާން ނުނިކުމެވުނީ ކީއްވެގެންތޯ. ދަތުރު ނުރޭވުނީތޯ އަޅުގަނޑުމެންނަށް ނޫނީއްޔާ ގަޑިއަށް އައުމަށް ފަރުވާކުޑަކުރެވުނީތޯ، މިގޮތަށް ބަލައިގެން ކުރިއަށް ވަޑައިގަންނަވަންވީ. އަޅުގަނޑަށް ޔަގީން ބާކީ މިއޮތް 17 ދުވަހުގެ ތެރޭގައި މީތި މުޅިން އަނބުރާލާފައި އިރާދަކުރެވިއްޔާ އަޅުގަނޑުމެންނަށް ބޮޑު ތަފާތަކުން މި އިންތިހާބު ކާމިޔާބު ކުރެވޭނެ،"

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރައީސް ޞާލިހް އިތުރަށް ވިދާޅުވީ، އެމްޑީޕީ އަކީ ރޭވުންތެރިކަމާއެކު ކެމްޕޭން ކުރާ ޕާޓީއެއް ކަމަށާއި، މިހާރުވެސް މަސައްކަތް ކުރައްވަމުންދަނީ އެގޮތަށް ކަމަށެވެ. އަދި ފުރަތަމަ ބުރުގައި އަތުން ކައްސާލައިގެންދިޔަ ކަންކަން ބަދަލުކުރެވިއްޖެ ނަމަ ނަތީޖާ އަނބުރާލުމަކީ ދަތި ކަމަކަށް ނުވާނެ ކަމަށް ރައީސް ވިދާޅުވި އެވެ. ކެމްޕޭނުގެ ކަންކަން ފަސޭހަކުރުމަށްޓަކާ ބައެއް ކަންކަމަށް ބަދަލުތައް ގެނެސްފައިވާ ކަމަށާއި މަސައްކަތްތައް މިހާރު ބާރަށް ކުރިއަށް ގެންދަން ރައީސް އެދިވަޑައިގެންނެވި އެވެ.

“ޓީމުތައް އެކުލަވާލާ އަޅުގަނޑަށް ފެންނަނީ ހަމަ މިރެއިން މިރެއަށް އަނެއްކާވެސް ބާރަށް މަސައްކަތް ފަށައިގަންނަން. ހަމަ ބާރަށް ކުރިއަށް ގެންދަންވީ،” ރައީސް ވިދާޅުވި އެވެ.