ކައުންސިލްތަކުގެ މުވައްޒަފުންނަށް %35 އެލަވަންސް ލިބޭނީ އާދިއްތައިން ފެށިގެން!
ކައުންސިލްތަކުގެ އިދާރީ މުވައްޒަފުންނަށް ދޭނެ ކަމަށް ސަރުކާރުން އިއުލާން ކުރި %35 އެލަވަންސް ދޭނީ އަންނަ އާދީއްތަ ދުވަހުން ފެށިގެން ކަމަށް ސިވިލް ސާވިސް ކޮމިޝަނުން ބުނެފި އެވެ.
މިދިޔަ މަހުގެ 19 ވަނަ ދުވަހު، ސަރުކާރުން ނެރުނު އެންގުމެއްގައި، މިމަހު 1 ވަނަ ދުވަހުން ފެށިގެން ކައުންސިލް އިދާރާތަކުގެ މުވައްޒަފުންނަށް 'ސްޕެޝަލް ޑިއުޓީ އެލަވަންސް'ގެ ގޮތުގައި އިތުރު ގަޑީގެ އިނާޔަތް ދިނުމަށް، ރައީސް އިބްރާހިމް މުހައްމަދު ޞާލިހު ނިންމަވާފައިވާ ކަމަށް ވަނީ އިއުލާން ކޮށްފައެވެ.
އެހެން ނަމަވެސް، ސިވިލް ސާވިސް ކޮމިޝަނުން އިއްޔެ ނެރުނު ސާކިއުލާއެއްގައި ބުނީ މި އެލަވަންސް ދޭން މިހާރު ނިންމާފައިވަނީ މި މަހުގެ 15 ވަނަ ދުވަހުން ފެށިގެން ކަމަށެވެ.
އެ ސާކިއުލާގައި އިތުރަށް ބުނެފައިވާ ގޮތުގައި، އެލަވަންސް ދޭ މުވައްޒަފުންގެ އިތުރު ގަޑި ހިސާބު ކުރާނީ ރަސްމީ ބަންދު ދުވަސްތަކުގައި އަދާކޮށްފައިވާ އިތުރު ގަޑީގެ ވަގުތު ނުހިމަނައި މަހެއްގެ މައްޗަށް 44 ގަޑިއިރު އިތުރަށް ކޮށްފައިވާ ވަގުތަށް ބެލުމަށް ފަހުގައި ކަމަށެވެ.
އެހެންނަމަވެސް، އެއިން އެސްއެސް އަދި ޖީއެސް ރޭންކުތަކުގައި މަސައްކަތް ކުރާ މުވައްޒަފުންނާއި ލީގަލް އޮފިސަރުން އިސްތިސްނާ ވާނެ ކަމަށް ވެސް ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
