ހުޅުމާލޭ ދެވަނަ ފިޔަވަހީ އެމްއޭސީއެލް ހިޔާ ޓަވަރު ސަރަހައްދުގައި ބަސް ސްޓޮޕެއް ގާއިމުކޮށްފި
މޯލްޑިވްސް ޓްރާނަސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ފަރާތުން ހުޅުމާލޭ ދެވަނަ ފިޔަވަހީ އެމްއޭސީއެލް ހިޔާ ޓަވަރު ސަރަހައްދުގައި ބަސް ސްޓޮޕެއް ގާއިމު ކޮށްފިއެވެ.
އެމްޓީސީސީން ބުނީ އިތުރު ބަސް ސްޓޮޕެއް ގާއިމު ކުރަން ނިންމީ، އެ ކުންފުނީގެ ފަރާތުން ހުޅުމާލޭގައި ދިރިއުޅޭ ރައްޔިތުންނަށް ފޯރުކޮށްދޭ ބަހުގެ ހިދުމަތް އިތުރަށް ފުޅާކޮށް ލުއިފަސޭހަ ކޮށްދިނުމުގެ ގޮތުން ކަމަށެވެ.
އެގޮތުން އާރްޓީއެލް ބަހުގެ ހިދުމަތުގައި ހިމެނޭ އާރް6، އާރް 7، އާރް 8 އަދި އާރް 9 ރޫޓުގެ ބަސްތައް މެދުވެރިކޮށް، މާދަމާއިން ފެށިގެން އާ ބަސް ސްޕޮޓްގެ ހިދުމަށް ދިނުމަށް އެމްޓީސީސީން ވަނީ ނިންމާފައެވެ.
އެމްޓީސީސީން ބަހުގެ ހިދުމަތް ދޭން ފަށައި، ރައްޔިތުންގެ ބޭނުންތަކަށް ބެލުމަށްފަހު އެކި ސަރަހައްދުތަކުގައި ބަސް ސްޓޮޕް ގާއިމު ކުރަމުން ދެއެވެ. އެގޮތުން ހުޅުމާލޭ ދެވަނަ ފިޔަވަހީގައި އެންމެ ފުރަތަމަ ބަސް ސްޓޮޕްގެ ހިދުމަތް ދޭން ފެށީ ހިޔާ ޓަވަރުތައް ކައިރީގައެވެ.
އެމްއޭސީއެލް ސަރަހައްދުގައި ބަސް ސްޓޮޕް ގާއިމު ކުރުމުން، ހިޔާ ފްލެޓްތަކުގައި ހުންނަ ދެ ބަސް ސްޓޮޕްއާ ލައިގެން ޖުމުލަ ހަތަރު ބަސް ސްޓޮޕް ދެވަނަ ފިޔަވަހީގައި ހުންނާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
