އިނގުރައިދޫ ސްކޫލުގެ ހުރިހާ ގޮތަކުން އެންމެ މޮޅު ދަރިވަރަކަށް ހައިސަމް

ރ. އިނގުރައިދޫ ސްކޫލުގެ ހުރިހާ ގޮތަކުން އެންމެ މޮޅު ދަރިވަރަކަށް، އެރަށު ވެސްޓްހައުސް، އަހުމަދު ހައިސަމް ހޮވިއްޖެއެވެ.

މިދިޔަ ހުކުރު ދުވަހުގެރޭ އިނގުރައިދޫ ސްކޫލުގައި ބޭއްވި، 2022- 2021 ވަނަ އަހަރުގެ އިނާމު ދިނުމުގެ ޖަލްސާ ޝަރަފުވެރި ކޮށްދެއްވާފައި ވަނީ އެޑިޔުކޭޝަން މިނިސްޓްރީގެ ޕާސަނަލް ސެކެއްޓްރީ އަހުމަދު ޢަލީއެވެ. އަދި ޖަލްސާގެ މެހެމާނެއްގެ ގޮތުން އާރްޑީސީގެ މެނޭޖިން ޑައިރެކްޓަރ މޫސާ ޢަލިމަނިކު ބައިވެރިވަޑައިގެންނެވެ.

އެލްކޭޖީ އިން ފެށިގެން ގުރޭޑް 10އާ ހަމައަށް ކިޔަވައިދޭ އިނގުރައިދޫ ސްކޫލުގައި ޖުމުލަ 353 ދަރިވަރުން ތައުލީމު ހާސިލް ކުރެއެވެ.

އިނގުރައިދޫ ސްކޫލުން މިދިޔަ އަހަރު އޯލެވެލް ނިންމި ކުދިންގެ ތެރެއިން އައިމިނަތު މައިސަމް ވަނީ 2022 ވަނަ އަހަރު ބޭއްވުނު އޯލެވެސް އިމްތިހާނުން 4 އޭ ސްޓާ އާއި 3 އޭފާސް އަދި، 1 ބީސްފާސް ހޯދައި ރާއްޖޭގެ އެންމެ ގަދަ 10 ދަރިވަރުންގެ ތެރެއިން 6 ވަނާގައި ހިމެނިފައެވެ.

ބެސްޓް އޯލް ރައުންޑަށް ހޮވުނު އަހުމަދު ހައިސަމްވަނީ ވަނީ 2022 ވަނައަހަރު ބޭއްވުނު އޯލެވެލް އިމްތިޙާނުން 7 އޭ ސްޓާއާއި 1 ބީ ފާސް ހޯދައި ރާއްޖޭގެ އެންމެ ގަދަ 10 ދަރިވަރުންގެ ތެރެއިން 3 ވަނަގައި ހިމެނިފައެވެ.

އިނގުރައިދޫ ސްކޫލުން ބުނި ގޮތުގައި ހައިސަމް އަކީ ދީނީ ކަންތައްތަކަށް ފަރުވާތެރިވާ، ރަނގަޅު ނަތީޖާއެއް ހޯދުމަށްޓަކައި ވަރަށް ބޮޑެތި ގުރުބާނީތަކެއްވި އަދި މައިންބަފައިންގެ ބަސްއަހައި މުދައްރިސުންނަށް އިޙްތިރާމްކުރާ ހީވާގި މުރާލި ދަރިވަރެއް ކަމަށެވެ.

ހައިސަމަކީ ކެތްތެރިކަމާ މަޑުމައިތިރިކަމާއެކު ކަންތަކާއި ކުރިމަތިލައި މީހުންނަށް އަދަބު އިޙުތިރާމް އަދާކުރި ހިތްހެޔޮ ނަމޫނާ ދަރިވަރެއް. ވާހަކަ ދެއްކުމުގައި ހުންނަ މަޑުމައިތިރި ކަމާއި  މީހުންނާއި ބައްދަލުވާހިދު ހުންނަ ހިނިތުންވުމަކީ ހައިސަމުގެ ރިވެތި އަޚްލާޤު އިތުރަށް ޒީނަތްތެރިކުރުވި މައިގަޑު އެއް ސަބަބު. އެހެން މީހުންގެ އިޙުސާސްތައް ދަންނަ މިދަރިވަރަކީ  ހުރިހާ ކުދިންނާއި ވެސް ގުޅިގެން މަސައްކަތްކުރި ދަރިވަރެއް." އިނގުރައިދޫ ސްކޫލުން ބުންޏެވެ.

އިނގުރައިދޫ ސްކޫލުން ބުނީ، ހައިސަމް އަކީ ތަޢުލީމީގޮތުން މޮޅު ދަރިވަރެއްގެ އިތުރުން، ރީތިކޮށްކުރަހައި ކުޅިވަރު ދަނޑުތަކުގައިވެސް ހަރަކާތްތެރިވި ހުނަރުވެރި ދަރިވަރެއްގެ ކަމަށެވެ.

ވަގުތަށް ކަމޭހިތައިގެން ބަރާބަރަށް ކްލާސްތަކަށް ހާޒިރުވި ހައިސަމްއާ ގުޅޭގޮތުން މުދައްރިސުން އެއްވެސް ޝަކުވާއެއް ކޮށްފައި ނުވާކަމަށް އިނގުރައިދޫ ސްކޫލުން ބުނެއެވެ.