އެމްޑީޕީއާއި ފެޔަށް ޖެހުނު މެމްބަރުންނަށް ވެސް ރަނގަޅުވާނީ ޕާޓީގެ ވެރިކަމެއް އޮތުން: ޝިޔާން

އެކި ސަބަބުތަކާއި ހުރެ ސަރުކާރު ހިންގާ މައި ޕާޓީ އެމްޑީޕީއާއި ފެޔަށް ޖެހުނު މެމްބަރުންނަށް ވެސް ޕީޕީއެމްގެ ވެރިކަމަށް ވުރެ ދެން ވެސް ރަނގަޅުވާނީ އެމްޑީޕީގެ ވެރިކަމެއް އޮތުންކަމަށް ރައްޔިތުންގެ މަޖިލީހުގެ ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހަސަން ޝިޔާން ވިދާޅުވެއްޖެ އެވެ.

އޭނާ މިފަދައިން ވިދާޅުވެފައި ވަނީ އެމްޑީޕޫގެ ދެ ރައީސުންގެ ދެމެދުގައި އުފެދުނު ނުތަނަވަސްކަމުގެ ތެރެއިން ޕާޓީ ދޫކޮށް ދިޔަ މެމްބަރުންނަށް އަނބުރާ އެމްޑީޕީއާއި ގުޅިވަޑައިގަތުމަށް ދައުވަތުއަރުވާ، އެމްޑީޕީގެ ކަންމަތީ ޖަލްސާގައި ވާހަކަދައްކަވަމުން ނެވެ.

ޝިޔާންގެ ވާހަކަ ފެއްޓެވީ ޑިމޮކްރަސީ ރާއްޖެއަަށް ގެނައުމަށް މާޒީގައި އެމްޑީޕީން ކޮަށްފައިވާ ބުރަ މަސައްކަތްތަކުގެ ހަނދާންތައް އާކޮށްދެއްވަމުން ނެވެ. އޭނާ ވިދާޅުވީ އެ ޕާޓީއަކީ ރާއްޖޭގައި އޮތް 30 އަހަރުގެ ދިގު ވެރިކަން ބަދަލުކޮށް، ރާއްޖެއަށް ޑިމޮކްރަސީ ގެނައި ޕާޓީ ކަމަށެވެ.

ޝިޔާން ވިދާޅުވީ އެމްޑީޕީ ރާއްޖޭގައި އޮތް އެންމެ ވަރުގަދަ ޕާޓީއަށްވީ އާންމު މެމްބަރުންގެ ސަބަބުން ކަމަށެވެ. އެހެންކަމުން މި އަހަރުގެ ރިޔާސީ އިންތިޚާބުގެ ދެވަނަ ބުރަށް ތައްޔާރުވަމުންދާއިރު، އެކި ސަބަބުކަތާއި ހުރެ އެމްޑީޕިއާއި ދުރަށް ދިޔަ ފަރާތްތަކަށް ވެސް އަނބުރާ އެމްޑީޕީއާއި ގުޅިވަޑައިގަތުމަށް ގޮވާލައްވާކަމަށް ޝިޔާނު ވިދާޅުވި އެވެ.

އޭނާ ވިދާޅުވީ ކޮންމެ ގޮތަށް ވީ ނަމަވެސް، އެމްޑީޕީގެ އާންމު މެމްބަރުންނަށް ޕީޕީއެމްގެ ވެރިކަމަށްވުރެ ހުރިހާ ގޮތަކުން ވެސް ރަނގަޅުވާނީ އެ ޕާޓީގެ ވެރިކަމެއް އޮތުން ކަމަށެވެ.

"އަޅުގަނޑު ގޮވާލަން ބޭނުން ވަނީ މި ރާއްޖޭގެ އެކި ކަންކޮޅުތަކުގައި ތިބި އެމްޑީޕީއާ އޭރުގައި ފެއަށް ޖެހިފައި ތިބި ފަރާތްތަކާ އެރުގައި އެކިއެކި ސަބަބުތަކާ ގުޅިގެން ދުރަށް ގޮށްފައިވާ ފަރާތްތަކާއި ވަޑައިގަންނަވާށޭ! ޕީޕީއެމްގެ ވެރިކަމަށް ވުރެ ދެން ވެސް ތިބޭފުޅުންނަށް ރަނގަޅުވާނީ އެމްޑީޕީއަށް ވެރިކަން ލިބިގެން"

ތޮއްދޫ މެމްބަރު ޝިޔާން

ޝިޔާން އިތުރަށް ވިދާޅުވީ މި ފަސް އަހަރު ދުވަހުގައި ރާއްޖޭގައި ޤާއިމްވެގެން ގޮސްފައިވާ އަމާން އޮމާންކަން މި ގޮތުގައި ދެމެހެއްޓުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެރިކަމުގައި ބެހެއްޓުން ވަރަށް މުހިންމު ކަމަށެވެ.

އެހެން ކަމުން މި ވެރިކަން ދެމެހެއްޓުމަށް، އެމްޑީޕީގެ އާންމު މެމްބަރުން އަލުން އެކައްޗެއް ކިޔާ، މަސައްކަތް ކުރަން ޖެހޭ ކަމަށާއި، އެކަމަށްޓަކައި އެމްޑީޕީއާއި ދުރަށް ދިޔަ ފަރާތްތައްވެސް އަނބުރާ ވަޑައިގެން މި މަސައްކަތުގައި ބައިވެރިވެދެއްވުމަށް ގޮވާލައްވާކަމަށް ޝިޔާން ވިދާޅުވި އެވެ.