އިންޑިއާ ސިފައިން ބޭލޭނީ ޑޮކްޓަރުންނާއި ޓީޗަރުންނާއި ވެސް އެކު، ދެން ކިހެނެއްތޯ ވާނީ؟ : މޫސަ

ޤަވައިދާއި ޚިލާފަށް ރާއްޖޭގައި ތިބި އިންޑިއާ ސިފައިން ދެން މި ގައުމުން ބޭލޭނީ ރާއްޖޭގައި މަސައްކަތްކުރާ އިންޑިއާ ޑޮކްޓަރުންނާއި ޓީޗަރުންނާއި ވެސް އެކުގައި ކަމަށާއި، އެހާ ހިސާބުން ދެން ވެދާނެ ގޮތަކާއި މެދު ވިސްނަން ޖެހޭކަމަށް އެމްޑީޕީގެ ކުރީގެ ޗެއާ ޕާސަން މޫސާ މަނިކު (ރީކޯ) ވިދާޅުވެއްޖެ އެވެ.

މޫސާ މަނިކު މިފަދައިން ވިދާޅުވެފައި ވަނީ އިންޑިއާ ސިފައިން ރާއްޖޭގައި ތިބި މައްސަލައާއި ގުޅިގެން އިދިކޮޅުން ދައްކަމުންދާ ވާހަކަތަކަށް ރައްދުދެއްވުމުގެ ގޮތުން ރޭ އެމްޑީޕީން ބޭއްވި ކަންމަތީ ބައްދަލުވުމުގައި ދެއްކެވި ވާހަކަފުޅެއްގަ އެވެ.

އެގޮތުން އެ މައުލޫގައި އޭނާ އެންމެ ފުރަތަމަ ވެސް ވިދާޅުވީ ގަވައިދާއި ޚިލާފަށް ރާއްޖޭގައި އިންޑިއާ ސިފައިން ތިބިކަމަށް ބުނެ އިދިކޮޅުން ދައްކަމުންދަނީ ދޮގު ވާހަކަތަކެއް ކަމަށެވެ. އެކަން ދާދި ފަހުން ސިފައިންގެ ޖެނެރަލުންތަކެއް ދިން އިންޓަވިއުތަކެއްގައި ވެސް ހާމަވެފައިވާ ކަމަށެވެ.

އިންޑިއާ ވިޔަސް އަދި އެހެން ގައުމެއްގެ ސިފައިންނަަށް ވެސް ރާއްޖޭގައި ތިބެވޭނީ ރައްޔިތުންގެ މަޖިލީހުގެ ހުއްދަ ލިބިގެންކަމަށާއި، މިހާތަނަށް އެފަދަ ހުއްދައެއް ހޯދުމަށް ރައްޔިތުންގެ މަޖިލީހަށް ހުށައަޅާފައި ނުވާކަމަށް މޫސާ މަނިކު ވިދާޅުވި އެވެ. އަދި މަޖިލީހުގެ ހުއްދަ ނެތި ރާއްޖޭގައި އިންޑިއާ ސިފައިންނަށް ހަރަކާތްތެރި ނުވެވޭނެކަމީ ފެންނަން އޮތް ހަގީގަތެއްކަމަށް ވެސް ވިދާޅުވި އެވެ.

އެއާއެކު އޭނާ ވިދާޅުވީ އިންޑިއާ ސިފައިން އިދިކޮޅުން އެ ބުނާ ގޮތަށް ތިބި ނަމަވެސް އެމީހުން ރާއްޖެއިން ބޭލުމަކީ ފަސޭހަ ކަމަކަމަށް ނުވާނެ ކަމަށެވެ.

އެއާއެކު އޭނާ ވަނީ އިންޑިއާ ސިފައިން ރާއްޖެއިން ބާލަން ދިމާކޮަށްފި ނަމަ ދެން ވެދާނެ ގޮތްތައް ކަމަށް އެބޭފުޅާއަށް ވިސްނިވަޑައިގަންނަވާ ބައެއް ކަންކަން ހިއްސާ ކުރައްވާފަ އެވެ.

"އަޅުގަނޑުމެން ދެކުނީމު އެގޮތަށް އެއްޗެހި ކިޔައިގަނެގެން އެންމެ ފަހުން އިންޑިއާ އެމްބަސީ ހުރެފަ މި ރާއްޖޭގައި ބަޣާވާތަކުން ވެރިކަން ވެއްޓުނީމަ، އެތައް ދުވަހެއް ވަންދެން އިންޑިއާއަށް މީހަކަށް ދެވެނީ އެއް ނޫން. ބޭހެއް ކުރެވެނީ އެއް ނޫން. ފިޔައެއް ނުގަނެވޭ. ކުކުޅުބިހުގެ ދެ ގޮބަޅި ލައިގެނެއް ނައި މާލެއަކަށް. އަޅުގަނޑަށް ހީވަނީ އިންޑިއާ މީހުން މިތަނުން ބާލާކަމަށް ވަނީނަމަ ބާލަން ޖެހޭނީ ފުރަތަމަ ޓީޗަރުން. ދެން ކިޔަވާ ދޭނެ ކުއްޖަކު ނޯންނާނެ. ބާލަން ގޮވާލާއިރު ފަޅާފަ ޑރ ގޮސްފިއްޔާ ކިޑްނީގެ އެއްބައި އޮންނާނީ ފަޅާފަ އެމީހާ ވާނީ މަރު. ބާލަންޏާ ބާލަން ޖެހޭނީ އެގޮތަށްތާ. އަޅުގަނޑުމެން ނުދަންނަން ދެން އެހެން ގޮތަކަށް ބާލާ ގޮތްގޮތެއް"

ރީކޯ މޫސާ މަނިކު

މި ސަރުކާރުން އިންޑިއާއާއެކު ތަފާތު ގިނަ އެއްބަސްވުންތަކެއް ހަދާފައިވާއިރު، އެ އެއްބަސްވުންތަކުގައި ރާއްޖޭގެ މިނިވަންކަމާއި އިސްތިގުލާލަށް ބުރޫއަރާ ކަންތައްތަކެއް ހިމަނާފައިވާ ކަމަށް އިދިކޮޅުން އަންނަނީ ތުހުމަތުކުރަމުން ނެވެ.

އިންޑިއާ ސިފައިން ރާއްޖޭގައި ތިބި އަދަދު މިހާތަނަށް ސަރުކާރުން ހާމަކޮށްފައި ނުވާއިރު، އިންޑިއާއިން ރާއްޖެއަށް ހަދިޔާކޮށްފައިވާ ދެ ހެލިކޮޕްޓަރު ބެލެހެއްޓުމަށް އެ ގައުމުގެ 24 ސިފައިން ރާއްޖޭގައި ތިބިކަމަށް ޑިފެންސް މިނިސްޓަރު މާރިޔާ ދީދީ ވަނީ ވިދާޅުވެފަ އެވެ.

އޭގެ އިތުރުން އުތުރުތިލަފަޅު އެއްބަސްވުމުގެ ހަށުންނާއި، ހައިޑްރޯގްރަފީ އެއްބަސްވުމުގެ ދަށުން ވެސް އިންޑިއާ ސިފައިން ރާއްޖޭގައި ހަރަކާތްތެރިވަމުން އަންނަކަމަށް ގިނަ ތުހުމަތުތަކެއް ދަނީ ކުރެވެމުންނެވެ.

އިންޑިއާ ސިފައިން ރާއްޖޭގައި ތިބި އަދަދު ހާމަކުރުމަކީ ޤައުމީ ސަލާމަތަށް ކުރައްވާނެ ކަމެއްކަން ފާހަގަކޮށް ޑިފެންސް މިނިސްޓްރީން އެ މައުލޫމާތުތައް ހާމަކުރުމަށް ދެކޮޅު ހަދާފައިވާއިރު، ރިޔާސީ އިންތިޚާބުގެ ފުރަތަމަ ބުރު ނިމުމާއި ގުޅިގެން ސަރުކާރުން ވަނީ ރާއްޖޭގައި އިންޑިއާ ސިފައިން ހަރަކާތްތެރި ވަމުން ނުދާކަމަށް ބުނެފަ އެވެ.

އިންޑިއާ ސިފައިން ރާއްޖޭގައި ނެތްކަމަށް ސަރުކާރުން ބުނެފައިވަނީ، ރިޔާސީ އިންތިޚާބުގެ ފުރަތަމަ ބުރުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް އަންދާޒާކުރި ވަރަށް ވުރެ ދަށް ނަތީޖާއެއް ލިބިގެން ދިޔަ މައިގަނޑު ސަބަބަކީ ގަވައިދާއި ޚިލާފަށް ރާއްޖޭގައި ހަރަކާތްތެރިވަމުން އަންނަ އިންޑިއާ ސިފައިންގެ މައްސަލައިގައި އިދިކޮޅުން ދައްކަމުންދާ ވާހަކަތަކަށް އެކަށީގެންވާ ރައްދެއް ނުދެވުމުންކަމަށް ސިޔާސީ މަޝްރަހު ދިރާސާ ކުރައްވާ ފަރާތްތަކުން ބުނެފައިވަނިކޮށެވެ.