އަލީ އާޒިމް އެމްޑީޕީން ވަކިކޮށްފި
މޯލްޑިވްސް ޑިމޮކްރެޓިކް ޕާޓީ (އެމްޑީޕީ) ގެ މެމްބަރު އަދި ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު ޢަލީ ޢާޒިމް ޕާޓީއިން ވަކިކޮށްފިއެވެ.
އެމްޑީޕީގެ އިސް އޮފިޝަލަކު ވޮއިސް އަށް މައުލޫމާތު ދީފައިވާ ގޮތުގައި ޢާޒިމް ޕާޓީގެ މެމްބަރު ކަމުން ވަކިކުރީ ޗާގޯސް މައްސަލައިގައި އުފައްދަފައިވާ ކޯލިޝަންއިން ރޭ ބޭއްވި ނޫސް ވެރިންގެ ބައްދަލުވުމުގައި ބައިވެރިވުމާއި، ބަންޑާރަ ނައިބް އިބްރާހިމް ރިއްފަތް ގެ އިތުބާރުނެތް ކަމުގެ މައްސަލަ މަޖިލީހަށް ހުށައެޅުމަށް ސޮއި ކުރެވުނު ޕެޓިޝަންގައި އޭނާ ސޮއި ކޮށްފައި ވާތީއެވެ.
އާޒިމާމެދު ފިޔަވަޅު އެޅުމަށް ޕީޖީ ގްރޫޕުން ފޮނުވި މައްސަލައިގައި، ޕާޓީގެ ފިޔަވަޅުއަޅާ ކޮމިޓީން މިއަދު ހަވީރު ބައްދަލުކޮށް އޭނާ ވަކިކުރަން ނިންމަފައިވާ ކަަމަށް އެމްޑީޕީގެ އިސް އޮފިޝަލަކު ވަނީ ވޮއިސް އަށް ވިދާޅުވެފައެވެ.
ޢާޒިމް އެމްޑީޕީ އިން ވަކިކުރީ އެ ޕާޓީގެ އަސާސީ ގަވާއިދުގެ 19 ވަނަ މާއްދާ އާއި 20 ވަނަ މާއްދާގެ ދަށުން ކަމަށް ވޮއިސް އަށް މައުލޫމާތު ދެއްވި އެމްޑީޕީގެ އިސް އޮފިޝަލް ބުނެފައިވެއެވެ.
އެމްޑީޕީގެ ޤަވާއިދުގެ 19 ވަނަ މާއްދާގައި ބުނަނީ އެމްޑީޕީގެ މެމްބަރަކު އެހެން ސިޔާސީ ޕާޓީއެއްގައި ބައިވެރިވެއްޖެ ނަމަ ނުވަތަ ހަރަކާތްތެރިވެއްޖެ ނަމަ ޕާޓީން ވަކިވާނެ ކަމަށެވެ.
އަދި ޤަވާއިދުގެ 20 ވަނަ މާއްދާގައި ބުނެފައި ވަނީ ޕާޓީގެ މަސްލަހަތު ގެއްލުވާލުމަށް މަސައްކަތްކުރާ މެމްބަރެއް ނަމަ ވަކި ކުރެވޭނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
