ޗެމްޕިއަންސް ލީގު: ޗެލްސީއިން އައު ކޯޗާއި އެކު ކުޅުނު ފުރަތަމަ މެޗު އެއްވަރު

ޗެލްސީއިން އެ ޓީމުގެ އައު ކޯޗު ގްރެހަމް ޕޮޓާ އާއި އެކު ކުޅުނު ފުރަތަމަ މެޗު އެއްވަރު ވެއްޖެއެވެ. ޗެމްޕިއަންސް ލީގު ގްރޫޕް ސްޓޭޖުގައި ޗެލްސީއިން ސާލްޒްބާގް އާއި ދެކޮޅަށް ކުޅުނު މި މެޗު އެއްވަރުވެފައިވަނީ 1-1 ގެ ނަތީޖާއަކުންނެވެ.

ޓްރާންސްފާ މާކެޓުގައި އެންމެ ބޮޑު ހަރަދެއްކޮށް އެދެވޭ ނަތީޖާއެއް ނުނެރެވުމުން އޭރު ކޯޗު ކަމުގައި ހުރި ޓުޝެލް ވަކިކޮށް ޕޮޓާ އަށް އެ މަގާމު ދިނީ މި މަހުގެ 8 ވަނަ ދުވަހުއެވެ. ނަމަވެސް އިނގިރޭސި ރާނީ އަވަހާރަ ވުމާއި ގުޅިގެން ޕްރިމިއާ ލީގުގެ މިދިޔަ ހަފްތާ ބަންދުގެ މެޗުތައް ކެންސަލް ކުރުމާއި ގުޅިގެން އޭނާގެ ކޯޗު ކަމުގައި ޗެލްސީއިން ފުރަތަމަ ކުޅެން ޖެހުނީ ޗެމްޕިއަންސް ލީގުގައި ރޭ ކުޅުނު މެޗެވެ.

މެޗާސްފަހު ވާހަކަ ދައްކަމުން ޕޮޓާ ބުނެފައިވަނީ ރޭގެ މެޗުގައި އޭނާގެ ޓީމުން ފެނިގެން ގޮސްފައިވަނީ ދަށް ކުޅުމެއް ނޫން ކަމަށާއި ކުރިއަށް އޮތްތަނުގައި ޓީމު އިތުރަށް ރަނގަޅުވާނެ ކަމަށެވެ.

ޗެލްސީގެ ދަނޑުގައި ކުޅުނު މި މެޗުގެ ފުރަަތަމަ ހާފުގައި ގޯލެއް ފެނިގެން ގޮސްފައެއް ނުވެއެވެ. ދެވަނަ ހާފުގައި ފުރަތަމަ ގޯލު ޖަހައި ލީޑު ނެގީ ޗެލްސީއިންނެވެ. މެޗުގެ 48 ވަނަ މިނަޓުގައި އެ ޓީމަށް ލީޑު ނަގައިދިނީ ރަހީމް ސްޓާލިން އެވެ. ނަމަވެސް މެޗުގައި ސާލްޒްބާގް އިން ކުރަމުންދިޔަ ކައުންޓާ އެޓޭކުތައް ވަރުގަދަކޮށް މެޗުގެ 75 މިނަޓުގައި އެ ޓީމުގެ އޮކަފޮރް ވަނީ ނަތީޖާ ހަމަހަމަ ކޮށްދީފައެވެ.

މި ގްރޫޕުގައި ދެން ހިމެނޭ އޭސީ މިލާން އަދި ޑައިނަމޯ ކުޅުނު މެޗު 3-1 ގެ ނަތީޖާއަކުން ކާމިޔާބު ކޮށްފައިވަނީ އޭސީ މިލާނުންނެވެ. މި ނަތީޖާ ތަކާއި އެކު ދެ މެޗުން ހަތަރު ޕޮއިންޓު ހޯދައިގެން އެއްވަނައިގައި އޭސީ މިލާން އޮތްއިރު، ތިން ޕޮއިންޓާއި އެކު ދެވަނައިގައި އޮތީ ޑައިނަމޯއެވެ. ދެ ޕޮއިންޓާއި އެކު ސާލްޒްބާގް ތިންވަނައިގައި އޮތްއިރު މި މުބާރާތް 2021 ވަނަ އަހަރު ކާމިޔާބުކުރި ޗެލްސީ އޮތީ ގްރޫޕުގެ ފުލުގައެވެ.