ދެވަނަ ބުރުގައި ރައީސް ޞާލިހަށް ކާމިޔާބީ ލިބުމަކީ ނާދިރު ކަމެއް: ރައީސް ނަޝީދު

ރިޔާސީ އިންތިހާބުގެ ދެވަނަ ބުރުގައި އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ޞާލިހަށް ކާމިޔާބީ ލިބުމަކީ ވަރަށް ނާދިރު ކަމެއް ކަމަށް އެ ޕާޓީގެ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު މިއަދު ކުރެއްވި ޓުވީޓެއްގައި ވިދާޅުވީ ދެވަނަ ބުރެއްގައި ރައީސް ސޯލިހަށް ކާމިޔާބު ލިބުމަކީ ވަރަށް ނާދިރު ކަމެއް ކަމަށެވެ. އަދި އެމްޑީޕީން މިވަގުތު ވިސްނަންވީ އުފެދެން އުޅޭ ރިޔާސަތުގެ ބާރުތަކާ ގުޅޭގޮތުން ކަމަށް ވިދާޅުވި އެވެ.

ރިޔާސީ އިންތިހާބުގެ ފުރަތަމަ ބުރުގެ ނަތީޖާއިން ދައްކާ ގޮތުން، ރައީސް ސާލިހާއި އިދިކޮޅު ކެންޑިޑޭޓް ޑރ. މުހައްމަދު މުއިއްޒާ ދެމެދު 15،000 ވުރެ ގިނަ ވޯޓުގެ ފަރަގު އެބަ އޮތެވެ. އެއީ ހަތް ޕަސެންޓުގެ ފަރަގެކެވެ.

މުއިއްޒަށް ލިބިވަޑައިގެންނެވީ 100,122 ވޯޓެވެ. އެއީ 46.07 ޕަސެންޓެވެ. ރައީސް ސާލިހަށް 84,997 ވޯޓު ލިބިވަޑައިގެންނެވިއެވެ. އެއީ 39.11 ޕަސެންޓް ވޯޓެވެ.

އެހެންކަމުން ރިޔާސީ އިންތިހާބުގެ ދެވަނަ ބުރަށް ކޯލިޝަން ހެދުމާއި ގުޅޭ ގޮތުން އެމްޑީޕީން ވެސް، ރައީސް ނަޝީދުގެ ޑިމޮކްރެޓްސްއާ މަޝްވަރާ ކުރަމުންދާއިރު އެޕާޓީން ބޭނުންވަނީ ދެވަނަ ބުރުގެ ކުރިން ނިޒާމީ ވޯޓެއް ނެގުމަށް ކަމުން، އެ ޝަރުތު ވަނީ ކަނޑައަޅައިފައެވެ. އެގޮތުން އެ ވޯޓު މިމަހު 25 ގައި ނެގުމަށްވެސް އެ ޕާޓީން އަންނަނީ ގޮވާލަމުންނެވެ.