13 އަހަރަށް ފަހު އިންޓަ މިލާން، ޗެންޕިއަންސް ލީގު ފައިނަލަށް!

ޔޫއެފާ ޗެންޕިއަންސް ލީގުގެ ދެވަނަ ލެގުގައި މިރޭ ވާދަވެރި އޭސީ މިލާން 1-0 ގެ ނަތީޖާއަކުން ބަލިކޮށް، މުބާރާތުގެ ފައިނަލުގެ ފުރަތަމަ ޖާގަ އިންޓަ މިލާނުން ހޯދައިފިއެވެ.

މިދެ ޓީމު މިދިޔަ ހަފްތާގައި ކުޅުނު ފުރަތަަމަ ލެގުގެ މެޗު 2-0 ގެ ނަތީޖާއަކުން އިންޓަމިލާން ކާމިޔާބުކޮށްފައި އޮތުމުން މިރޭގެ މެޗު އެއްވަރުކޮށްލައިގެން ވެސް ފައިނަލަށް ދިއުމުގެ ފުރުސަތު އެޓީމަށް އޮތެވެ.

މިރޭގެ މެޗުގެ ކުރިން މި ދެޓީމު އެންމެ ފަހުން ކުޅުނު ތިން މެޗުވެސް އިންޓަ މޮޅުވެފައިވާއިރު، އެތިން މެޗުގައި އެޓީމުކޮޅަށް އޭސީ މިލާނަށް އެންމެ ލަނޑެއް ވެސް ކާމިޔާބުކުރެވިފައި ނުވެއެވެ. ނަމަވެސް މިރޭގެ މެޗުގައި ވަރުގަދަކޮށް ފެށީ އޭސީ މިލާނުންނެވެ. މިގޮތުން ފުރަތަަމަ ހާފުގެ 11 ވަނަ މިނެޓުގައި އެޓީމުގެ  ޒުވާން ފޯވާޑް ބްރަހިމް ޑިއާޒްއަށް ވަނީ ލަނޑުޖަހާނެ ރަގަޅު ހުސް ފުރުސަތެއްލިބިފައެވެ. ނަމަވެސް އޭނާ ފޮނުވާލި ހަމަލާ އިންޓަ މިލާންގެ ކީއްޕަރު ހުޝިޔާރުކަމާއެކު ދިފާއުކޮށްފައެވެ.

މީގެއިތުރުންވެސް ފުރަތަމަ ހާފުގެ 38 ވަނަ މިނެޓުގައި އޭސީ މިލާނުގެ ޕޯޗުގަލް ފޯވާޑް ރަފައެލް ލިއައޯ އަށް ވަނީ ލަނޑު ޖަހާނެ ރަގަޅު ހުސް ފުރުސަތެއް ލިބި ބޭނުން ނުކުރެވިފައެވެ. މިހާފުގައި އިންޓަ މިލާނުން އެންމެ ހުސް ފުރުސަތެއް ލިބުނީ އެޓީމުގެ ތަޖުރިބާކާރު ފޯވާޑް އެޑިން ޖެކޯ އަށެވެ. އޭސީ މިލާނުގެ ހާފުތެރެއިން އެޓީމަށް ލިބުނު ހިލޭ ޖެހުމަކުން ގޯލު ކުރިމައްޗަށް ހުރަސްކޮށްދިން ބޯޅައެއް ޖެކޯ ބޮލުން ފޮނުވާލުމުން އޭސީ މިލާނުގެ ގޯލްކީޕަރު ވަނީ އެބޯޅަ ދިފާއުކޮށްފައެވެ.

މި މެޗުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ 74 ވަނަ މިނެޓުގައި އިންޓަ މިލާނަށް ކާމިޔާބުކޮށްދިނީ އެޓީމުގެ އާޖެންޓީނާ ފޯވާޑް ލައުޓާރޯ މާޓިނޭޒް އެވެ. މިއީ އެޓީމުގެ ބެލްޖިއަމް ފޯވާޑް ރޮމެލޫ ލުކާކޫ މުޅިން ހުސްކޮށްލާފައި ޖައްސާލި ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މުބާރާތުގެ ފައިނަލްގައި އިންޓަ މިލާން ވާދަކުރަންޖެހެނީ ސެމީ ފައިނަލް ދެވަނަ މެޗުގެ ދެވަނަ ލެގުގައި މާދަމާ ރޭ ރެއާލް މެޑްރިޑާއި މެންޗެސްޓާ ސިޓީ ވާދަކުރާ މެޗުން މޮޅުވާ ޓީމަކާއި ދެކޮޅަށެވެ. މި މުބާރާތުގެ ފައިނަލުގައި އިންޓަ މިލާން އެންމެ ފަހުން ވާދަކޮށްފައިވަނީ 2010 ވަނަ އަހަރުގައެވެ. އެފަހަރު ޑިއޭގޯ މިލިޓޯގެ ދެ ލަނޑުން ބަޔާން މިއުނިކް ބަލިކޮށް މުބާރާތުގެ ޗެމްޕިއަންކަން ހޯދީ އިންޓަ މިލާން އެވެ.