ބައެއް ކުޅުންތެރިން ބަދަލު ކޮށްފިން؛ މިކުޅެނީ އެޓޭކް މޯޑުގައި: ރައީސް ޞާލިހު
ދެވަނަ ބުރަށް ނުކުންނަވަނީ ބުންވަރު ހުރި ކުޅުންތެރިން ކުރިއަށް ނެރުއްވަައިގެން، "އެޓޭކް މޯޑުގައި" ކަމަށް އެމްޑީޕީީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ އިންތިހާބުގެ ދެވަނަބުރުގެ ކެމްޕެއިންގައި ރޭ ސޯސަން ޖަގަހައިގައި ކުރިޔަށްގެންދިޔަ ބައްދަލުވުމުގައި ސަޕޯޓަރުންނާ ބައްދަލުކުރައްވާ ވާހަކަދައްކަވަމުންރައީސް ވިދާޅުވީ، މެޗްގެ ފުރަތަމަ ހާފް ނިމިއްޖެކަމަށާއި ބައެއް ފަހަރު ފުރަތަމަ ހާފުގައި ތިން ލަނޑު އެއް ލަނޑުން، ހަތަރު ލަނޑު އެއް ލަނޑުން ބަލިވެ, އިދިކޮޅު ޓީމު މޮޅުވާކަމަށެވެ. އެގޮތުން މިހާރު އެމްޑީޕީގެ ކޯލިޝަން މިއޮތީ ތިނެއް އެކެއްގެ ތަފާތެއްގައި ކަމަށް ރައީސް ވިދާޅުވިއެވެ.
އެހެންނަމަވެސް ދެވަނަ ހާފުގައި ނިކުމެ މޮޅުވާނެކަމަށް ރައީސް ޞާލިހު ވިދާޅުވިއެވެ.
"އިރާދަކުރެއްވިއްޔާ ދެ ވަނަ ހާފްގައި އަޅުގަނޑުމެން ނިކުމެ ނަތީޖާ ހަމަހަމަކޮށް އިތުރު ދެ ލަނޑުޖަހާ ފަސް ލަނޑު ދެލަނޑުން އިރާދަކުރެއްވިއްޔާ މިމެޗް އަޅުގަނޑުމެން ކާމިޔާބުކުރާނަން."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހް އިތުރަށް ވިދާޅުވީ ހާފް ޓައިމްގައި ޗޭންޖިން ރޫމަށް ވަދެ ދެވަނަ ހާފް ކުޅޭނެ ގޮތް ރާވާލާފައިވާ ކަމަށެވެ. އަދި ފުރަތަމަ ހާފްގައި ކުޅުން ކުރިއަށް ގެންދެވި ގޮތަށް ބަދަލުތަކެއް ގެނެސްފައިވާ ކަމަށެވެ. އެ ގޮތުން ބައެއް މަގާމުތަކަށް ބަދަލު ގެންނަވާ ބުންވަރު ހުރި ބޭފުޅުން ކުރިއަށް ނެރުއްވާފައިވާ ކަމަށެވެ.
"ހާފް ޓައިމްގައި އަޅުގަނޑުމެން ޗޭންޖިން ރޫމަށް ވަދެ ރާވާލައިފިން. ދެވަނަ ބުރު އަޅުގަނޑުމެން ކުޅޭނެ ގޮތް އިންތިޒާމު ކޮށްލައިފިން. ބައެއް ފަހަރު ބައެއް މަގާމުތަކަށް ކުޅޭ މީހުން ބަދަލުކޮށްލައިފިން. ބުންވަރު ހުރި މީހުން އަޅުގަނޑުމެން ކުރިއަށް ނެރެފިން. މިހާރު މިދަނީ އެޓޭކު މޯޑުގައި. އިރާދަކުރެއްވިއްޔާ ދެން ޖަހާނީ ގޯލު. ދެން ޖަހާނީ ގޯލު، ގޯލަކަށް ފަހު ގޯލު ދެން ޖަހާނީ،"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
އެހެންކަމުން ދެވަނަ ބުރު ބޮޑު ތަފާތަކުން ކާމިޔާބު ކުރައްވާނެ ކަމަށް އެމަނިކުފާނު ވިދާޅުވި އެވެ.
ރައީސް ޞާލިހް ވިދާޅުވީ ފުރަތަމަ ބުރުގައި ބަލިވީ ރީ ރެޖިސްޓްރޭޝަން ގެ މައްސަލައާއި ހެދި ކަމަށާއި، އެހެންކަމުން ހުރިހާ ދާއިރާއަކުން ވެސް އެކަން ވަރަށް ރަނގަޅަށް ކުރަން ޖެހޭ ކަމަށެވެ. އަދި ރީ ރަޖިސްޓްރީ އަށްފަހު ޑޯޓުޑޯ ކެމްޕޭނަަށް ނުކުންނަވަންޖެހޭ ކަމަށްވެސް އެމަނިކުފާނު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
