އެމްޓީސީސީ އިން ސްޕޯޓްސްފިޝިން އަށް ޚާއްސަ ލޯންޗެއް މާކެޓަށް ނެރެފި

މިހާރު ކުރިއަށްދާ މޯލްޑިވްސް މެރިން އެކްސްޕޯ ގައި އެމްޓީސީސީ އިން ސްޕޯޓްސްފިޝިން އަށް ޚާއްސަ ލޯންޗެއް މާކެޓަށް ނެރެފިއެވެ.

އެމްޓީސީސީ އިން ބުނީ މިއަހަރުގެ މެރިން އެކްސްޕޯގައި ބައިވެރިވެފައިވަނީ ވަރަށް ގިނަ ޕްރޮޑަކްޓު ތަކަކާއި އެކުކަމަށެވެ. އަދި އައު ޕްރޮޑަކްޓްސް ތަކެއްވެސް ލޯންޗު ކޮށްފައިވާ ކަމަށް އެމްޓީސީސީ އިން ބުނެފައިވެއެވެ.

ކޮންމެ އަހަރަކުވެސް މެއިން ސްޕޮންސާގެ ގޮތުން މެރިން އެކްސްޕޯގައި ބައިވެރިވާ އެމްޓީސީސީ އިން މިހާރު ރާއްޖޭގައި ހުރި އެންމެ ބޮޑު ޔަންމާގެ އިންޖީނު މިއަހަރުގެ އެކްސްޕޯގައި ވަނީ މާކެޓަށް ނެރެފައެވެ. އަދި އެ އިންޖީނަކީ 1400 ހޯސް ޕަވަރުގެ އިންޖީނެއްކަމަށާއި އެ އިންޖީނު އެކްސްޕޯގެ ތެރެއިން ފެނިގެންދާނެ ކަމަށް އެމްޓީސީސީއިން ބުނެއެވެ.

މި އެކްސްޕޯގައި މާކެޓަށް ނެރެވުނު ސްޕޯޓްސްފިޝިން ލޯންޗާއި ބެހޭ އިތުރު މައުލޫމާތު ހިއްސާކުރަމުން އެމްޓީސީސީ އިން ބުނީ އެ ލޯންޗަކީ ޖަޕާނުގެ ޔަންމާ އިން ބަނދެގެން ގެންނަ ލޯންޗެއް ކަމަށާއި އެ ލޯންޗުގައި އިންބޯޑް އިންޖީނެއް ހުންނާނެ ކަމަށެވެ.

އަދި މި ލޯންޗުގެ ސަބަބުން ރާއްޖޭގެ ރިކްރިއޭޝަނަލް މަސްވެރިކަމަށް ވަރަށް ބޮޑު ކުރިއެރުމެއް ލިބިގެންދާނެ ކަމަށެވެ.

އެމްޓީސީސީ އިން ބުނީ ގަންނަންދާ ފައިސާގެ ޢަދަދު ބޮޑު ވިނަމަވެސް މި ލޯންޗަކީ އޮޕްރޭޝަނަލް ކޯސްޓް ވަރަށް ކުޑަ ލޯންޗެއް ކަމަށެވެ. އަދި މިވަގުތު އެކުންފުނިން ތަޢާރަފް މިކުރަނީ 23 ފޫޓޫގެ ލޯންޗެއް ކަމަށާއި އަދި މިލޯންޗުގައި 7 މީހުންގެ ޖާގަ އޮންނާނެ ކަމަށް އެމްޓީސީސީ އިން ބުނެއެވެ. އަދި ޔަންމާ ކުންފުނީގައި 23 ފޫޓޫން ފެށީގެން 46 ފޫޓުގެ މަސްވެރިކަމަށް ބޭނުންކުރާ މިފަދަ ލޯންޗު ހުންނަކަން ފާހަގަކުރިއެވެ.

އެކްސްޕޯގެ އެމްޓީސީސީގެ ސްޓޯލް އިން މިވަގުތު އެމްޓީސީސީގައި ވިއްކާ ހުރިހާ ސުޒުކީ އައުޓްބޯޑް އިންޖީނެއްވެސް ފެންނަން ހުންނާނެ ކަމަށް އެމްޓީސީސީއިން ބުނެއެވެ. 2.5 ހޯސްޕަވަރުން ފެށިގެން 325 ހޯސް ޕަވަރުގެ އިންޖީނު އެމްޓީސީސީ އިން ވިއްކާ ކަމަށް އެކުންފުނިން ފާހަގަ ކުރެއެވެ. އަދި މިވަގުތު ރާއްޖޭގެ ކޮމާޝަލް ދާއިރާގެ އެންމެ ޑިމާންޑު ބޮޑު އިންޖީނަކީ ސުޒުކީގެ 325 ހޯސް ޕަވަރުގެ އިންޖީނު ކަމަށާއި އަދި އެއީ މިވަގުތު ރާއްޖޭގައި ވިއްކާ އެންމެ ތެލުގެ ޚަރަދު ކުޑަ އިންޖީނު ކަމަށްވެސް ބުނެފައިވެއެވެ.

އެކްސްޕޯ ކުރިއަށްދާއިރު ރޯދައަށް ޚާއްސަ ކޮށްގެން އެމްޓީސީސީ ޝޯރޫމްގައި ބޮޑެތި ޑިސްކައުންޓްތަކާއި އެކު ޕްރްމޯޝަން އެއްކުރިއަށް ދާ ކަމަށްވެސް އެމްޓީސީސީ އިން ބުނެއެވެ.

އެމްޓީސީސީގެ މެރިން އެކްސްޕޯ ސްޓޯލް އޮތީ ކަސްޓަމަރުންނަށް ބޭނުންވަ ހުރިހާ މައުލޫމާތެއް އެރުވޭގޮތަށް ތައްޔާރަށް ކަމަށް އެކުންފުނިން ބުނެއެވެ.