ދެވަނަ ބުރަށްފަހު ނިޒާމީ ވޯޓުނަގަން ރައީސް ޞާލިހު އެއްބަސްވެއްޖެ

މި މަހުގެ 30 ގައި ބާއްވާ ރިޔާސީ އިންތިޚާބުގެ ދެވަނަ ބުރަށް ފަހު، ދައުރު ނިމުމުގެ ކުރިން ރާއްޖޭގައި އޮންނަން ފެންނަ ވެރިކަމުގެ ނިޒާމާއި ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދަ ޑިމޮކްރެޓްސްއަށް ހުށައަޅުއްވައިފި އެވެ.

ރިޔާސީ އިންތިޚާބުގެ ދެވަނަ ބުރު ކާމިޔާބުކުރެވޭނީ ގިނަ ބަޔަކު ގުޅިގެންކަމަށް ރައީސް ޞާލިހު ވިދާޅުވި ނަމަވެސް، މިހާތަނަށް އެއްވެސް ސިޔާސީ ޕާޓީއަކުން އެމްޑީޕީއާއެކު ކޯލިޝަން ހެދުމަށް އެއްބަސްވެފައެއް ނުވެއެވެ. އެހެންކަމުން މިހާލަތުގައި އެމްޑީޕީން ވަކިވެ އާ ސިޔާސީ ޕާޓީއެއްގެ ގޮތުގައި ރިޔާސީ އިންތިޚާބުގައި ވާދަކޮށް ގިނަ ވޯޓުތަކެއް ހޯދާފައިވާ "ދަ ޑިމޮކްރެޓްސް" ގެ ރުހުން ދެވަނަ ބުރު ކާމިޔާބު ކުރުމަށްޓަކައި ރައީސް ޞާލިހަށް ވަރަށް މުހިންމުވާނެ ކަމަށް ގިނަ ބަޔަކު ޤަބޫލުކުރެއެވެ.

ކޯލިޝަން ހެދުމަށް ދަ ޑިމޮކްރެޓްސްގެ އެންމެ ބޮޑު ޑިމާންޑަކަށް އޮތީ ނިޒާމީ ވޯޓު ނެގުމެވެ.

މި ކަމާއި ގުޅޭގޮތުން ރައީސް ޞާލިހު މިއަދު ނޫސްވެރިންނަށް ދެއްވި އިންޓަވިއުއެއްގައި ވިދާޅުވީ ނިޒާމީ ވޯޓު ނެގުމުގެ ކަންކަމާއި ގުޅިގެން އެމަނިކުފާނު ރައީސް ނަޝީދަށް ފޯނުން ގުޅުއްވާ ވާހަކަދައްކަވާފައިވާ ކަމަށެވެ.

ދަ ޑިމޮކްރެޓްސްއިން ބޭނުންވަނީ ރާއްޖޭގައި އޮންނަން ފެންނަ ވެރިކަމުގެ ނިޒާމާއި ގުޅޭގޮތުން ރައްޔިތުންގެ ޚިޔާލު ހޯދުމަށް ފެންނަ ނުފެންނަ ވޯޓެއް ނެގުމަށް ކަމަށާއި، އަދި އެކަން މި މަހުގެ 25 ގެ ކުރިން ކުރުމަށް އެ ޕާޓީން ބޭނުންވާކަން ރައީސް ޞާލިހުގެ ވާހަކައިގައި ފާހަގަކުރެއްވި އެވެ.

އެއާއެކު ރައީސް ޞާލިހު ވިދާޅުވީ މި މަހުގެ 25 ގައި ނިޒާމީ ވޯޓެއް ނެގުމަކީ ކުރެވޭނެ ކަމެއް ނޫންކަމަށް މިހާރު ދަންނަވާފައިވާނެ ކަމަށެވެ. އެހެން ނަމަވެސް ރިޔާސީ އިންތިޚާބުގެ ދެވަނަ ބުރަށްފަހު ނިޒާމީ ވޯޓެއް ނެގޭނެ ގޮތަކާއި ދޭތެރޭ މަޝްވަރާކޮށް ތާރީޚެއް ކަނޑައެޅުމަށް މިހާރު ހުށައަޅުއްވާފައިވާނެ ކަމަށް ރައީސް ޞާލިހު ވިދާޅުވި އެވެ.

"އެއީ މިހާރު މަޖިލީހުގައި އެބައޮތް ނިޒާމާ ގުޅޭ ގަރާރެއް. އަޅުގަނޑު ދެންނެވިން އެ ފާސް ކޮށްފައި އަޅުގަނޑަށް ފޮނުވާށޭ. ފޮނުވީމާ އަޅުގަނޑު ލިޔުމަކުން އިލެކްޝަންސް ކޮމިޝަނަށް ރިކުއެސްޓު ކުރާނަމޭ މިވެނި ތާރީހެއްގައި އެ ވޯޓު ނަގައިދޭން"

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު

ރައީސް ޞާލިހު އެފަދައިން ވިދާޅުވުމުން ނޫސްވެރިއަކު ވަނީ މި ދައުރުގައި އެކަން ކުރައްވާނަންތޯ ސުވާލުކޮށްފައެވެ. އަދި އެ ސުވާލަށް ޖަވާބުދެއްވަމުން ރައީސް ޞާލިހު ވިދާޅުވީ ރިޔާސީ އިންތިޚާބުގެ ދެވަނަ ބުރު ނިމުމަށްފަހު ނޮވެމްބަރު 17 ގެ ކުރިން ނިޒާމީ ވޯޓު ނަންގަވަން އެއްބަސްވެވަޑައިގެން އެފަދައިން ހުށައަޅުއްވާފައިވާނެ ކަމަށެވެ.

އޭގެ އިތުރުން ރައީސް ޞާލިހު ވިދާޅުވީ އެހާ ދުވަސްކޮށްފައި އެ ދެބޭފުޅުން ސިޔާސީ މަޝްވަރާއެއް ކުރުމަށް ވާހަކަފުޅު ދައްކަވާފައި ވީނަމަވެސް، ދުރުކަން އިހުސާސް ނުކުރެވޭކަމަށެވެ. އަދި އެމްޑީޕީއާއި ޑިމޮކްރެޓްސްއަށް އެކުގައި މަސައްކަތް ކުރެވޭނެ ކަމަށާއި، އެ ބާރު އޮތީވެސް ދަ ޑިމޮކްރެޓްސްގެ އަތްމަތީގައި ކަމަށް ރައީސް ޞާލިހު ވިދާޅުވި އެވެ.

ރިޔާސީ އިންތިޚާބުގެ ދެވަނަ ބުރުގައި ދަ ޑިމޮކްރެޓްސް އެމްޑީޕީއާއި ގުޅިގެން ދިއުމަކީ އެ ޕާޓީއަށް ލިބޭނެ ކާމިޔާބީއެއްގެ ގޮތުގައި ރައީސް ޞާލިހު ވަނީ ސިފަކުރައްވާފަ އެވެ. އަދި އެ ހިސާބުން ޕާޓީއަށް ލިބޭ ވޯޓު އެތައް ގުނައެއް އިތުރުވެގެންދާނެކަމަށް ގަބޫލުކުރައްވާކަމަށް ވެސް ރައީސް ޞާލިހު ވިދާޅުވި އެވެ.