ގިނަ ބަހުސަށްފަހު ރައީސް ނަޝީދަށް ޖަވާބުދާރީވާން 30 މިނެޓް ދޭން ނިންމައިފި!

މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގައި ޖަވާބުދާރީވާން ރައީސް މުހައްމަދު ނަޝީދަށް 30 މިނެޓު ދިނުމަށް މަޖިލީހުގެ އާންމު ކޮމިޓީއިން ނިންމައިފިއެވެ.

އާންމު ކޮމިޓީން މިއަދު ބޭއްވި ބައްދަލުުވުމުގައި މަޖިލީހުގެ ރައީސަށް ޖަވާބުދާރީވާން 30 މިނެޓް ދިނުމަށާއި ކޮންމެ މެންބަރަކަށް ބަހުސް ކުރައްވަ ތިން މިނެޓް ދިނުމަށް ހުށަހެޅުއްވީ ފުނަދޫ ދާއިރާގެ އެމްޑީޕީގެ މެންބަރު މުހައްމަދު ޝާހިދެވެ. އޭނާގެ ހުށަހެޅުއްވުމުގައި ވަނީ އެ 30 މިނެޓް ދޭނެ އުސޫލުވެސް ހާމަކުރައްވާފައެވެ. އެއީ، ބަހުސް ފަށާއިރު 10 މިނެޓާއި މެދުތެރެއިން ދިހަ މިނެޓު އަދި ނިމޭއިރު 10 މިނެޓުގެ ވަގުތެއް ދިނުމެވެ.

ޝާހިދުގެ ހުށަހެޅުމަށް އެމްޑީޕީ މެންބަރުން ތާއީދުކުރެއްވި އިރު، ނަޝީދު ނިސްބަތްވެވަޑައިގަންނަވާ ދަ ޑިމޮކްރެޓްސް ޕީޖީ ލީޑަރު ޢަލީ ޢާޒިމް ވަނީ ޖަވާބުދާރީ ވުމަށް ނަޝީދަށް ދެ ތިން ގަޑިއިރު ދިނުމަށް ހުށަހަޅުއްވައިފައެވެ.

އަދި ރައްޔިތުންގެ މަޖިލީހުގެ ގަވައިދުގައި، އިތުބާރު ނެތް ކަމުގެ މައްސަލައިގައި ބަހުސް ތިން ގަޑިއިރަށް ވުރެ ދިގުވެގެން ނުވާނެ ކަމަށް އޮތަސް އެ ތިން ގަޑިއިރު މާނަކޮށްފައިވަނީ ހަމައެކަނި މެންބަރުން ކުރާ ބަހުސްގެ ވަގުތަށް ކަމަށާ އޭގެ ތެރޭގައި ރައީސް ދައްކަވާ ވާހަކަތައް ނުހިމެނޭނެ ކަމަށް އޭނާ ވިދާޅުވިއެވެ.

"ކުރިން ކޮށްފައި އޮންނަ ގޮތަށް ކުރާކަށް ނޫން މި އޮންނަނީ. ތި ބޭފުޅުން ދެއްވަން ނެތިއްޔާ އަޅުގަނޑުމެން ކުރާނެ ކަމެއް ނެތް. އަށްޑިހަ ހަތް މެންބަރުންގެ ލައްކަ ސުވާލު ވެސް ހުންނާނެ،" އާޒިމް ވިދާޅުވިއެވެ.

ހުޅުދޫ ދާއިރާގެ މެމްބަރު އިލްޔާސް ލަބީބުވެސް ވަނީ އާޒިމްގެ ވާހަކަތަކަށް ތާއީދުކޮށްފައެވެ. އަދި އެ މައްސަލައިގައި ގޮތް ނިންމުމުގެ އިހުތިޔާރު ކޮމިޓީއަށް އޮތްކަމަށްވެސް އަލިއެޅުއްވިއެވެ.