ފަލަސްތީން ރައްޔިތުންގެ ރައްކާތެރިކަމަށް އެދި ކޮންމެ ނަމާދެއްގައި ގުނޫތު ކިޔަން އަންގައިފި!
ފަލަސްތީނުގެ ރައްޔިތުންނަށް ރައްކާތެރިކަމާއި ސަލާމަތްކަން ދެއްވުން އެދި މާތް الله ގެ ހަޟުރަތުގައި ދެންނެވުމަށް ކޮންމެ ނަމާދެއްގައިވެސް ގުނޫތު ކިޔަން އިސްލާމިކް މިނިސްޓްރިން މިއަދު އަންގައިފި އެވެ.
ފަލަސްތީނުގެ ރައްޔިތުންގެ އަތުން ބިން ފޭރިގަނެގެން އެގައުމުގައި ދިރިއުޅެމުންދާ އިޒްރޭލުގެ ޔަހޫދީން ފަލަސްޠީނަށް އަމާޒުކޮށް ދެމުންދާ ވަރުގަދަ ހަމަލާތަކާ ގުޅިގެން ރާއްޖޭގައި އެންމެ ފުރަތަމަ ގުނޫތު ކިޔަން އެންގީ މިދިޔަ ބުދަ ދުވަހު އެވެ. އޭރު ގުނޫތު ކިޔަން އަންގާފައި އޮތީ ބާރަށް ކިޔަވާ ނަމާދުތަކުގައި އެކަންޏެވެ.
ނަމަވެސް މިފަހުން އިސްރާއީލުގެ ހަމަލާތައް އިތުރަށް ވަރުގަދަކޮށް ފައިވާއިރު، އިސްލާމިކް މިނިސްޓްރީން މިއަދު ކައުންސިލްތަކަށް ފޮނުވި ސާކިއުލާއެއްގައި ބުނީ، އިޒްރޭލުގެ ޔަހޫދީންގެ ފަރާތުން ފަލަސްތީނުގެ ރައްޔިތުންނަށް ލިބޭ އަނިޔާތަކާއި ލާއިންސާނީ އަމަލުތަކުން ސަލާމަތްކޮށް، އަމާންކަމާއި ކެތްތެރިކަމާއި ރައްކާތެރިކަން ދިނުމަށް އެދި މިސްކިތްތަކުގައި ގުނޫތު ކިޔަން ހަމަޖައްސާފައިވާ ކަމަށެވެ.
އެހެންކަމުން ފަރުޟު ފަސް ނަމާދުގެ ފަހު ރަކުއަތުގެ އިއުތިދާލުގައި ގުނޫތު ކިޔަން ހުރިހާ މިސްކިތެއްގެ އިމާމުންނަށް އެންގުމަށް މިނިސްޓްރީން ވަނީ އެދިފައިވެ އެވެ.
ފަލަސްތީނުގެ މިނިވަން ކަމަށްޓަކައި ޖިހާދު ކުރަމުންދާ ހަމާސް ޖަމާއަތުން އިޒްރޭލަށް މި މަހުގެ ހަތްވަނަ ދުވަހު ދިން ކުއްލި ހަމަލާތަކަށްފަހު އިޒްރޭލުން ވަނީ ފަލަސްތީނާ ދެކޮޅަށް ހަނގުރާމަ އިއުލާންކޮށްފަ އެވެ.
އެއާއެކު އިސްރާއީލުން އަންނަނީ ކެނޑިނޭޅި ފަލަސްތީނަށް ބޮނޑ އަޅަމުންނެވެ. މި ހަމަލާތަކުގައި 3,300 އަށްވުރެ ގިނަ މުސްލިމުން ޝަހީދުވެފައިވާއިރު އޭގެ ތެރެއިން 60 އިންސައްތަ އަށްވުރެ ގިނަ މީހުންނަކީ ކުޑަ ކުދިންނާއި އަންހެނުންނެވެ.
ރޭވެސް އިސްރާއީލުން ވަނީ ޣައްޒާގެ އުތުރުކޮޅުގައި ހުންނަ މައުމަދާނީ ހޮސްޕިޓަލް (އަލް އަހްލީ ހޮސްޕިޓަލް) އަށް ވަރުގަދަ ހަމަލާއެއް ދީފައެވެ. މި ހަމަލާގައިވެސް ފަލަސްތީނުގެ 500 އަށް ވުރެ ގިނަ މީހުން ޝަހީދުވެފައިވާއިރު، އެތައް ހާސް ބަޔަކު ވަނީ ޒަޚަމްވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
