ޖެނީންގައި ދިން ހަމަލާތަކެއްގައި ކުޑަ ކުއްޖަކު ހިމެނޭހެން ފަސް މީހަކު ޝަހީދުވެއްޖެ

ފަލަސްޠީނުގެ ޖެނީންގައި އިޒްރާއިލް ސިފައިން ހިންގި މިލިޓަރީ ރެއިޑެއްގައި ދިން ހަމަލާތަކެއްގައި ކުޑަކުއްޖަކު ހިމެނޭހެން ފަސް މީހަކު ޝަހީދުވެއްޖެއެވެ.

ފަލަސްޠީނުގެ ޖެނީންގައި ހުންނަ  ރެފިޔުޖީ ކޭމްޕެއްގައި ހިންގި މި ރެއިޑްގައި ފަސް މީހަކު ޝަހީދުވެފައިވާއިރު 62 މީހަކު މިހާތަނަށް ޒަހަމްވެފައިވެއެވެ.

އިޒްރާއިލް ސިފައިން ބުނެފައިވަނީ ޖެނީން ރެފިޔުޖީ ކޭމްޕުގައި ހިންގި ރެއިޑަކީ އިޒްރާއިލް ސިފައިންނަށް ހަމަލާދިން ހަތިޔާރު އެޅި ދެމީހަކު ހޯދުމަށް ކުރިއަށް ގެންދިޔަ ރެއިޑެއް ކަމަށެވެ. އަދި އެދެމީހުން ހޯދުމަށް ކުރި މަސައްކަތުގައި  ހެލިކޮޕްޓަރުގައި މަތިން ދުއްވަމުން ބަޑީގެ ހަމަލާތަކެއް ދިން ކަމަށް އިޒްރާއިލް ސިފައިން ވަނީ ބުނެފައެވެ.

މީގެ އިތުރުން ހަމަލާތައް ކުރިއަށް ދިޔަ ވަގުތު އިޒްރާއިލް ސިފައިން ބުނެފައިވަނީ އެމީހުންގެ ތެރެއިން 7 މީހަކު ޒަހަމްވެފައިވާކަމަށެވެ.

ފަލަސްޠީނުގެ ރައްޔިތަކު އަލްޖަޒީރާއަށް މައުލޫމާތު ދެމުން ބުނެފައިވަނީ އިޒްރާއިލް ސިފައިން ޖެނީންއަށް ދެމުންދާ ހަމަލާތަކަކީ ޖެނީންގެ ރައްޔިތުންނަށް އެހަމަލާތަކަކީ ޖެނީންގެ ރައްޔިތުންނަށް ތަހައްމަލުކުރެވޭ ވަރުގެ ހަމަލާތަކެއް ނޫން ކަމަށެވެ.

"އެއީ އިޒްރާއިލް ސިފައިން ހިންގަމުންގެންދަނީ ވަރުގަދަ މިލިޓަރީ ހަނގުރާމައެއް، ފުރިހަމަ ހަތިޔާރާއި ބާރާއިއެކު ހިންގާ ވަރުގަދަ ހަމަލާއެއް، ޖެނީންގެ ނިކަމެތި ރައްޔިތުންނާއި ދެކޮޅަށް އެހިންގަނީ ފުރިހަމަ ހަނގުރާމައެއް، މި ވާހަކަ ދެކެވެނީ އަޕާޗޭ ހެލިކޮޕްޓަރާއި، އެފް-16 ފައިޓް ޖެޓާއި،، ހަތިޔާރުން ފުރިފައިހުރި ވެހިކަލްތަކާއި، ޢަދަދު ނުވެވޭވަރަށް ގަންޕައުޑަރު ގެންގުޅެމުންދަ މިލިޓަރީއެއްގެ ވާހަކަ، މި ހުރިހާ ތަކެއްޗާއި އެކު ހަނގުރާމަ ކުރަމުންދަނީ ޖެނީން ސިޓީ އާއި އެސިޓީގެ ރެފިޔުޖީ ކޭމްޕްގައި ދިރިއުޅެމުންދާ ޢާންމުންނާ" އޭނާގެ ވާހަކައިގައި ބުނެފައިވެއެވެ.

އޭނާގެ ވާހަކައިގައި ބުނެފައިވަނީ ޒަހަމްވެފައިވާ މީހުންގެ ތެރެއިން 10 މީހަކަށް ބޮޑެތި އަނިޔާތަކެއް ލިބިފައިވާ ކަމަށެވެ. އަދި އެމީހުން ދުނިޔޭގައި ތިބުމުގެ އުންމީދު ވަރަށް ކުޑަކަމަށް އޭނާވަނީ ބުނެފައެވެ.

އިޒްރާއިލް ސިފައިން ޖެނީން ރެފިޔުޖީ ކޭމްޕަށް ދެމުންދިޔަ ހަމަލާތައް ކަވަރުކުރަމުންދިޔަ ނޫސްވެރިންތަކެއްގެ ވަށަލައި އިޒްރާއިލް ސިފައިންވަނީ އެމީހުން ކުރިއަށްދާން އޮތް މަގުތައް ބަންދުކޮށްފައެވެ. އަދި އެމީހުން ބަންދުކޮށްފައި ތިބި ސަރަހައްދަށް ނޫސްވެރިންނަސް އަމާޒުވާހެން ވަނީ ބަޑީގެ ހަމަލާތައް ދީފައެވެ. ޒަހަމްތަކާއި އެކު އެމީހުންނަށް ވަނީ އެތަނުން ނުކުމެ ސަލާމަތް ވެވިފައެވެ.

އަދިވެސް އިޒްރާއިލް ސިފައިންގެ ހަމަލާތައް ހުއްޓާލައިފައެއް ނުވެއެވެ.