ރައީސް ޞާލިހު ބާކީވީ އަމިއްލަފުޅަށް ކަންކަން ކުރެއްވި ގޮތުން: ޝިޔާމު

ގުޅިފައިވާ ސިޔާސީ ޕާޓީތަކުގެ ކޯލިޝަނެއްގެ ތެރެއިން ވެރިކަމަށް ވަޑައިގެންނެވުނު ނަމަވެސް، ދައުރު ނިމުމުގެ ކުރިން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ބާކީވީ އަމިއްލަފުޅަށް ކަންކަން ކުރެއްވި ގޮތުގެ ސަބަބުންކަމަށް ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ.

ޝިޔާމު މިފަދައިން ވިދާޅުވެފައި ވަނީ މާލޭގައި ބޭއްވި ޑރ މުއިއްޒުގެ ކެމްޕޭނު ޖަލްސާއެއްގައި ވާހަކަދައްކަވަމުން ނެވެ.

ޝިޔާމު ވިދާޅުވީ ރިޔާސީ އިންތިޚާބުގެ ފުރަތަމަ ބުރުގެ ނަތީޖާއާއެކު ރައީސް ޞާލިހު ކެމްޕޭނު ކުރުން ހުއްޓާލާ، ކޯލިޝަން ހެދުމުގެ މަސައްކަތްޕުޅު ފައްޓަވާފައިވާ ކަމަށެވެ.

އެގޮތުން މިހާތަނަށް އެއްވެސް ކެމްޕޭނު ދަތުރުފުޅެއް ނުކުރައްވާ އެމަނިކުފާނު ވެރިކަމަށް ގެނައުމަށް މަސައްކަތްޕުޅު ކުރެއްވި ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ އަރިހަށް ވަޑައިގެން، އެމަނިކުފާނުގެ ރުހުން ހޯއްދެވުމަށް ވަރަށް ގިނަ މަސައްކަތްޕުޅު ކުރައްވާފައިވާކަމަށް ޝިޔާމު ވިދާޅުވި އެވެ.

ރައީސް ޞާލިހު ޤާސިމްގެ އަރިހަށް ވަޑައިގެންނެވީ އިންޑިއާއާއެކު ސަރުކާރުން ހަދާފައިވާ އެއްބަސްވުންތަކެއްކަމަށް ބުނެ "ފޭކު ލިޔުންތަކެއް" ހިފައިގެން ކަމަށާއި، އެ ލިޔުންތަކާއެކު ވަޑައިގެން 3 ދުވަހުގެ ބައްދަލުވުންތަކަށް ފަހު ވެސް ޤާސިމްގެ ރުހުން އެމަނިކުފާނަށް ހޯއްދެވިފައި ނުވާކަން ޝިޔާމު ފާހަގަކުރެއްވި އެވެ.

"ހުރިހާ ލީޑަރުން ރައީސް ޞާލިހުގެ ވާހަކަ ގަބޫލެއް ނުކުރައްވާނެ. ގާސިމްގެ ނިންމުމުން ކޯލިޝަނެއްގައި ކުރި ވެރިކަމުގައި ގޯސްތައް ހައްދަވާފައި ހުރިކަން އެނގޭ"

ޕީޕީއެމްގެ ނައިބު ރައީސް ޝިޔާމު

ޝިޔާމު އިތުރަށް ވިދާޅުވީ ދަ ޑިމޮކްރެޓްސްގެ ރުހުން ހޯދުމަށްވެސް ރައީސް ޞާލިހު މަސައްކަތްޕުޅު ކުރައްވަމުން ގެންދަވާ ކަމަށެވެ. އެހެން ނަމަވެސް ހުރިހާ ލީޑަރުންނަކީ އެމީހުންގެ ގަޔަށް "ތިން ހަތަރު ފަހަރު ކަށިޖަހަން" ފުރުސަތު ދެއްވާނެ ބައެއް ނޫން ކަމަށާއި، ރައްޔިތުންގެ ކުރިމަތީގައި އިތުބާރު ގެއްލޭ ޒާތުގެ ކަންކަން ހުރިހާ ލީޑަރުން ކުރައްވާނެކަމަށް ރައީސް ޞާލިހުވެސް ގަބޫލުފުޅު ކުރައްވައިގެން ނުވާނެ ކަމަށެވެ.

އެކަން ފާހަގަކުރައްވާ ޝިޔާމު ވިދާޅުވީ ރައީސް ޞާލިހު ބާކީވީ ވެރިކަމުގައި ހެެއްދެވި ގޯސްތަކުގެ ސަބަބުން ކަމަށެވެ. އެގޮތުން ސިޔާސީ ޕާޓީތަކަށް މަސައްކަތް ކުރުމުގެ ފުރުސަތު ގެއްލުވާލާ، އަދުލު އިންސާފުގެ ނިޒާމު ހަލާކުކޮށްލުމަކީ އެމަނިކުފާނު ބާކީވީ މައިގަނޑު ސަބަބުތައްކަމަށް ޝިޔާމު ވިދާޅުވި އެވެ.

"ބާކީ ވީ ބާކީވާން ޖެހިގެން. އެކަނިވެރިވީ އެކަން އެގޮތަށް ކޮށްގެން. ސިޔާސީ މަސައްކަތްކުރުމުގެ ޖާގަ ނުދީގެން. އިންސާފު ގާއިމް ނުކުރެވިގެން"

ޕީޕީއެމްގެ ނައިބު ރައީސް ޝިޔާމު

ޝިޔާމު ވިދާޅުވީ ހަގީގަތުގައި އެމްޑީޕީގައި ތިއްބެވި ގިނަ ފަރާތްތަކެއް ވެސް ތިބީ ރައީސް ޞާލިހުގެ ވެރިކަން ނިންމުމަށް ބޭނުންވެފައި ކަމަށެވެ. އަދި ރިޔާސީ އިންތިޚާބުގެ ދެވަނަ ބުރުގައި އެކަން ރައްޔިތުން ވަރަށް ސާފުކޮށް އެމަނިކުފާނަށް ދައްކާ މި ވެރިކަން ނިމުމަކަށް ގެންނާނެކަމުގެ ޔަގީންކަން އޮތްކަމަށް ޝިޔާމު ވިދާޅުވި އެވެ.