ރައީސް ސާލިޙަށް އިތުބާރެއް ނުކުރަން؛ ފަހުން ނިޒާމީ ވޯޓެއް ނަގަން އެމަނިކުފާނު ފުރުސަތެއް ނުދޭނެ: އީވާ

ދަ ޑިމޮކްރެޓްސްގެ މެންބަރުން، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް އިތުބާރު ނުކުރައްވާ ކަމަށް ރައްޔިތުންގެ މަޖިލީހުގެ ނާއިބު ރައީސް އީވާ އަބްދުالله ވިދާޅުވެއްޖެއެވެ.

ރޭ ދަ ޑިމޮކްރެޓްސްގެ އިންޓަރިމް ކައުންސިލުން ބޭއްވި ބައްދަލުވުމުގައި އެމްޑީޕީގެ ސަރުކާރާއި ގުޅޭނީ ނިޒާމީ ވޯޓު މި މަހުގެ 28 ވަނަ ދުވަހުގެ ކުރިން ނަގަން މި މަހުގެ 20ގެ ކުރިން އެއްބަސްވާނަމަ ކަމަށް ނިންމުމަށް އެދި ދަ ޑިމޮކްރެޓްސްގެ ފަރާތުން މުހައްމަދު ޝިފާޒް (ޝިއްޕެ) ވަނީ ރޭގެ ކައުންސިލް ބައްދަލުވުމަށް ގަރާރެއް ހުށައަޅުއްވާފަ އެވެ.

އެ ގަރާރަށް ތާއިދު ކުރައްވާ ވާހަކަ ދައްކަވަމުން އީވާ ވިދާޅުވީ، މިމަހު 28 ވަނަ ދުވަހުގެ ކުރިން ނިޒާމީ ވޯޓެއް ނަގަން އެމްޑީޕީން "އެއްބަސްވާނަމަ"އޭ އެ ގަރާރުގައި އޮތުމުން، ރައީސް ޞާލިހު އަށް ޑިމޮކްރެޓުން އިތުބާރު ނުކުރާ މިންވަރު ހާމަވާ ކަމަށެވެ. އެހެނީ، 30 ސެޕްޓެމްބަރު މަހު ބާއްވާ ރިޔާސީ އިންތިޚާބުގެ ދެވަނަ ބުރުގެ ވޯޓުލުމުގެ ކުރިން، ފެންނަ ނުފެންނަ ވޯޓުނަގަން މަސައްކަތް ނުކޮށްފި ނަމަ، އޭގެ ފަހުންވެސް ރައީސް ޞާލިހު އެކަން ކުރައްވާނެ ކަމަށް ގަބޫލު ނުކުރައްވާ ކަމަށާ އީވާ ވިދާޅުވި އެވެ.

"28 ސެޕްޓެމްބަރު 2023 ގެ ކުރިން، ފެންނަ ނުފެންނަ ވޯޓެއް ނެގުމަށް، އެމްޑީޕީން އެއްބަސްވާނަމަ، އޭގެން ދޭހަވަނީ، އަޅުގަނޑުމެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް އިތުބާރު ނުކުރާ ވަރު. އެއީ 30 ސެޕްޓެމްބަރު ގެ ރިޔާސީ ވޯޓުގެ ކުރިން މިކަން ކުރިއްޔާ ނޫނީ، އަޅުގަނޑުމެން އެއްބަހެއް ނުވާނަމޭ، އަދި އެކަން ކުރަން އުޅޭނެ ކަމަށްވެސް އަޅުގަނޑުމެންނަށް ގަބޫލެއް ނުކުރެވޭ.

އީވާ އަބްދުالله

އީވާ ވިދާޅުވީ، 2018 ވަނަ އަހަރު ރައީސް ޞާލިހު ވެރިކަމަށް ވަޑައިގެންނެވީ ވެސް، ދައުރުގެ ވަކި ހިސާބަކުން ނިޒާމީ ވޯޓެއް ނަގަން އެމްޑީޕީ މެންބަރުންގެ އަރިހުގައި ވަޢުދުވެވަޑައިގެންނެވުމަށް ފަހުގައި ކަމަށެވެ. އެހެން ނަމަވެސް, ދައުރު ނިމިގެންދިޔަ އިރުވެސް، އެ ވައުދު ނުފުއްްދަވާ ކަން އީވާ ފާހަގަކުރެއްވިއެވެ.

އަދި، މިދިޔަ އަހަރު ބޭއްވުނު އެމްޑީޕީގެ ކޮންގްރެސް އަށް ފަހުގައި ނިޒާމީ ވޯޓުގެ މަޝްވަރާތައް ކުރައްވާނެ ކަމަށް ރައީސް ޞާލިހު ވިދާޅުވި ކަމަށާ، އެހެން ނަމަވެސް އެކަން ފެއްޓެވުމަށްފަހު، ފަހުން އެކަން ކުރިއަށް ގެންދަވާފައި ނުވާ ކަމަށް އީވާ ވިދާޅުވި އެވެ.

އެފަދައިން ކަން ކުރެއްވުމަށްފަހު، އިންތިހާބުގެ ފުރަތަމަ ބުރުން 40 އިންސައްތަ ވޯޓުވެސް ނުލިބުމުން، އަނެއްކާވެސް ވެރިކަމުގައި ހުންނެވޭތޯ ރައީސް ނަޝީދުގެ އެހީއަށް އެދި ރައީސް ޞާލިހު ވަޑައިގެންފައިވާ ކަމަށް އީވާ ވިދާޅުވި އެވެ.

އަޅުގަނޑުމެންގެ ޖަވާބަކީ ހަމަ ފެށުނީއްސުރެ ވެސް އަޅުގަނޑުމެން ދައްކަވާ ވާހަކަ. އަޅުގަނޑުމެން މިއުޅެނީ ނިޒާމީ ބަދަލަކަށޭ. އެކަމަކު އަޅުގަނޑުމެންނަކަށް ގަބޫލެއް ނުކުރެވޭ މި ނިޒާމީ ބަދަލު ދެން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދެއްވާނެ ކަމަކަށް. އަޅުގަނޑުމެންނަށް އެނގޭ ކަމަކީ، 30 ސެޕްޓެމްބަރު މަހުގެ ފަހަށް މިކަން ކުރަން އަޅުގަނޑުމެން އުޅެފިއްޔާ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެ ވޯޓަށް އެއްސެވި ކަމަށް ވިޔަސް، އެ ފެއިލް ކޮށްލާވަރު ކޮށްލާނެ އޭ.

އީވާ އަބްދުالله

އީވާ ވިދާޅުވީ، 30 ސެޕްޓެމްބަރު ގެ ކުރިން ނިޒާމީ ވޯޓު ނުނަގާނަމަ، ރައީސް ޞާލިހަށް ޑިމޮކްރެޓްސް އިން ތާއީދު ނުކުރާނެ ކަމަށެވެ.