ރައީސް ޔާމީންގެ އިސްތިއުނާފު ލަސްކުރަމުންދާތީ އިދިކޮޅުން ހައިކޯޓަށް

ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމުގެ މައްޗަށް މިދިޔަ ޑިސެމްބަރު މަހުގެ 25 ގައި އިއްވި ހުކުމް، އެމަނިކުފާނުގެ ފަރާތްޕުޅުން އިސްތިއުނާފުކޮށްފައިވާއިރު، އެ މައްސަލަ ދިގުލައިގެން ދާތީ އިދިކޮޅުގެ އޮތް ކަންބޮޑުވުންތަކާއެކު އެ ކޯލިޝަންގެ ލީޑަރުން ހައިކޯޓަށް ވަޑައިގެންފި އެވެ.

އިދިކޮޅު ލީޑަރުން ހައިކޯޓަށް ވަޑައިގަތުމަށް ފަހު ނޫސްވެރިންނާއި ބައްދަލުކުރައްވާ ދެއްވި އިންޓަވިއުއެއްގައި ޕްރޮގްރެސިވް ކޮންގްރެސް ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ އިދިކޮޅު ލީޑަރުން ހައިކޯޓަށް ވަޑައިގެން މައުލޫމާތު ސާފުކުރި އިރު ކުރިއަށް އޮތް 3 ފަހްތާވެސް ރައީސް ޔާމިނުގެ އިސްތިއުނާފު މައްސަލައިގެ އަޑުއެހުމެއް ހައިކޯޓުގައި ތާވަލުކޮށްފައި ނުވާކަމަށެވެ.

"އަޅުގަނޑުމެންނަށް މައުލޫމާތު ލިބުނުގޮތުގައި ބެންޗުގައި ހިމެނޭ ތިން ފަނޑިޔާރުންގެ ތެރެއިން އެއް ފަނޑިޔާރު 23 ފެށިގެން އެބަ ޗުއްޓީ ނަނަގަވާ. އަނެއްކާ 25 އިން ފެށިގެން ހައިކޯޓުގެ ބޭފުޅުން ރަސްމީ ދަތުރުފުޅެއްގައި އެބަ ވަޑައިގަންނަވާ. އޭގެ މާނައަކީ މި އިންތިޚާބުގެ ދެވަނަ ބުރުގެ ވޯޓުލުމާއި ހަމަޔަށް ބަލާއިރު އަދި ނެތޭ ރައީސް ޔާމީނުގެ މައްސަލަ ތާވަލުކުރެވިފައެއް"

އަބްދުއްރަހީމް އަބްދުالله

އަބްދުއްރަހީމް ވިދާޅުވީ އިސްތިއުނާފު މަރުހަލާގައި އޮތް މައްސަލައެއް ގާތްގަނޑަކަށް އަހަރު ދުވަސް ދަންމާލުމަކީ ގަސްދުގައި މީހަކަށް އަނިޔާ ދިނުން ކަމަށެވެ.

ރައީސް ޔާމިނަށް ކުރަމުންދަނީ ނުހައްގު އަނިޔާކަން ރައްޔިތުން ގަބޫލުކުރާކަން ރިޔާސީ އިންތިޚާބުގެ ފުރަތަމަ ބުރުގެ ނަތީޖާއިން ހާމަވެގެންދާކަމަށް އަބްދުއްރަހީމް ވިދާޅުވި އެވެ. އެއާއެކު އެމަނިކުފާނު ވިދާޅުވީ ރައީސް ޔާމިނުގެ އިސްތިއުނާފު މައްސަލަ ލަސްކުރަމުން ދަނީ އިންޑިއާއިން ނުފޫޒު ފޯރުވައިގެން ކަމަށާއި، ޖޭއެސްސީ މެދުވެރިކޮށްގެން ކަމަށް އިދިކޮޅުން ވަނީ ތުހުމަތުކޮށްފަ އެވެ.

"ރައީސް ޔާމީންގެ މައްސަލަ ލަސްކުރުމުގައި އެންމެ އިސް ދައުރެއް އަދާކުރަނީ އިންޑިއާއިން. އިންޑިއާ އަޑީގައި އޮވެގެން އިބްރާހިމް މުހައްމަދު ޞާލިހު ރައީސް އޮފީހުގައި ހުންނަވައިގެން ކޯޓުތަކަށް ނުފޫޒު ފޯރުވައިގެން، ދެން ޖޭއެސްސީ މެދުވެރިކޮށް އިބްރާހިމް މުހައްމަދު ޞާލިހު އެބަ ނުފޫޒު ފޯރުވާ"

އަބްދުއްރަހީމް އަބްދުالله

އަބްދުއްރަހީމް ވިދާޅުވީ ރިޔާސީ އިންތިޚާބުގެ ދެވަނަ ބުރުގެ ނަތީޖާއިން މި ސަރުކާރު ބަދަލުކުރާނެ ކަމަށެވެ. އަދި ޝަރުއީ ދާއިރާއަށް އޮތް ނުފޫޒު ނައްތާލާ ރައީސް ޔާމީން މިނިވަންކުރައްވާނެ ކަމުގެ ޔަގީންކަން ދެއްވާކަމަށް އަބްދުއްރަހީމް ވިދާޅުވި އެވެ.

ރައީސް ޔާމީންގެ ފަރާތްޕުޅުން އާރަށު މައްސަލައާއި ގުޅިގެން އެމަނިކުފާނުގެ މައްޗަށް ކުރި ހުކުމް އިސްތިއުނާފުކޮށްފައި ވަނީ ފެބްރުއަރީ މަހުގެ 23 ވަނަ ދުވަހުގަ އެވެ. މިހާރު ވަނީ އެ މައްސަލަ ގާތްގަނޑަކަށް ނިމުމަކަށް އައިސްފައެވެ. އެހެން ނަމަވެސް ވަކި ހިސާބަކުން މި މައްސަލަ މަޑުޖައްސާ، މިހާތަނަށް އެ މައްސަލަ ބަލާ ނިންމާފައި ނުވާތީ ރައީސް ޔާމީނުގެ ގާނޫނީ ވަކީލުން ވެސް ގެންދަވަނީ ކަންބޮޑުވުން ފާޅުކުރައްވަމުން ނެވެ.