ނިޒާމީ ގަރާރާ ގުޅޭ ގޮތުން ގޮތެއް ނިމެންދެން މިއަދުގެ ޖަލްސާ ކުރިއަށް ގެންދަން ނިންމައިފި!
ވެރިކަން ކުރާ ނިޒާމް ބަރުލަމާނީ ނިޒާމަކަށް ބަދަލުކުރަން ރައްޔިތުންގެ ފެންނަ ނުފެންނަ ވޯޓެއް ނެގުމަށް ޑިމޮކްރެޓްސްއިން ހުށަހަޅާފައިވާ ގަރާރުގެ މަސައްކަތް ނިމެންދެން މިއަދުގެ ޖަލްސާ ކުރިއަށް ގެންދަން މަޖިލީހުގެ ރައީސް މުހައްމަދު ނަޝީދު ނިންމަވައިފިއެވެ.
ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ މެންބަރުން މަޖިލީހަށް ވަޑައިގެންނެވުމަށްފަހު މަޖިލީހުގެ ޗެމްބަރަށް ވަޑައިނުގެން ބޭރު ކުޑަ ދަށުގައި ތިއްްބެވުމުން އިއްޔެގެ ޖަލްސާވެސް ކޯރަމް ހަމަ ނުވެ ޖެހުނީ ނިންމާލާށެވެ. އެއަށްފަހު މިއަދުގެ ޖަލްސާ ވެސް އެ ސަބަބާއިހުރެ ކުރިއަށް ނުގެންދެވި މެދު ކަނޑާލުމަށްފަހު، ޖަލްސާ ފެށޭ ގޮތްވީ 10:00ގައެވެ.
މިއަދުގެ ޖަލްސާގައި އޮތީ، ނިޒާމު ބަދަލުކުރުމުގެ ފެންނަ ނުފެންނަ ވޯޓެއް ނެގުމަށް ގޮވާލާ ހުޅުދޫ ދާއިރާގެ މެމްބަރު އިލްޔާސް ލަބީބު ހުށަހެޅުއްވި ގަރާރުގެ އިބްތިދާއީ ބަހުސްގެ މަރުހަލާ ކުރިއަށް ގެންދިޔުމަށް އެކަންޏެވެ. އެހެންނަމަވެސް އެ ގަރާރުގެ އިބްތިދާއީ ބަހުސްގެ އިތުރުން ގަރާރުގެ ދިރާސާ ކުރުން އަދި ފަހު ބަހުސް އާއި ވޯޓުގެ މަރުހަލާ ވެސް މިއަދު ބާއްވަވާނެ ކަމަށް ނަޝީދު ވިދާޅުވިއެވެ.
"ދެން އަޅުގަނޑު ޖަލްސާ ނިންމާލާކަށް ވެސް ގަސްދެއް ނުކުރަން. މިހެން އަޅުގަނޑު މި ދެންނެވީ ޖަލްސާ ފެށުމަށްޓަކާ އަޅުގަނޑު ދެ ދުވަހު ކުރަން ޖެހުނު މަސައްކަތުގެ ސަބަބުން.. އަޅުގަނޑު ގަސްދު ކުރަނީ ދެން މި ޖަލްސާ ނުނިންމާ މި މަސައްކަތް ނިމޭތޯ އަޅުގަނޑުމެން މަސައްކަތް ކުރަމުން ގެންދިޔުން،"
ރައީސް މުހައްމަދު ނަޝީދު
އިލްޔާސް ހުށަހަޅުއްވާފައިވާ، އެ ގަރާރުގައި ވާގޮތުން ވެރިކަމުގެ ނިޒާމު ބަދަލުކުރުމާ ގުޅޭގޮތުން ރައްޔިތުންގެ ޚިޔާލު ހޯދުމުގެ ވޯޓު 30 އޮކްޓޯބަރުގެ ކުރިން ނެގުމަށް މިއަދު ވަނީ އެދިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
