ފެންއަރާ މައްސަލަ ހައްލުނުވަނީ ކައުންސިލްގެ ހުއްދަ ނުލިބޭތީ: ސްޓެލްކޯ

ބޮޑުތަކުރުފާނުމަގުން ސްޓެލްކޯ ގޭޓް ނަންބަރު 2 އާ ދިމާލު ތާރަމަގުގެ މެދުން ފެން އަރަމުންދާ މައްސަލަ ހައްލުނުވަނީ މާލޭ ސިޓީ ކައުންސިލްގެ ހުއްދަ ނުލިބޭތީ ކަމަށް ސްޓެލްކޯއިން ބުނެފި އެވެ.

ސްޓެލްކޯ އިން ބުނީ ފެން އަރަމުންދާ ސަބަބު ދިރާސާކޮށް ހޯދައި ބެލި އިރު، އެ ފެނަކީ އެ ކުންފުނީގެ އިންޖީނުތަށް ފިނިކުރުމަށް ބޭނުންކުރާ އައުޓްފޯލް ހޮޅިއަކަށް ގެއްލުމެއް ލިބުމުގެ ސަބަބުން ލީކުވާ ފެނެއްކަމަށް ފެންނާތީ އެކަން ރަނގަޅު ކުރުމަށް ކުރަންޖެހޭ ހުރިހާ މަސައްކަތެއް ކުރުމަށްތައްޔާރުވެ، އެކަމުގެ ހުއްދަ އަކަށް ސިޓީ ކައުންސިލްގައި އެދިފައިވާ ކަމަށެވެ.

ނަމަވެސް މިއަދާ ހަމައަށް ވެސް ރަސްމީ އެއްވެސް ސިފައެއްގައި ސިޓީ ކައުންސިލުން މިކަން އަންގާފައިނުވާއިރު، އަދި މި ހުއްދަތައް އަވަސް ކުރުމަށް، ސިޓީ ކައުންސިލްގެ ކަމާއިގުޅުންހުރި ފަރާތްތަކާއި މުއާމަލާތު ކުރުމަށް މަސައްކަތް ކުރި ނަމަވެސް މި ވަގުތާ ހަމައަށް ވެސް އެ ފަރާތްތަކުން ފޯނު ނުނަގާތީ އެހުއްދަތައް ލިބޭގޮތް ނުވެފައިވާ ކަމަށް ސްޓެލްކޯ އިން ބުނެ އެވެ.

މިއާއެކު ސްޓެލްކޯ އިން ބުނީ، މި މައްސަލަ ވީއެންމެ އަވަހަކަށް ހައްލު ނުކުރެވިއްޖެ ނަމަ، މަގު ބޭނުންކުރާ ފަރާތްތަކަށް އެކަމުގެ ދަތި އުނދަގޫތައް ކުރިމަތިވުމުގެ އިތުރުން، މާލެއަށް ކަރަންޓު ދިނުމަށް ބޭނުން ކުރަމުންދާ ބޮޑު ޖަނަރޭޓަރުތަކެއް ނިއްވާލަންޖެހި، މާލޭގެ ބައެއް ސަރަހައްދުތަކުން ކަރަންޓު ކަނޑާލަން ޖެހުމަކީ އެކަށީގެންވާ ކަމަށެވެ.
އެގޮތުން މި މަސައްކަތް ވީއެންމެ އަވަހަކަށް ކުރުމަށް މާލޭ ސިޓީ ކައުންސިލުން ލިބެންޖެހޭ ހުއްދަތައް ވީއެންމެ އަވަހަކަށް ހޯދުމަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމަށް ސްޓެލްކޯ އިން ބުނެފައިވެ އެވެ. އަދި އެ ހުއްދަތައް ލިބުމާއެކު، މި މަސައްކަތް ވަގުތުން ފަށައި، އެކަން ހައްލު ކުރާނެ ކަމަށްވެސް އެ ކުންފުނިން ހާމަކުރެ އެވެ.