ފަލަސްޠީނުގެ ބިމުގައި އިޒްރާއިލުން އަޅަމުންއަންނަ ގެތައް އެޅުން ހުއްޓާލުމަށް އޫއެން އިން އަންގައިފި
ފަލަސްޠީނުގެ ބިމަށް ގަދަކަމުން އަރައި ބައިނަލް އަޤްވާމީ ޤާނޫނު ތަކާއި ޚިލާފަށް އެތަނުގައި އަޅަމުންއަންނަ ގެތައް އެޅުން ހުއްޓާލުމަށް ޔުނައިޓެޑް ނޭޝަންސްގެ ސެކްރެޓެރީ ޖެނެރަލް އަންޓޯނިއޯ ގުޓްރަސް ގޮވާލައިފިއެވެ.
އަންޓޯނިއޯ ގުޓްރަސް ގޮވާލައިފައިވަނީ އިޒްރާއިލުން ފަލަސްޠީނުގެ ބިމުގައި އެމީހުންގެ ޢާންމުން ދިރިއުޅުމަށް ބައިނަލް އަޤްވަމީ ޤާނޫނު ތަކާއި ޚިލާފަށް އަޅަމުންދާ ގެތައް އެޅުން ވަގުތުން ވަގުތައް ހުއްޓާލުމަށެވެ. އަދި އޭނަ ބުނެފައިވަނީ މިހާރު ފަލަސްޠީނުގައި ކުރިއަށްދާ ހަމަނުޖެހުން ތަކުގެ މައިގަނޑު ސަބަބަކީ އިޒްރާއިލުން ފަލަސްޠީނުގެ ބިން އެމީހުންގެ ބާރުގެދަށަށް ގެންދިޔުމަށް ކުރަމުންދާ މަސައްކަތް ކަމަށެވެ.
"ސެކްރެޓަރީ ޖެނެރަލް ގޮވާލައިފައިވަނީ ބައިނަލްއަޤަވާމީ ޤާނޫނު ތަކާއި ޚިލާފަށް އިޒްރާއިލުން އަޅަމުން އަންނަ ގެތައް އެޅުން ހުއްޓައިލުމަށް" ސެކްރެޓަރީ ޖެނެރަލްގެ ސްޕޯކްސަޕާސަންއެއް ކަމަށްވަ ފަރްހާން ހައްޤް ބުނެފައިވެއެވެ.
އިތުރަށް ފަރުހާން ބުނެފައިވަނީ އިޒްރާއިލުން މިހިންގާ ޢަމަލުތަކުގެ ސަބަބުން އިތުރު މައްސަލަތައް އުފެދި އިތުރަށް ނުރައްކާތެރި ކުށްތަކަށް އަރައިގަތުމުގެ މިންވަރު ދާނީ އިތުރުވެގެން ކަމަށާއި، އަދި އެފަދަ ކުށްތަކުގެ ސަބަބުން އިންސާނީ އެހީއަށް ޖެހޭ މިންވަރު އިތުރުވެގެންދާނެ ކަމަށެވެ.
އިޒްރާއިލުން ފަލަސްޠީނުގެ ބިމަށް ވެރިވެގަތުމަށް ކުރަމުންދާ މިމަސައްކަތްތަކުގެ ސަބަބުން ފަލަސްޠީނުގެ ރައްޔިތުންގެ އެތައް ހައްޤެއް ގެއްލިގެން ދާނެކަމަށް އަންޓޯނިއޯ ދެކޭ ކަމަށް ފަރްހާން ބުނެފައިވެއެވެ. އެގޮތުން ފަލަސްޠީނުގެ ބިމާއި އެބިމުގެ ޤުދުރަތީ ވަޞީލަތްތަކާއި، އެމީހުންގެ އަމިއްލަ ބިމުގައި މިނިވަންކަމާއި އެކު އުޅުމުގެ ފުރުސަތު އެމީހުންނަށް ގެއްލުން ފަދަ ކިތަންމެ ކަމެއް މިކަމުގެ ނަތީޖާއަކަށް ވެގެންދާނެ ކަމަށް އަންޓޯނިއޯ ދެކޭކަމަށް ފަރްހާންގެ ވާހަކައިގައި ބުނެފައިވެއެވެ.
ފަލަސްޠީނުގެ ބިމުގައި އިޒްރާއިލްގެ މީސްތަކުން އާބާދު ކުރުމަށް އިޒްރާއިލްގެ ޔަހޫދީ ސަރުކާރުން ކުރަމުން އަންނަ މަސައްކަތް އެމީހުން ދަނީ ހުއްޓައިނުލައި ކުރަމުންނެވެ. އެގޮތުން އެކަމަށް ބޭނުންވާ ޤަވާއިދުތައް މިހާރު އެކުލަވައި ލައިފައިވާ ކަމަށް އިޒްރާއިލުން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
