ދަފްތަރަށް ޚާއްސަ ހައުސިން ސްކީމެއްގެ މަސައްކަތް ފަށައިފިން: ރައީސް ޞާލިހު

މާލޭގެ ދަފްތަރުގައި ޖެހިގެން ތިބި ފަރާތްތަކާއި މާލެއަށް ދިރިއުޅުން ބަދަލުކޮށް ގިނަ ދުވަސްތަކެއްވެފައިވާ ފަރާތްތަކަށް ޚާއްސަ ހައުސިން ސްކީމެއްގެ މަސައްކަތް ސަރުކާރުން ފަށާފައިވާކަން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އިއުލާނުކުރައްވައިފި އެވެ.

އެމަނިކުފާނު މިފަދައިން އިއުލާނުކުރައްވާފައި ވަނީ ގުޅިފައިވާ ސިޔާސީ ޕާޓީތަކުން ގަލޮޅުގައި ބޭއްވި ރައީސް ޞާލިހުގެ ރިޔާސީ ކެމްޕޭނުގެ ކަންމަތީ ޖަލްސާއެއްގައި ވާހަކަދައްކަވަމުން ނެވެ.

ރައީސް ޞާލިހު ވިދާޅުވީ ބޯހިޔާވަހިކަމުގެ މައްސަލައަކީ ރާއްޖެއަށް ދިމާވެފައިވާ އެންމެ ބޮޑު އިޖުތިމާއީ މައްސަލަކަމަށް ޤަބޫލުކުރައްވާކަމަށެވެ. އަދި ގެދޮރުގެ ދަތިކަން ދިމާވެފައިވާ ފަރާތްތަކަށް، އެކަށީގެންވާ ބޯހިޔާވަހިކަމެއް ފޯރުކޮށްދިނުމުގެ މަސައްކަތް ހުއްޓުމެއްނެތި ސަރުކާރުން ކުރަމުންދާ އަންނަ ކަމަށެވެ.

މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ބަލާއިރު، މާލެއަށް ދިރިއުޅުން ބަދަލުކޮށްގެން އުޅޭ ފަރާތްތަކަކީ އަމިއްލަ ބޯހިޔާވަހިކަމެއް ހޯދުމަށް ވަރަށް ބޮޑެތި ތަކުތީފުތައް އުފުލަންޖެހިފައިވާ ބައެއްކަން ރައީސް ޞާލިހު ފާހަގަކުރެއްވި އެވެ.

އެއީ މާލޭ ރަށްވެހިންނަށް ނުވާތީ، މާލެއަށް ޚާއްސަ ބޯހިޔާވަހިކަމުގެ މަޝްރޫއުތަކުން ފުރުސަތު ނުލިބުމާއި، މާލޭގައި ދިރިއުޅޭތީ އަމިއްލަ ރަށުންވެސް ބިންކޮޅެއް ހޯދުމަކީ އެފަދަ ފަރާތްތަކަށް ދަތިކަމަކަށް ވެފައިވާކަމަށް ރައީސް ޞާލިހު ވިދާޅުވި އެވެ.

އެއާއެކު އެމަނިކުފާނު ވިދާޅުވީ 20 އަހަރަށް ވުރެ ގިނަ ދުވަހު މާލޭގައި އުޅެފައިވާ، އަދި މާލޭގެ ދަފްތަރުގައި ޖެހިފައިވާ ފަރާތްތަކަށް ޚާއްސަކޮށްގެން ބޯހިޔާވަހިކަމުގެ މަޝްރޫއެއް ސަރުކާރުން ޕްލޭންކުރަން ފަށާފައިވާ ކަމަށެވެ. ފާއިތުވި ދެތިން ދުވަހެއްގެ ތެރޭގއި ކުރެވުނު މަސައްކަތުން ސިޔާސަތު މިހާރު ވަނީ އެކަށައަޅާލެވިފައި ކަމަށާއި، އަދި އެ ސިޔާސަތު ވަރަށް އަވަހަށް ފައިނަލް ކުރައްވާނެކަމަށް ރައީސް ޞާލިހު ވިދާޅުވި އެވެ.

"މާލޭގައި ދިރިއުޅޭ ދަފްތަރުގައި 20 އަހަރަށްވުރެ ގިނަ ދުވަހު މީހުންނަށް ޚާއްސަ ހައުސިން ސްކީމެއް ތައާރަފްކުރާނަން. އެކަމުގެ ސިޔާސަތުތައް ދެތިން ދުވަހުގެ ތެރޭގައި ކަނޑައަޅައިފިން. ދެން އޮތީ ފައިނަލްކޮށްލުން. އެ މީހުންނަށް ދާއިމީ ހައްލެއް ހޯދައިދޭނަން"

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު

ރައީސް ޞާލިހު ވިދާޅުވީ މި ސިޔާސަތާއެކު ދަފްތަރުގައި ޖެހިފައި ތިބި ފަރާތްތަކަށް ފަސޭހަކަމާއެކު ބޯހިޔާވަހިކަން ކަށަވަރުވެގެންދާނެ ކަމަށެވެ. އަދި އެ މީހުންގެ އިތުރުން ވެސް އެމަނިކުފާނުގެ އަމާޒަކީ ރާއްޖޭގެ ހުރިހާ ރައްޔިތުންނަށް ބޯހިޔާވަހިކަމުގެ އަސާސީ ހައްގު ކަށަވަރުކޮށްދިނުން ކަމަށް ރައީސް ޞާލިހު ވިދާޅުވި އެވެ.

އޭގެ އިތުރުން ވިނަރެސް ފްލެޓުތަކުގެ އަގު ކުޑަކޮށް ޑައުންޕޭމަންޓު ދެއްކުމުގައި ވެސް ލުއި ގޮތްތަކެއް ސަރުކާރުން ފޯރުކޮށްދެއްވާނެ ކަމުގެ ޔަގީންކަން ރައީސް ޞާލިހު ވަނީ ދެއްވާފަ އެވެ. އަދި ސަރުކާރުގެ ހައުސިން ސްކީމުތަކަށް ރައްޔިތުން ހުށައަޅާ ބަދަލުތައްވެސް ގެންނަވާނެކަމަށް އެމަނިކުފާނު ވިދާޅުވި އެވެ.