"މަޖިލީހުން ފާސްކޮށްފިނަމަ އޮކްޓޯބަރ ގައި ނިޒާމީ ވޯޓު ނަގަން، މިމަހު 30ގެ ކުރިން އީސީއަށް ފޮނުވާނަން"

ރާއްޖޭގެ ވެރިކަމުގެ ނިޒާމު ބަދަލު ކުރަން ފެންނަ ނުފެންނަ ވޯޓެއް ނަގަން ރައްޔިތުންގެ މަޖިލީހުގެ ބޮޑު އަގުލަބިއްޔަތުން ފާސްކޮށް ތަސްދީގުކުރަން އެ އެމަނިކުފާނަށް ފޮނުވައިފި ނަމަ، އޮކްޓޯބަރުގައި އެ ވޯޓު ނެގުމަށް، އިންތިހާބުގެ ދެވަނަ ބުރުގެ ކުރިން އިލެކްޝަންސް ކޮމިޝަނުގައި އެދިވަޑައިގަންނަވާނެ ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެ އެވެ.

ރާއްޖެއަށް ބަރުލަމާނީ ނިޒާމް ގެނައުމަށް އެންމެ ބޮޑަށް މަސައްކަތް ކުރައްވަމުންދާ، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ދަ ޑިމޮކްރެޓްސްގެ ފަރާތުން އިލްޔާސް ލަބީބު ވަނީ ނިޒާމާ ގުޅޭ ވޯޓެއް ނެގުމަށް ރައްޔިތުންގެ މަޖިލީހަށް ގަރާރެއް ހުށަހަޅައިފަ އެވެ.

އެ ގަރާރުގެ ކިޔުން އިއްވައި އެކަމާއި ގުޅިގެން ގޮތް ނިންމުމަށް މުޅި މަޖިލީހުގެ ކޮމިޓީއަށް ފޮނުއްްވަން އިއްޔެގެ ޖަލްސާގައި ވަނީ ފާސްކޮށްފައެވެ. އަދި އެ މައްސަލާގައި ކޮމިޓީގައި މަޝްވަރާ ކުރުން މިއަދު އޮންނާނެ އެވެ.

އެ ގަރާރުގައި މިހާރު ބުނެފައިވާ ގޮތުން، ފެންނަ ނުފެންނަ ވޯޓު 30 އޮކްޓޯބަރުގެ ކުރިން ނަގަންވާނެއެވެ.

އެކަމާއި ގުޅިގެން، އިއްޔެ ރައީސް ޞާލިހުގެ ރިޔާސީ އިންތިހާބުގެ ކެމްޕޭނަށް ހެންވޭރުގެ ގެތަކަށް ވަޑައިގެން އުޅުއްވަނިކޮށް ނޫސްވެރިން ކުރި ސުވާލުތަކަށް ޖަވާބު ދެއްވަމުން އެމަނިކުފާނު ވިދާޅުވީ، ނިޒާމީ ވޯޓެއް ނެގުމަކީ ގާނޫނު އަސާސީއަށް ބަދަލު ގެނެސްގެން ކުރެވޭނެ ކަމެއް ކަމަށެވެ. އަދި ގާނޫނު އަސާސީ އަށް ބަދަލު ގެންނާނެ ގޮތް ވެސް ހަމަ އެ ގާނޫނު އަސާސީގައި ހާމަކޮށްފައިވާ ކަމަށް އެމަނިކުފާނު ވިދާޅުވި އެވެ.

އެގޮތުން، ވެރިކަމުގެ ނިޒާމު ބަދަލު ކުރުމަކީ ރައީސުލްޖުމްހޫރިއްޔާ އާއި މަޖިލީހުގެ ދައުރު/އުމުރަށް ބަދަލު އަތުވެދާނެ ކަމެއް ކަމަށާ، ބަރުލަމާނީ ނިޒާމުގައި، ދިގުވެގެން ފަސް އަހަރު ނޫނީ ހަތަރު އަހަރު އޮތް ނަމަވެސް، މެދު ތެރެއިން މެޖޯރިޓީ ގެއްލިއްޖެއްޔާ އަލުން ވޯޓަކަށް ދާން ޖެހޭކަން އެމަނިކުފާނު ފާހަގަކުރެއްވިއެވެ.

"އެހެންވެއްޖެއްޔާ މީގައި ކަން ކުރަން ޖެހޭނެ ކަމަށް ގާނޫނުއަސާސީގައި ބުނެފައި އޮތް އެތި އަޅުގަނޑަށް މާނަކުރެވެނީ، އެކެއް، ފުރަތަމަ، ރައްޔިތުންގެ މަޖިލީހުގެ ހަތަރުބައި ކޮށްފައި ތިންބައިގެ އަގުލަބިއްޔަތުން ފާސްކޮށްފައި ރައީސުލްޖުމްހޫރިއްޔާއަށް ތަސްދީގުކުރަން ފޮނުވަން ޖެހޭނެ. ފޮނުވީމާ އަޅުގަނޑު އެ ތަސްދީގު ކުރުމުގެ ކުރިން ރައްޔިތުންގެ ފެންނަ ނުފެންނަ ވޯޓަކަށް ދާން ޖެހޭނެ. އެހެންވީމާ އެ ޕްރޮސެސް އެހެން އައިމަ އަޅުގަނޑު އެ އޮތް ގޮތަށް އެކަމެއް ކުރާނަން،"

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރާއްޖޭގައި ވެރިކަން ކުރާނެ ނިޒާމަކާއި ގުޅޭ ވޯޓެއް އެންމެ ކުރިން ނަގާފައިވަނީ 2007 ވަނަ އަހަރުއެވެ.