ޣައްޒާގައި ފަލަސްޠީނުގެ 4 ޒުވާނަކު ޝަހީދުކޮށްލައިފި

އިޒްރާއިލް ސިފައިން ފަލަސްޠީނުގެ ޣައްޒާގައި ފަލަސްޠީނުގެ 4 ޒުވާނަކު ޝަހީދުކޮށްލައިފިއެވެ.

ޝަހީދުވި 4 ޒުވާނުންގެ ތެރެއިން 3 ޒުވާނުން ޝަހީދު ވެފައިވަނީ އިޒްރާއިލް ސިފައިން ވެރިވެގަނެފައިވާ ހުޅަނގު އައްސޭރީގައެވެ. އަނެއް ޒުވާނާ ޝަހީދުވެފައިވަނީ ޣައްޒާގައި ހިންގި ޢަސްކަރީ ހަރަކާތެއްގައެވެ.

ހުޅަނގު އައްސޭރީގައި ހިންގި ޢަސްކަރީ ރެއިޑް ހިންގައިފައިވަނީ އަންގާރަދުވަހު ޖެނީން ރެފިޔުޖީ ކޭމްޕުގައެވެ. އެރެއިޑްގައި 3 ޒުވާނުން ޝަހީދު ވުމުގެ އިތުރުން އިތުރު 20 މީހަކު ވަނީ ޒަޚަމްވެފައެވެ. ޝަހީދުވި ޒުވާނުންގެ ނަންތައް އަދި ހާމަކޮށްފައެއް ނުވެއެވެ.

ޣައްޒާގައި ޝަހީދުވި ޒުވާނާއަކީ 25 އަހަރުގެ ޔޫސުފް ސާލިމް ރަދްވާން ކަމަށް ފަލަސްޠީނުގެ މީޑިއާއި އިން ބުނެފައިވެއެވެ. އޭނާ ޝަހީދުވެފައިވަނީ އިޒްރާއިލް ސިފައިން އޭނާގެ ގަޔަށް ބަޑިޖެހުމުގެ ސަބަބުންނެވެ.

މިހާރަކަށް އައިސް ޣައްޒާގައި ހިނގަމުން މިދާ ލޭއޮހޮރުވުން ތައް ފެށިފައިވަނީ ސެކިޔުރިޓީ މައްސަލަތަކަށް ކަމަށް ބުނެ އިޒްރާއިލް ސިފައިން ބައިތް ހަނޫން ބޯޑަރު ބަންދުކުރުމާއި ގުޅިގެނެވެ.

ބައިތް ހަނޫން ބަންދު ކުރުމާއި ގުޅިގެން 18،000 އަށްވުރެ ގިނަ ފަލަސްޠީނުގެ ރައްޔިތުން ތިބީ އެމީހުން ދިރިއުޅުމަށް ކުރާ މަސައްކަތައް ނުދެވިފައެވެ.

މިހަމަނުޖެހުން ތައް ފެށިފައިވަނީ ޔަހޫދީންގެ އައުއަހަރުގެ ބަންދާއި ގުޅިގެނެވެ. މި ބަންދާއި ގުޅިގެން ޔަހޫދީންގެ ގިނަ ބަޔަކު އަޤްޞާ ގެ ހަރިންމަ އަށް ޒިޔާރަތް ކުރުންފަދަ ދީނީ ހަރަކާތްތައް ކުރިއަށް ގެންދާތީ އަޤްޞާ މިސްކިތައް ފަލަސްޠީނުގެ ރައްޔިތުންނަށް ނުވަދެވޭނެ ކަމަށް އިޒްރާއިލް ސިފައިން ބުނެފައިވެއެވެ.

މިކަމާއި ގުޅިގެން ފަލަސްޠީނުގެ ރައްޔިތުން ދަނީ ހިތްހަމަނުޖެހުން ފާޅު ކުރުމަށް ތަންތަނަށް އެއްވަމުންނެވެ.

ޣައްޒާގެ އޮފިޝަލުން ބުނެފައިވަނީ ބަންދު ކޮށްފައިވާ ބައިތް ހަނޫން ބޯޑަރު މެޑިކަލް އެމަޖެންސީއަށް ބޭނުންވާ ވަގުތު ހުޅުވައި ދޭ ކަމަށެވެ.

ބައިތް ހަނޫން ބަންދުކޮށްފައި ހުންނަ މުއްދަތު އިތުރު ވަމުން ދާވަރަކަށް އެސަރަހައްދުގައި ހަމަނުޖެހުން ދަނީ އިތުރުވަމުންނެވެ.