ޞަލާޙް ގޮވާލީ ޣައްޒާގައި ހިންގާ ޖަރީމާތައް ހުއްޓައިލުމަށް

ލިވަޕޫލާއި މިޞްރުގެ ޤައުމީ ޓީމުގެ ފުޓުބޯޅަ ކުޅުންތެރިޔާ މުޙައްމަދު ޞަލާޙް، ޣައްޒާގައި އިޒްރާއިލުން ހިންގަމުންދާ އިންސާނިއްޔަތާއި ޚިލާފު ޖަރީމާތައް ވަގުތުން ވަގުތައް ހުއްޓައިލުމަށް ގޮވައިލައިފިއެވެ.

31 އަހަރުގެ ކުޅުންތެރިޔާ، ޣައްޒާގައި ހިނގަމުންދާ ޖަރީމާތަކާއި މެދު އެއްޗެއް ބުނެފައިވަނީ ބުދަ ދުވަހުގެރޭ އިޒްރާއިލް ސިފައިން ޣައްޒާގެ އަލް އަހްލީ ހޮސްޕިޓަލަށް ދިން ހަމަލާގައި 500 އަށްވުރެ ގިނަ މީހުން މަރުވި މައްސަލައިގައެވެ.

އެގޮތުން، ޞަލާޙް މީސްމީޑިއާގައި އާއްމު ކޮށްފައިވާ ޕޯސްޓެއްގައި ބުނެފައިވަނީ މި ދަނޑިވަޅަކީ ވާހަކަ ދައްކަން ފަސޭހަ ދަނޑިވަޅެއް ނޫން ކަމަށެވެ. އަދި ހިތްފަޅައިގެންދާފަދަ އަނިޔާވެރިކަން ފެންނަމުންދާ ކަމަށް ވެސް ޞަލާޙް ކޮށްފައިވާ ޕޯސްޓުގައި ބުނެފައިވެއެވެ.

"ފާއިތުވި ހަފްތާގައި ދެކެން އުނދަގޫވާ މިންވަރަށް އަނިޔާވެރިކަން ވަނީ އިތުރުވެފަ، ދިރިހުރި ފުރާނައެއްވިއްޔާ ތިބީ ބިރުން ރައްކާތެރިކަމަށް ބޭނުންވެފައި، ޢާއިލާތައް ވަކިވަކިވެ ވީނުވީއެއް ވަނީ ނޭނގިފައި" ޞަލާޙް ބުނެފައިވެއެވެ.

އެހެންކަމުން ސަލާޙް ވަނީ ޣައްޒާގައި ހިންގަމުންދާ ޖަރީމާތައް ހުއްޓަލައި، ޣައްޒާގައި ޙާލުގައި ޖެހިފައިތިބި މީހުންނަށް އިންސާނީ އެހީ އެންމެ އަވަހަކަށް ފޯރު ކޮށްދިނުމަށް ގޮވާލާފައެވެ.

"(ޣައްޒާގެ އަލް އަހްލީ) ހޮސްޕިޓަލުން ފެނުނީ ބިރުވެރި މަންޒަރެއް، ޣައްޒާގެ ރައްޔިތުން ތިބީ ކާބޯތަކެއްޗާއި ފެން އަދި މެޑިކަލް އެހީއަށް ބޭނުންވެފައި، ދުނިޔޭގެ ހުރިހާ ލީޑަރުންނަށް އަހަރެން މިގޮވައިލަނީ ހުރިހާ ފަރާތްތަކުން އެއްބައިވަންތަވެ ޤަތުލުކުރެވެމުންދާ މައުސޫމް ފުރާނަތައް ޤަތުލު ކުރެވުން ހުއްޓުވައި، އިންސާނިއްޔަތަށް އިސްކަންދިނުމަށް" ޞަލާޙް ބުނެފައިވެއެވެ.

"މިވަގުތައް ސާފުވާ ކަމަކީ ޣައްޒާއަށް އިންސާނީ އެހީ ފޯރުކޮށްދިނުމަށް މަގުފަހު ކޮށްދޭން ޖެހޭ ކަން، ޣައްޒާގައި ތިބި ރައްޔިތުން ތިބީ ވަރަށް ޙާލުގައި" ޞަލާޙް ވިދާޅުވެފައިވެއެވެ.

މިޞްރުގެ ޤައުމީ ޓީމުގެ ކެޕްޓަންކަން ކުރަމުންދާ ޞަލާޙް ފަލަސްޠީން އިޒްރާއިލް ހަނގުރާމައިގެ މައްސަލައިގައި އެއްޗެއް ބުނެފައިނުވާތީ ގިނަ ބަޔަކު އޭނާއަށް ފާޑު ކިޔައިފައިވެއެވެ. އަދި ފާޑުކިޔާ ބައެއް މީހުންވަނީ ސޯޝަލް މީޑިއާއި އިން ޞަލާޙް އަންފޮލޯ ކުރުމަށް ގޮވައިލައި ކެމްޕޭނެއްވެސް ކުރިއަށް ގެންގޮސްފައެވެ.

ފަލަސްޠީނުގެ ކަމާއި ގުޅޭ ފަރާތްތަކުން ބުނެފައިވަނީ އަލްއަހްލީ ހޮސްޕިޓަލަށް ދިން ހަމަލާއަކީ އިޒްރާއިލުން ދިން ހަމަލާއެއްކަމަށެވެ. އިޒްރާއިލުން ތުހުމަތު ކޮށްފައިވަނީ އެހަމަލާއަކީ ފަލަސްޠީނުގެ އިސްލާމިކް ޖިހާދަށް އޮޅިގެން ދެވިފައިވާ ހަމަލާއެއް ކަމަށެވެ. ނަމަވެސް އިސްލާމިކް ޖިހާދުން ވަނީ އެތުހުމަތުތައް ސާފުކޮށް ދޮގުކޮށްފައެވެ.