ފައިސާ ނުދޭ މައްސަަލައިގައި ފެނަކަައިގެ ސަޕްލަޔަރުން އިހްތިޖާޖަށް
ފެނަކަ ކޯޕަރޭޝަނަށް އެކި ހިދުމަތްތައް ފޯރުކޮށްދޭ ސަޕްލަޔަރުންނަށް ހިދުމަތަށް ދޭންޖެހޭ ފައިސާ ނުދޭތީ އެމީހުން އަނެއްކާ ވެސް އިހުތިޖާޖު ކުރަން ފަށައިފިއެވެ.
ސަޕްލަޔަރުންނަށް ފައިސާ ނުދޭ މައްސަލާގައި އެ ފަރާތްތަކުން ވަނީ އެމީހުންގެ ޝުއޫރުތައް ހިމެނޭ ޕޯސްޓަރުތައް ހިފައިގެން މާލޭ ފެނަކަ އޮފީސް ކުރިމައްޗަށް މިއަދު އެއްވެ އަޑު އުފުލައިފައެވެ.
އެގޮތުން އެމީހުންގެ މަސައްކަތަށްވާ ފައިސާ ދިނުމަށާއި، އެ ފައިސާ ދޭން "ފެއިލްވެފައިވާ" ފެނަކައިގެން މެނޭޖިން ޑިރެކްޓަރު އަހްމަދު ސައީދު މުހައްމަދު މަގާމުން އިސްތިއުފާ ދިނުމަށްވެސް އެ ފަރާތްތަކުން ވަނީ ގޮވާލާފައެވެ.
އެގޮތުން ބައެއް ކުންފުނިތަކަށް 15 މިލިއަނުން އަދި އެހެންވެސް އަދަދުތަކުން ފައިސާ ދޭން ޖެހޭ ކަމަށް އެ އިހްތިޖާޖުގެ ބައިވެރިން ވަނީ މައުލޫމާތު ދީފައެވެ.
އަޅުގަނޑުމެން އެކި ގޮތްގޮތުން މަސައްކަތް ކޮށްގެންވެސް އެއްވެސް ގޮތަކަށް ޕޭމަންޓާ ބެހޭ ޖަވާބެއް އަޅުގަނޑުމެންނަކަށް ނުއެއް ލިބޭ. މިހާރު ދޮޅު އަހަރުވަރު މިވަނީ. އަޅުގަނޑުމެންގެ އިތުރުން ވެސް ވަރަށް ގިނަ ކުދި ވިޔަފާރިތަކަށް އެބަހުރި ފައިސާ ނުލިބި، އެ ވިޔަފާރިތައް ބަނގުރޫޓުވަމުން އެދަނީ،
އިހްތިޖާޖުގެ ބައިވެރިން
ފެނަކައިގެ ހިންގުން ދޯދިޔާވެ، 2.8 ބިލިއަން ރުފިޔާއަށްވުރެ ބޮޑު އަދަދަކުން ސަޕްލަޔަރުންނަށް ވަނީ ދަރާފައެވެ.
މުޒާހަރާގެ ބައިވެރިން ބުނާ ގޮތުގައި ފެނަކައިން ދޭންޖެހޭ ފައިސާ ނުދޭތީ ގިނަ ކުދި ވިޔަފާރިތަކަކަށް މާލީ ދަތިތަކާ ކުރިމަތިވެ، އެ ކުންފުނިތައް ބަނގުރޫޓުވާ ހިސާބަށް ވަނީ ގޮސްފަ އެވެ. އަދި އެ ކުންފުނިތަކުގައި ފައިސާ ނެތިގެން މުވައްޒަފުންނަށް މުސާރަ ވެސް ނުދެވިފައިވާ ކަމަށް އެމީހުން ބުންޏެވެ.
ފެނަކައަށް މަސައްކަތްތައް ކޮށްދީފައިވާ ގިނަ އަމިއްލަ ކުންފުނިތަކަކަށް ފައިސާ ނުދީގެން އެމީހުން މީގެ ކުރިންވެސް އައީ ޝަކުވާ ކުރަމުންނެވެ. ފެނަކައިން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާ ދިނުން އަވަސް ކުރުމަށް ގޮވާލާ ރައްޔިތުންގެ މަޖިލީހަށް ވެސް ގަރާރެއް ހުށަހެޅިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
