ކިތަންމެ ގިނައިން ކަރަންޓު ބޭނުން ކުރިޔަސް، ފީގެ ރޭޓު ބޮޑު ނުވާ ގޮތަށް ހަދަން ނިންމައިފި!

ކަރަންޓް ކިތަންމެ ވަރަކަށް ބޭނުންކުރިޔަސް ބިލް ބޮޑުނުވާނެ ގޮތަކަށް ފްލެޓް ރޭޓެއް ކަނޑައަޅައި ގިނައިން ބޭނުން ކުރުމުން ބިލް ބޮޑުވާ މައްސަލަ ހައްލު ކޮށްދޭން ނިންމާފައިވާ ކަމަށް އެމްޑީޕީީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރިޔާސީ އިންތިހާބުގެ ދެ ވަނަ ބުރުގެ ކެމްޕެއިނަށް ހުވަދޫ ޖަގަހަ ހުޅުވަން، ރޭ މާލޭގެ މާވެޔޮ މަގުގައި ބޭއްވި ޖަލްސާގައި ވާހަކަ ދައްކަވަމުން، ރައީސް ޞާލިހު ވިދާޅުވީ އެމަނިކުފާނު މިހާރު މާލޭގެ ގޭގެއަށް ޑޯޓުޑޯ އަށް ވަޑައިގަންނަވަމުންދާއިރު، ލިބޭ އާމްދަނީން ގޭގެ ކުއްޔާއި ކަރަންޓު ބިލް ދެއްކުމަށްފަހު ދެން ހުރި ހަރަދުތައް ހަމަނުޖެއްސޭ ކަމުގެ ޝަކުވާތައް ރައްޔިތުންގެ ފަރާތުން ލިބޭ ކަމަށެވެ.

އެހެންކަމުން ކަރަންޓް ބިލަށް ލުޔެއް ހޯދައިދިނުމަށް ގިނަ ބަޔަކު އެދިލައްވާފައިވާ ކަމަށް އެމަނިކުފާނު ވިދާޅުވި އެވެ.

"މިހާރު މިވާ ގޮތަކީ ކަރަންޓް ބިލުގެ ވަކި ރޭޓުތަކެއް މިހުންނަނީ ކަނޑައަޅާފައި. ވަކި ވަރަކަށްވުރެ ގިނައިން ބޭނުން ކޮށްފިއްޔާ އަގު ބޮޑުވަމުން މިދަނީ. އަޅުގަނޑުމެން މިއަދު މި ނިންމަނީ މީހުން ދިރިއުޅޭ ކޮންމެ ގެއެއްގައި ވެސް ކަރަންޓް ރޭޓް ފްލެޓް ރޭޓަކުން ނަގާ ގޮތަށް. ކިތަންމެ ގިނައިން ކަރަންޓް ބޭނުންކުރިޔަސް އެ ބޮޑުވާ ނިސްބަތް ބޮޑުވެެގެންނެއް ނުދާނެ. ހަމަ އެއް ރޭޓަކުން ދާނީ"

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ރޭގެ ޖަލްސާގައި ރައީސް ޞާލިހް ވަނީ، އުމުރުން 65 އަހަރުން މަތީގެ މީހުންނަށް ދެމުން އަންނަ 5000 ރުފިޔާގެ އެލަވަންސް ކޮންމެ މަހަކު 7،000 ރުފިޔާ އަށް ބޮޑުކުރުމަށް ނިންމާފައިވާކަންވެސް އިއުލާން ކުރައްވާފައެވެ.

މީގެއިތުރުން އުމުރުން 65 އަހަރުވުމުން ރިޓަޔާމަންޓް އޮޕްޝަނަލްކޮށް، 70 އަހަރަށް، ރިޓަޔާމަންޓް އުމުރު ބަދަލު ކުރުމަށް ނިންމަވާފައިވާ ކަން ވެސް ރައީސް ވަނީ އިއުލާން ކުރައްވައިފައެވެ.