އޮނަރަރީ ޑޮކްޓަރޭޓަކީ އިޤްތިޞާދީ ޙާލަތު ރަނގަޅުކުރެއްވުމަށް ރައީސް ކުރައްވާ މަސައްކަތް ބަލައިގަންނަ ކަމުގެ ހެއްކެއް: ޕީއެންސީ

ޕާކިސްތާނުގެ އިންޓަރނޭޝަނަލް އިސްލާމިކް ޔުނިވަރސިޓީ އޮފް އިސްލާމްއާބާދުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އޮނަރަރީ ޑޮކްޓަރޭޓް އެރުވުމަކީ، ދިވެހިރާއްޖޭގެ އިޤްތިޞާދީ އަދި އިޖްތިމާޢީ ޙާލަތު ރަނގަޅުކުރެއްވުމަށް އެމަނިކުފާނު ކުރައްވާ މަސައްކަތްޕުޅު ބައިނަލްއަޤްވާމީ ފެންވަރުގައި ބަލައިގަންނަމުންދާ ކަމުގެ ހެއްކެއް ކަމަށް ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބުނެފިއެވެ.

ޕީއެންސީން ނެރުނު ނޫސް ބަޔާނެއްގައި ބުނެފައިވަނީ، ދިވެހިރާއްޖޭގެ ރައްޔިތުންނަށާއި ދިވެހި ދައުލަތަށް އެ ޕާޓީގެ ރައީސް އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކޮށްދެއްވާ އަގުހުރި ޚިދުމަތްތަކުގެ އަގުވަޒަންކުރުމުގެ ގޮތުން ޕާކިސްތާނުގެ އިންޓަރނޭޝަނަލް އިސްލާމިކް ޔުނިވަރސިޓީން އެމަނިކުފާނަށް އޮނަރަރީ ޑޮކްޓަރޭޓް އެރުވުމާ ގުޅިގެން، ޕާޓީގެ އެންމެހައި މެންބަރުންނާއި ލީޑަރޝިޕްގެ ނަމުގައި އެމަނިކުފާނަށާއި ސަރުކާރަށް ހޫނު މަރުޙަބާއެއް ދަންނަވާ ކަމަށެވެ.

އެ ބަޔާނުގައި ފާހަގަކޮށްފައިވާ ގޮތުގައި، މި ޝަރަފަކީ ރައީސުލްޖުމްހޫރިއްޔާގެ މަޤާމާ އެމަނިކުފާނު ޙަވާލުވެވަޑައިގަތުމަށްފަހު، ރާއްޖޭގެ އިޤްތިޞާދީ އަދި އިޖްތިމާޢީ ޙާލަތު ރަނގަޅުކުރެއްވުމަށާއި، ސަރުކާރުގެ ހިންގުން ހަރުދަނާކުރައްވައި، ދައުލަތުގެ މުއައްސަސާތައް އިތުރަށް ކުރިއެރުއްވުމަށް ފާއިތުވި މުއްދަތުގައި ކުރެއްވި ބުރަ މަސައްކަތްޕުޅު ބައިނަލްއަޤްވާމީ ފެންވަރުގައި ބަލައިގަންނަކަމުގެ ހެއްކެކެވެ.

މީގެއިތުރުން، މިއީ ރައީސް ޑރ. މުޢިއްޒުގެ ޒަޢާމަތުގައި ސަރުކާރުން ރާއްޖެއަށް ގެންނަމުންދާ ހެޔޮ ބަދަލުތަކުގެ އިތުރުން، އެމަނިކުފާނުގެ ޚާރިޖީ ސިޔާސަތުގެ ދަށުން ދިވެހިންނާއި ދިވެހިރާއްޖެ އިސްކުރައްވައިގެން، އަވައްޓެރި ޤައުމުތަކާއި ދުރު ޤައުމުތަކާއެކު ތިލަފަތްހަމަ ގުޅުމެއް ބާއްވަވަމުން ގެންދަވާކަން ޕީއެންސީން ވަނީ ފާހަގަކޮށްފައެވެ.

ހަމައެއާއެކު، ރައީސުލްޖުމްހޫރިއްޔާ މިހާރު ޕާކިސްތާނަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އެކި ދާއިރާތަކުން ދެ ޤައުމުގެ ގުޅުން ބަދަހިކުރުމަށް 20 އެއްބަސްވުމެއްގައި ސޮއިކުރެވުމަކީ ރާއްޖެއަށް ޙާޞިލުކުރެވުނު ބޮޑު ކާމިޔާބީއެއް ކަމަށް ޕީއެންސީގެ ބަޔާނުގައިވެއެވެ.

ޕާކިސްތާނަށް ދިވެހިރާއްޖޭގެ ވެރިޔަކު ޒިޔާރަތްނުކުރައްވާތާ 11 އަހަރު ފަހުން، ރައީސް ޑރ. މުޢިއްޒު އެ ޤައުމަށް ކުރެއްވި މި ދަތުރުފުޅަކީ އިސްލާމީ ޤައުމުތަކާއެކު ބަދަހި ގުޅުމެއް ޤާއިމުކުރެއްވުމަށް އެމަނިކުފާނު ދެއްވާ ޚާއްޞަ އަހައްމިއްޔަތުކަމުގެ ހެއްކެއް ކަމަށްވެސް އެ ޕާޓީން ބުނެފައިވެއެވެ.