ރައީސް ޔާމިނުގެ ހައްގުތައް ނިގުޅައިގެންފައިވާތީ ޝިޔާމުގެ ބޮޑެތި ކަންބޮޑުވުންތަކެއް

ސަރުކާރުގެ އާރާއި ބާރު ބޭނުންކޮށްގެން ވާދަވެރި ސިޔާސީ ލީޑަރު އަދި ޕީޕީއެމްގެ ރައީސް އަބްދުالله ޔާމީން އަބްދުލްގައްޔޫމުގެ ގިނަ ހައްގުތަކެއް ނިގުޅައިގެންފައިވާކަން ފާހަގަކުރައްވާ ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ބޮޑެތި ކަންބޮޑުވުންތަކެއް ފާޅުކުރައްވައިފި އެވެ.

ޝިޔާމު މި ކަންބޮޑުވުންތައް ފާޅުކުރެއްވީ އިންތިޚާބަށް ސަރުކާރުން ނާޖާއިޒް ނުފޫޒާއި ބާރު ފޯރުވަމުންދާތީ އިންތިޚާބުތަކުގެ މިނިވަންކަން ކަށަވަރުކުރުމަށް ގޮވާލާ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ހުށައަޅުއްވާފައިވާ ގަރާރަށް ބަހުސްކުރައްވަމުންނެވެ.

އެއީ ރިޔާސީ އިންތިޚާބުގެ ތެރޭގައި ހުށައެޅުނު ގަރާރެއް ނަމަވެސް، ތަފާތު ސަބަބުތަކާއި ހުރެ ގަރާރުގެ މަސައްކަތް ކުރިއަށް ނުގެންދެވި ވަނީ ދިގުލައިގެން ގޮސްފައެވެ.

މިއަދު އެ ގަރާރަށް މަޖިލީހުގައި ބަހުސްކުރެވިފައިވާއިރު، ޝިޔާމު ވިދާޅުވީ އިންތިޚާބެއްގައި ރައްޔިތުންނަށް ލިބޭ އެންމެ މުހިންމު ހައްގަކީ ވާދަކުރުމާއި، ވޯޓުލުމުގެ ހައްގު ކަމަށެވެ. އެހެން ނަމަވެސް ސަރުކާރާއި ވާދަވެރި ޕާޓީ ޕީޕީއެމްގެ ލީޑަރު ރައީސް ޔާމީން އަބްދުލްގައްޔޫމަށް ރިޔާސީ އިންތިޚާބުގައި ވާދަކުރުމުގެ ފުރުސަތު ގެއްލުވާލާފައިވާކަމަށާއި، އެއީ އެމަނިކުފާނަށް ވޯޓުލުމުގެ އުންމީދުގައި ތިިބި ލައްކައަކަށްވުރެ ގިނަ ރައްޔިތުންގެ ހައްގުތައް ނިގުޅައިގަތުންކަމަށް ޝިޔާމު ވިދާޅުވި އެވެ.

"ވާދަވެރި ސިޔާސީ ޕާޓީއެއްގެ ގޮތުގައި އޮތީ ޕީޕީއެމް-ޕީއެންސީ ކޯލިޝަން. އެ ކޯލިޝަންގެ ރައީސަކަށް ހުންނެވީ ރައީސް ޔާމީން. އެމަނިކުފާނަށް އެ ކޯލިޝަނުން އެންމެ ފުރަތަމަ ދިވެހިރާއްޖޭގައި 2023 ވަނަ އަހަރުގެ ރިޔާސީ އިންތިޚާބަށް ރިޔާސީ ޓިކެޓެއް އެރުވުނީ ރައީސް ޔާމިނަށް. އެހެން ނަމަވެސް ކަން ހިނގައިދިޔަ ގޮތް މިތަނުގައި ތިބެ ބަލާލީމަ އެބަ އެނގޭ. އެމަނިކުފާނަށް އިންތިޚާބުގައި ވާދަކުރުމުގެ ހައްގު ނިގުޅައިގަތީ ސީދާ ސަރުކާރުގެ ނުފޫޒުން"

މެމްބަރު އަހުމަދު ޝިޔާމް

އެއާއެކު ޝިޔާމު ވިދާޅުވީ ރައީސް ޔާމިނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ މައްސަލަވެސް ކުރިއަށް ނުގެންގޮސް އަދިވެސް ދިގު ދަންމަމުންދާ ކަމަށެވެ. އެ މައްސަލަ ރައީސް ޔާމިނުގެ ފަރާތްޕުޅުން އިސްތިއުނާފު ކުރިތާ 8 މަސް ފާއިތުވެގެން ގޮސްފައިވާ ކަމަށާއި، އިސްތިއުނާފު މަރުހަލާ މިހާ ބޮޑަށް ދިގުލައިގެން ދިއުމަކީ ފަރުދަކަށް ދެވޭ އަނިޔާއެއް ކަމަށާއި، މިކަން ކުރަމުންދަނީ ސީދާ ނުފޫޒު ފޯރުވައިގެން ކަމަށް ޝިޔާމު ވަނީ ވިދާޅުވެފަ އެވެ.

"23 ފެބްރުއަރީގައި އެމަނިކުފާނު ހައިކޯޓުގައި އިސްތިއުނާފުކުރެއްވީ، 8 މަސް ދުވަސް (ވެގެން މިދަނީ). ކޮން ހައްގެއްތޯ އިސްކުރަން ޖެހެނީ؟ އަނިޔާ ލިބެމުންދާ ފަރާތެއްގެ ވާހަކަ މި ދައްކަނީ. ދަށު ކޯތަކުން ހުކުން ޖަހައިގެން ޖަލުގައި 4 އަހަރު ހޭދަކުރައްވާ ބޭފުޅެއްގެ ވާހަކަ މި ދައްކަނީ. އަނިޔާ ލިބެނީ އެ ފަރުދަށް އެކަންޏެއް ނޫން. އެމަނިކުފާނުގެ އާއިލާއަށް ދިވެހި ރައްޔިތުންނަށް"

މެމްބަރު އަހުމަދު ޝިޔާމް

ވ އާރަށުގެ މުއާމަލާތާއި ގުޅުވާ ރައީސް ޔާމިނުގެ މައްޗަށް ދައުލަތުން އުފުލާފައިވާ ދައުވާތައް ސާބިތުވާކަމަށް ކަނޑައަޅާ އެމަނިކުފާނުގެ މައްޗަށް ޖަލު ހުކުމެއް ކޮށްފައިވާއިރު، ރިޔާސީ އިންތިޚާބުގެ ދެވަނަ ބުރުގެ ވޯޓަށްފަހު އެމަނިކުފާނު ވަނީ ގޭ ބަންދަށް ބަދަލުކޮށްފަ އެވެ.

އެހެން ނަމަވެސް ހައިކޯޓުގައި އޮތް އާރަށު މައްސަލައިގެ އިސްތިއުނާފު ފަހު އަޑުއެހުމާއި ހަމަޔަށް ގޮސް މަޑުޖައްސާލާފައިވާއިރު، އަޑުއެހުން ތާވަލުނުކޮށް ދިގު ދަންމަމުން ދިއުމަކީ ރައީސް ޔާމިނުގެ އިސްތިއުނާފީ ހައްގަށް ހުރަސްއެޅިގެންދާ ކަމެއްކަމަށާއި، އެ މަރުހަލާ ދިގުލައިގެން ދިއުމަކީ އިޔާދަ ނުކުރެވޭނެ ގެއްލުންތައް އެމަނިކުފާނަށް ލިބިގެންދާނެ ކަމެއްކަން ފާހަގަކޮށް ގާނޫނީ ވަކީލުން ވެސް ގެންދަވަނީ ކަންބޮޑުވުން ފާޅުކުރައްވަމުން ނެވެ.